¹ Ngacakuti kuli icakukoselesha conse muli Kristu, ngacakuti muli ukutalalikwa ukuleta icitemwiko, ngacakuti muli isenge lyonse mu Mupashi, ngacakuti mwaliba uluse lusuma ne cikuku, ² kanshi pangeni insasa shandi ishafikapo mukuba amano yamo yene, ukukwata icitemwiko cimo-cine, mukwampana pamo mu Mupashi, kabili ukukwata icintu cimo cine. ³ Mwilacita icintu nangu cimo mukuitemwa nangu mufyabula ubuyo. Lelo mukuicefya mulesakamana bambi kucila mwebene. ⁴ Lekeni cilaumo eba uwakusakamana ifintu fyakwe umwine, lelo nakufilekabila bambi. ⁵ Kwateni ici mu mano yenu mwebene ico icali namuli Kristu Yesu wine, ⁶ uyo, nangu ali mumusango wabulesa, taitungile ena ukulingana na Lesa ngafimo ifyakwikatililako. ⁷ Lelo, aisulile umwine pakubula icita ca mubomfi, kabili afyelwe mukupalana na bantu. ⁸ Aliicefeshe umwine kabili aishileba uwaicefya ukufika nakumfwa, nemfwa yapa musalaba! ⁹ Eico Lesa nao alimusumbwile. Amupele ne shina ilyo ilyacila pamashina yonse. ¹⁰ Acitile ici pakwebati mwishina lyakwa Yesu ikufi lyonse llifwile ukufukama, amakufi ya abo mu mulu na pano calo kabili napanshi ya calo. ¹¹ Acitile ici pakweba ati ululimi lonse lufwile ukulanda ukuti Yesu Kristu ni Shikulu kubukata bwakwa Lesa Tata. ¹² Eico kanshi, mwebatemwikwa bandi, ngefyo mubela lyonse, teilyo fye ndipo lelo nokucilishapo ilyo nshilipo, bombeleni ipusukilo lyenu mwebene mu mwenso no kututuma. ¹³ Pantu ni Lesa eulebombela muli mwekonse kukutemwa kabili nakukubomba pamulandu wafintu fyakwe ifisuma. ¹⁴ Mulecita fyonse ukwabula ukuilishanya nangu ukutalikana ¹⁵ pakwebati mwaisaba abakaele kabili pwililika, abana bakwa Lesa ababula ubulema pakati kabalubantika kabili no luko ulwatalama, umo musankila ngo lubuto mu calo. ¹⁶ Ikatilileni ku cebo ca bumi pakweba ati pabushiku bwakwa Kristu nkaitakishe ukuti nshabutukile ibusha nangu ukubombela ibusha. ¹⁷ Nomba nangu benga njitila ngecamusangulo pe lambo no mulimo wacicetekelo cenu, ndi uwatemwa kabili nokusansamukila namwe bonse. ¹⁸ Mu musango umo wine mufwile mwaba abasekela nokusansamuka nandi. ¹⁹ Nomba ndesubila muli Shikulu Yesu ukutuma Timoti kuli mwe ili line, pakwebati nandi ningaba uwakoseleshiwa ilyo naishiba ifintu pali mwe. ²⁰ Pantu ntakwata nangu umo nga o, uyo mucine uwamisakamana. ²¹ Pantu bonse bafwaya ifyakubawamina abene, tefintu fyakwa Yesu Kristu. ²² Nomba imwe mwalishiba alilinga, pantu ngomwana na wishi, kanshi abombele nandi mu mbila-nsuma. ²³ Eico ndesubila ukumutuma ililine fye nganamona ifyo ifintu fileya nandi. ²⁴ Nomba nincetekela muli Shikulu ukuti ine nemwine ndinokwisa ili line. ²⁵ Lelo nditontonkenye cili icalinga ukutuma Epaphroditasi ukubwelela kuli mwe. Ni wesu kabili umubomfi munandi kabili umushilika munandi kabili inkombe yenu kabili umubomfi wa bufwayo bwandi. ²⁶ Pantu ali wakusakamikwa, kabili ali kukabila ukuba naimwe bonse, pantu mwalyumfwile ukuti alikulwala. ²⁷ Kwena icine-cine alikulwala icakuti alikuba mupepi nokufwa. Lelo Lesa ali no luse pali ye, kabili tepali ye fye, napali nebo wine, pakuti ntali nobulanda pabulanda. ²⁸ Eico mukwangufyanya ndemutuma, pakweba ati ilyo mwamumona nakabili mukasansamuke, kabili ningakwata ubulanda ubunono. ²⁹ Pokeleleni Epaphoroditasi muli Shikulu ne nsasa shonse. Mulecindikisha abantu abapala nga ye. ³⁰ Pantu nipa mulimo wakwa Kristu eco aishile bela mupepi nemfwa. Apeleshe umweo wakwe pakuntumika no kufikilisha ifyo mushingacita mukuntumikila.