¹ Ngesure kwemazuva matanhatu Jesu wakatora Petro, Jakobe naJohani, munun'una wake, wakavatungamira akakwira navo padera pomutunhu wakareba, vari vega. ² Naye wakatsandudzwa pamberi pavo, nehope yake yakajeka kudai ngezuva, nezvokufuka zvake zvakachena kudai ngokujeka. ³ Penya, kwakaoneka kwaari Mosi naErija, vechiereketa naye. ⁴ NaPetro wakati kunaJesu, “Mambo, kwakanaka kwetiri ngokuti tiri panapa. Kudai wechida, ndinozoaka pano zvitumba zvitatu, chimwe chako, chimweni chaMosi nechimweni chaErija''. ⁵ Apo achaereketa, penya gore rinon'anikira rakavatibikira, penya izwi rakabva mugore rechiti, “Uyu ndiye Mukororo wangu, wendinoda, wendinonasa kudakara ndiye; mwechimuzwa''. ⁶ Naapo vadzidzi vazwa izvi, vakadzikandira pashi vakatsikitsira hope dzavo pamavhu, vakatya kakurutu. ⁷ NaJesu wakauya, akavabata, akati, “Mirukai, musatya''. ⁸ Naapo vamirudza madziso avo, avazi kuona munhu, kwega Jesu. ⁹ Vachadzaka kubva padera pomutunhu, Jesu wakavapanga echiti, “Musazoronzera munhu naumwe ngendaa yechioniso metsa Mukororo woMunhu amuka kwavakafa. ¹⁰ Nevadzidzi vake vakamubvunza vechiti, “Ndizvo, ngenyi vanyori vanoti, ‘Kunosisira kuti Erija atange kuuya?’ ¹¹ Naye wakapingura echiti, “Ngegwinyiso Erija unouya aunzidzire zveshe. ¹² Asi ndinoti kwomuri, Erija wakatouya hake, navo avazi kumuzia, asi vakaita kwaari zveshe izvo zvevakada. Ngokudaro Mukororo woMunhu naye unozotambudzwa ndivo''. ¹³ Naapo vadzidzi vakazwisisa kuti wakaereketa kwavari ndiJohani Mubhabhatidzi. ¹⁴ Vaguma kunembungano kwakauya kwaari munhu, akamugwadamira pashi echiti, ¹⁵ Mambo, wechimuitira nyasha mwana wangu; ngokuti unenhutu, unotambudzika kakurutu. Ngokuti kazhinji unowa mumwoto nekazhinjizve mumvura. ¹⁶ Neni ndamuunza kunevadzidzi vako, navo vakorera kumuponesa''. ¹⁷ Jesu wakapingura, akati, “A! Mubarirwana usikatendi nounopauka, ndinozogara nemwi mukuwo wakaitawani? Ndinozomusengerera mukuwo wakaitawani? Wechimuunza pano kwendiri''. ¹⁸ NaJesu wakakaraidza iro dhimoni; naro rakabuda kubva kwaari. Nomurumbwana wakaponeswa kubvira ngeawa iro. ¹⁹ Naapo vadzidzi vakauya kunaJesu, ari ega, navo vakati, “Ngenyi isusu takorera kuridzinga?'' ²⁰ Naye wakati kwavari, “Ngendaa yokutenda kwenyu kudoko, ngokuti ngegwinyiso ndinoti kwomuri, kudai munokutenda kudai ngetsangu yomustadhi, mungaronza kuneuyu mutunhu kuti, ‘Ibva panapa, uende apo;’ nawo unozobva apo; kusina chiro chisikazoitwi ndimwi. ²¹ Asi iyi mbeu aibudi kwega ngokukumbira nangokuera kudya. ²² Navo vachaungana pamwepo muGarire, Jesu wakati kwavari, “Mukororo woMunhu unozohinwa munyara dzevanhu. ²³ Navo vanozomuuraya, naye ngezuva rechitatu unozomukazve.” Navo vakatambudzika kakurutu. ²⁴ Naapo vauya muKhapernaume, avo vaiashira chibharo vakauya kuna Petro, vakati, “Mudzidzisi wenyu aadusi chibharo chemare chinozwi dhidhirakama here?” ²⁵ Wakati, “Eya.” Kwakati apotera mumhatso Jesu wakatanga kuereketa kwaari echiti, “Unopinimidzenyi, Simoni? Madzimambo enyika vanoashira kunaani murimwa nokuti chibharo? Kunevakororo vavo nokuti kuvapara here?” ²⁶ Petro wakati kwaari, “Kuvapara.” Naapo Jesu wakati kwaari, “Ngokudaro vakororo vavo vari vakasunungurwa. ²⁷ Asi kuti tisazovapumhunisa, enda iwewe kuruandhle, ukandire chitebo, utore hove iyo inotanga kubatwa. Naapo wabeura muromo wayo, unozoona chigurwa chemare yesirivha chinozwi sitatera; icho unozochitora uhine kwavari ngepamusoro pangu nepako.