¹ Paulo, umutumwa wakwa Kristu Yesu ku kufwaya kwa kwa Lesa, na Timoti wesu, ku lukuta lwa kwa Lesa ulwaba mu Korinti, nakuli bonse abamushilo abakwa Lesa mucitungu conse ica ku Akaya. ² Ukusenamina kwingaba kuli mwe no mutende ukufuma kuli Lesa Tata wesu na Shikulu Yesu Kristu. ³ Lekeni Lesa kabili wishi wakwa Shikulu Yesu Kristu alumbanishiwe. Ni Tata wa luse kabili Lesa wacitalaliko conse. ⁴ Lesa ala tutalalika muma cushi yesu yonse, pakuti twingatalalika abo abali mu macushi ayali yonse. Tutalalika bambi ne citalaliko cimocine ico Lesa abonfeshe ukututalalikilako. ⁵ Ngafilya ukucula kwa kwa Kristu kwaishile pamulandu wesu, efyo necakutalalikilako cesu citwishila ukupitila muli Kristu. ⁶ Lelo ngatwacushiwa, nipakutalalikwa kwenu ne pusukilo; kabili ngatwatalalikwa, nipa kutalalikwa kwenu. ukutalalikwa kwenu kulebomba umupwilapo ngacakuti mwashipikisha mukucula kumokwine naifwe tuculako. ⁷ Usubilo lyesu pali mwe lyakukosa, pantu twalishiba ukuti ilyo muleculila pamo, nemwe bene efyo mutalalikwa naifwe. ⁸ Pantu tatukofwaya mwebo ukukana ishiba,ba wesu, pa macushi twakwete ku Asia. Twalititikishiwe ukucila amaka yesu icakuti twalilanguluka napa bumi bwesu. ⁹ Icine cine, kwalipingwilwe ukufwa pali fwe. Lelo nipakulenga fwebo ukukana bika ukucetekela muli fwebene, lelo muli Lesa, uubusha abakufwa. ¹⁰ Alitupokolwele ukufuma kuli ubu busanso bwa mfwa. ubwakutinya, kabili akatupususha. Pali ye twalibikapo isubilo ukuti akatupusha. ¹¹ Akacita ici ilyo imwe muletwafwa mwipepo lyenu. Elyo abengi bakapela amatotelo ayengi ukwimininako ifwe pabupe ubwawamisha ubwapelwa kuli fwe ukupitila muma pepo ya bantu abengi. ¹² Twaliba abaitakisha pali ci: Kampingu wesu akoshinkisha ukuti twalikwata imbela shesu mu calo ishabumushilo namucishinka cakwa Lesa, tekucetekela pamano yabuntunse lelo pakusenamina kwakwa Lesa. ¹³ Tatulemilembela ifyo tamwingabelenga nangu ukukana iluka, kabili nkosubila ukuti muli nokwiluka umupwilapo ¹⁴ ngefyo tamulatwishiba bwino, pakweba ati mwingaitakishisha mulifwe pa bushiku bwa kwa Shikulu Yesu, ngefyo tukaitakishisha pali mwe. ¹⁵ Pantu nalikoseleshiwa pali ci, nalikufwaya ukwisa kuli mwe, pakuti mwingapokelela icabupe icawamisha icabubili. ¹⁶ Nali kupekanya ukumitandalila pakuya ku Makedonia. Elyo nali kufwaya ukumitandalila pa bulendo bwandi ubwakufuma ku Makedonia, elyo kabili nemwe ukuntuma pakuya ku Yudea. ¹⁷ Ilyo nali kutontonkanya muli iinshila, bushe nali kutwishika? Bushe mpanga amapange ukulingana no buntunse, pakuti ndande ''Ee, ee'' kabili ''Awe, awe'' pashinta imo ine? ¹⁸ Lelo ngefyo Lesa aba uwacishinka, ukulanda kwesu kuli mwe te ''Ee'' kabili ''Awe.'' ¹⁹ Pantu umwana wa kwa Lesa, Yesu Kristu, uyo Suvano, Timoti nandi tushimikila pali mwe, te ''Ee'' kabili ''Awe'' Namulico, aba inshita yonse ''Ee.'' ²⁰ Pantu amalayo yonse ayakwa Lesa ni ''Ee'' muli ye. Eico ukupitila muli ye tulanda ''Ameni'' kubukata bwakwa Lesa. ²¹ Nomba ni Lesa eukosha ifwe na mwe muli Kristu, kabili alitusubile, ²² abikilepo necikakatiko cakwe pali fwe. kabili atupele Umupashi Wamushilo mu mitima yesu ngecishininkisho pafili nokwisa. ²³ Napali ico, Nakuta Lesa ukuba kambone ku mweo wandi ukuti umulandu ntaishile ku Korinto wakutila mfwile ukumilekelela. ²⁴ Ici tepamulandu wakuti twalikufwaya ukuba imfumu pa cicetekelo cenu. Pali ici tuli babomfi banenu nemwe pakusansamuka kwenu, ilyo mukoiminina mucicetekelo cenu.