¹ Pauro, muranda waMwari, nemuapositora waJesu Kristu, nekuda kekutenda kwevaketwa vaMwari, nekokuziisa chokwadi iri pakunamata Mwari, ² patariro yeupenyu usingaperi, wakagondesa ena Mwari, asinganyepi, nguva dzisingaperi dzisati dzaapo. ³ Asi panguva dzakafanira wakaziisa shoko rake nekuparidza kwandakapiwa nemurairo waMwari, Muponesi wedu. ⁴ kunaTito, mwana wangu chaiye pakutenda kwedu teshe: Nyasha netsitsi nerugare, zvinobva kunaMwari Baba, naIshe Jesu Kristu, Muponesi wedu, ngazvive newe. ⁵ Ndakakusiya paKrete nemhaka iyi, kuti upedzise kugadzira izvo zvakanga zvasara, nekugadza vakuru mumaguta eshe, sezvandakakuraira. ⁶ kana kunemunhu usina chaangapomerwa, murume wemukadzi mumwechete, anevana vakatendeka, vasingapiwi ndaa yokuti havazvidzori, kana kuti havazwisisi. ⁷ Nokuti mutariri unofanira kuwa munhu usina chaangapomerwa, somuchengeti weimba yaMwari; asingaiti kuda kwake, asingakurumidzi kutsamwa, asingadi waini, asingarwi, asingakariri fuma yakaipa. ⁸ Kundze kweizwi, ena unoitira vamweni rudo, unoda zvakanaka, wakachenjera, wakarurama, mutsvene, unozvidzora. ⁹ Unobatisisa shoko rechokwadi, sezvarinodzidziswa, kuti agone kuraira nedzidziso yakanaka, nokukunda vanokakavara. ¹⁰ Nokuti vajinji varipo vasingateereri, vanotaura zvisina maturo, vanonyengera, zvikuru avo vokudzingiswa, ¹¹ vanofanira kudzivirirwa muromo yavo; vanoparadza mhuri kwazvo, zvavanodzidzisa zvisakafanira nokuda kwefuma yakaipa. ¹² 2 Mumwe muporofita pakati pavo, wakati: VaKrete vanogara vechinyepa, zvikara zvashata, nevanokara vanevusimbe. ¹³ Kupupura uku ndokwechokwadi. Nemhaka iyi ivarange zvikuru, kuti vanake pakutenda. ¹⁴ Varegere kuteerera ngano dzevaJudha, nemurairo yevanhu vanofuratira chokwadi. ¹⁵ Kune vakachena, zveshe zvakachena, asi kune vakasvibiswa, vasingatendi, hakuna chinhu chakachena, nekuti nekufunga kwavo nehana yavo zvakasvibiswa. ¹⁶ Vona vanoti, tinoziva Mwari, asi vanomuramba nemabasa avo, zvavari vanhu vanonyangadza, vasingateereri, vasakafanira pamabasa eshe akanaka.