¹ Zvinopano kwakauya kunaJesu vaFarisi nevanyori vechibva Jerusarema vechiti, ² “Ngenyi vadzidzi vako vechigura tsika dzevakuru, ngokuti avashambi nyara dzavo apo vechidya chingwa'' ³ Asi Jesu wakavapingura, akati kwavari, “Imwimwi nemwi munogura ngenyi mupango waMwari ngetsika dzenyu? ⁴ Ngokuti Mwari wakati, ‘Remeredza baba ako namai ako, nouwo unotuka baba nokuti mai, ngaafe. ⁵ Asi imwimwi munoti, iye unozoti kunababa ake nokuti kunamai ake, ‘Chiro chiri nechiri icho chemwaida kudetserwa ndicho ndini chaachipo kunaMwari'', ⁶ aachatamiki kuremeredza baba ake nokuti mai ake. Ndizvo ngokudaro munoita kuti izwi raMwari riite risina shwiro ngetsika dzenyu. ⁷ Imwimwi vadziitisi, Isaya wakanasa kuprofeta ndimwi echiti ⁸ ‘Vanhu ava vanondiremeredza ngemiromo yavo, asi mwoyo yavo iri kuretu kwendiri. ⁹ Asi vanotera kundidira, vechidzidzisa kuita zvidzidziso mipango yevanhu''. ¹⁰ Naye echidaidza pamwepo mbungano, wakati kwavari, “Izwai muzwisise. ¹¹ Andichopi akadi chinopotera mumuromo chinosvipisa munhu, asi icho chinobuda mumuromo, ndicho chinosvipisa munhu. ¹² Naapo vakauya vadzidzi vake, vakati kwaari, “Auzii here kuti vaFarisi vapumhuniswa ngokuzwa izwi iri? ¹³ Asi Jesu wakapingura, akati, “Chisimwa cheshe chisikazi kusimwa ndiBaba angu vari mudenga chinozobvitwa. ¹⁴ Varekerenyi, vari mapofu anokweya mapofu. Nokudai bofu rechikweya bofu, eshe anozowira mukati mwerindi''. ¹⁵ NaPetro wakapingura, akati kwaari, “Tidudzire muedzaniso uyu''. ¹⁶ Asi wakati, “Imwimwi nemwi hamusati mwanasa kuzia here? ¹⁷ Amuzwisisi here kuti icho chinopotera ngepamuromo chinoenda mundani, chinorashwa mushango? ¹⁸ Asi izvo zvinobuda kumuromo zvinobva mumwoyo. Izvi zvinomusvipisa munhu. ¹⁹ Ngokuti mumwoyo munobva mirangariro yakashata, kuuraya, kuomba, kuhura, umbavha, uchapupu hwokunyepa, kutuka. ²⁰ Izvi ndizvo zvinomusvipisa munhu. Asi kudya ngenyara dzisikazi kushambwa akusvipisi munhu akadi''. ²¹ Naapo Jesu wakabvapo, wakaenda munyika yeThire neyeSidhoni. ²² Penya dzimai reKhenani rakabva kundau iyo, rakadaidzira rechiti, “Ndiitire nyasha, Mambo, Mukororo waDhavhidha. Mwanasikana wangu unotambudzwa kakurutu ngedhimoni''. ²³ Asi Jesu aazi kuripingura neizwi. Nevadzidzi vake vakauya kwaari, vakamupota vechiti, “Wechimuendesa, ngokuti unodaidzira sure kwedu''. ²⁴ Asi Jesu wakapingura, akati, “Ndakatumirwa kwega kumakwai akarashika emhatso yaIsuraeri''. ²⁵ Asi uwo wakauya akagwadama, akati, “Mambo, ndidetsere''. ²⁶ Asi wakapingura, akati, “Akuzi kunaka kutora chingwa chevana nokuchikandira kuzvimbwa''. ²⁷ Asi uwo wakati, “Eya, Mambo, kunyazwi zvituhwa zvembwa zvinodya matsekeneswa anowarakatika patafura ramambo wazvo''. ²⁸ Naapo Jesu wakapingura, akati kweriri, “A dzimai, kutenda kwako kwakakura! Ngakuitike kwouri kudai ngezvounoda.” Nemwanasikana waro wakaponeswa kubvira ngeawa iro. ²⁹ NaJesu wakabvapo, wakauya pasinde peruandhle rweGarire; wakakwira pamutunhu, akagara apo. ³⁰ Nembungano huru yakauya kwaari, inazvo zvirema nemapofu nevakakuvara nezvimbungumbungu, nevamweni vazhinji, vakavaisa pashi kutsoka dzake, naye wakavaponesa. ³¹ Ngokudaro mbungano yakashamiswa apo yaona zvimbungumbungu zvichiereketa nevakakuvara vechiponeswa nezvirema zvechihamba nemapofu echiona. Navo vakakudza Mwari waIsuraeri. ³² Naapo Jesu wakadaidza vadzidzi vake kwaari, akati, “Mwoyo wangu unovazwira urombo, ngokuti vaiya neni mazuva matatu vasina zvokudya. Neni andizovaendesi vasikazi kudya, ngokuti vangazodemera munjira''. ³³ Nevadzidzi vake vakati kwaari, “Ngepari petingaona zvingwa zvakawanda murubaya muno zvinokwanisa kugutisa vanhu vazhinji vakadai?'' ³⁴ NaJesu wakati kwavari, “Munezvingwa zvinganai?” Navo vakati, “Zvinomwe nezvihove zvishomani''. ³⁵ Naye wakaronzera mbungano kuti igare pashi. ³⁶ Naye wakatora zvingwa zvinomwe nehove, akazvibonga, akazvigura, akahina kunevadzidzi, nevadzidzi vakazvihina kune mbungano. ³⁷ Navo vakadya veshe, vakaguta. Navo vakatonhera matsekeneswa akasara, zvitundu zvinomwe zvakazara. ³⁸ Naavo vakadya vaiya vamuna mazana makumi marongomuna, ngepabanze pevakadzi nevana. ³⁹ Naye Jesu wakaendesa mbunganu, wakapotera mungarava, akauya kumigano yeMagadhana.