¹ Panguva iyo vadzidzi vakauya kunaJesu, vakati, “Ndiani wakakurisisa muumambo hwomudenga?” ² NaJesu wakadaidza kwaari mwana mudoko, wakamuisa pakati pavo. ³ Akati, “Ngegwinyiso ndinoti kwomuri, musikatenderuki, muite kudai ngevana vadoko, amutongozopindi muumambo hwomudenga. ⁴ Ndizvo iye unozodzipfaisa kudai ngouyu mwana mudoko, iye ndiye wakakurisisa muumambo hwomudenga. ⁵ Nouwo unozoashira umwe mwana mudoko wakadai ngouyu ngezina rangu, unondiashira inini. ⁶ “Asi kunyazwi ndiani unozoita kuti umwe wevadoko vakadai vanonditenda vashaishe, kunopinda kumunakira iye kuti guyo gurutu risungirwe muhuro mwake, kuti anzvaidzwe muudzamu rworuandhle. ⁷ Ihehe kunyika ngendaa yezvipumhuniso! Ngokuti kunotamika kuti zvipumhuniso zviuye; asi ihehe kwaari munhuwo unoita kuti vanhu vashaishe!, ⁸ Kuti nyara yako dangani rutsoka rwako rwechikuita kuti ushaishe, ruteme, ururashe kubva kwouri. Kunopinda kunaka kwouri kuti upotere mukurarama uri chirema nokuti wechikumhina, kunekuti unenyara mbiri dangani tsoka mbiri ukandirwe mumuriro usikadzimi. ⁹ Nokudai dziso rako rechikuita kuti ushaishe, ribvite, urirashe kubva kwouri. Kunopinda kunaka kwouri kuti upotere mukurarama uri jochotore kunekuti unemadziso mairi ukandirwe mumuriro weGehena. ¹⁰ Ngwarai kuti musazoshoora umwe weava vadoko. Ngokuti ndinoti kwomuri, mudenga ngirosi dzavo dzinogara dzechiona hope yaBaba angu vari mudenga. ¹¹ Ngokuti Mukororo woMunhu wakauya kuponesa avo vakarashika. ¹² Munopinimidzenyi? Kuti munhu anezana remakwai nerimwe rawo rarashika, aasii here arimakumi mapfumbamwe nepfumbamwe, aende mumitunhu kutsvaka iro rakarashika? ¹³ Kudai kwechiitika kuti unoriona, ngegwinyiso ndinoti kwomuri, unopinda kudakara ngeiro kunemakumi mapfumbamwe nepfumbamwe asikazi kurashika. ¹⁴ Ngokudaro andikwopi kuda kwaBaba enyu vari mudenga kuti umwe weava vadoko arove. ¹⁵ Kudai munun'una wako echizokushaishira, enda umuonise ndaa yake pakati penyu muri mwega. Kudai iye echizopurutana, wauyirwa ngomunun'una wako, ¹⁶ Asi kuti asikazopurutani, tora umwe dangani vairi kuenda newe, kuti ngemiromo yevairi dangani yevatatu vanoita chapupu, mazwi eshe angagwinyiswa. ¹⁷ Asi kuti iye echizoramba kuvapurutana, wechironzera vechiara. Asi kudai echizoramba kupurutana kunyazwi kunevechiara, ngaaite kwouri kudai ngewevemadzinza nokudai ngomubharisi. ¹⁸ Ngegwinyiso ndinoti kwomuri, ‘Kunyazwi chiinyi chomunozosunga munyika, chinozosungwawo mudenga. Neicho chomunosunhura munyika, chinozosunhurwawo mudenga. ¹⁹ Zve ndinoti kwomuri, kudai vairi venyu vanozotenderana panyika ngechiro chevanozokumbirira, chinozoitwa kwavari ndiBaba angu vari mudenga., ²⁰ Ngokuti apo vairi nokuti vatatu vechiungana pamwepo ngezina rangu, ndiripo pakati pavo''. ²¹ Naapo Petro wakauya echiti kwaari, “Mambo, munun'una wangu unozondishaishira kanganai ndechimurekerera? Metsa mikuwo minomwe here?” ²² Jesu wakati kwaari, “Andironzi kwouri kuti, metsa mikuwo minomwe akadi; asi metsa mikuwo iri makumi manomwe akapetwa kanomwe. ²³ Ndizvo umambo hwomudenga hunoedzaniswa nomunhu uri mambo, uwo waida kuerengerana nevaranda vake chikwereti. ²⁴ Naapo atanga kuerenga, umwe wakaunzwa kwaari anechikwereti chematarenda makumi emazana gumi. ²⁵ Asi ngokuti iye waiya asina chokuripira ndicho, mambo wake wakapanga kuti atengeswe nomukadzi wake nevana vake nazvo zveshe zvaaiya nazvo, kuti chikwereti chiripwe. ²⁶ Ndizvo muranda uwo wakawa pashi ngemabvi, akamupota echiti, ‘Wechindikungurira, neni ndinozokuripira zveshe''. ²⁷ Naapo mambo wouwo muranda wakamukungurira, akamusunhura, akamurekerera chikwereti. ²⁸ Asi uwo muranda wakabuda, akaona umwe wevaranda mungani wake, uwo waakakweretwa ndiye zana remadhinari;[16] naye wakamubata ngenyara, akamudzipa pahuro echiti, ‘Ripa kwendiri chikwereti chako''. ²⁹ Ndizvo muranda uwo mungani wake wakawa pashi, akamupota echiti, ‘Wechindikungurira, neni ndinozokuripira''. ³⁰ Asi aazi kutenda. Asi wakaenda akamuisa mutirongo, metsa aripa icho chikwereti. ³¹ Ndizvo varanda vangani vake, vechiona icho chakaitika, vakasvipa mwoyo kakurutu, vakauya, vakaronzera mambo wavo izvo zveshe zvakaitika. ³² Naapo mambo wake amudaidza, wakati kwaari, ‘Iwewe muranda wakashata, ndakakukungurira chikwereti icho cheshe, apo wandipota. ³³ Usaisisa newe here kuti ukungurire muranda uwo mungani wako, kudai ndini ndakakukungurira iwewe?’ ³⁴ Namambo wake wakatseneka, akamuhina kuvashwinyisi metsa aripa izvo zveshe zvaaiya nechikwereti kwaari ndizvo. ³⁵ Ngokudaro Baba angu vari mudenga vanozoita kwomuri, kuti imwimwi musikakunguriri munun'una wenyu ngomumwoyo mwenyu''.