¹ Ngouwo mukuwo Herodhi mutongi wematunhu marongomuna wakazwa mbiri yaJesu. ² Naye wakati kuvaranda vake, “Uyu ndiJohani Mubhabhatidzi; wamuka kwevakafa. Ndizvo mishando iyi ine simba inoitwa ndiye''. ³ Ngokuti Herodhi waiya akamubata Johani, akamusunga, akamuisa mutirongo ngendaa yaHerodhiasi mukadzi womunun'una wake Firipi. ⁴ Ngokuti Johani waiya akati kwaari, “Autenderwi ngezvironzo kuti umuroore''. ⁵ Naapo aida kumuuraya, wakatya mbungano ngokuti vaiti muprofeti. ⁶ Asi apo zuva rokuberekwa kwaHerodhi raguma, mwanasikana waHerodhiasi wakazvina pakati pavo, naye wakadakadza Herodhi. ⁷ Ndizvo iye wakagondisa ngokupika mhiko kuti unozomupa kunyazwi chiinyi chaaizokumbira. ⁸ Naye echiangiridzwa ndimai ake, wakati, “Ndipe panapa muchidziyo soro raJohani Mubhabhatidzi''. ⁹ Namambo wakakurudzwa; asi ngendaa yokupika kwake, nendaa yaavo vaigara naye panokudya, wakapanga kuti rihinwe kwaari. ¹⁰ Naye wakatuma kuti Johani agurwe soro mutirongo. ¹¹ Nesoro rakaunzwa riri muchidziyo rikapuwa kumusikana, naye wakariunza kunamai ake. ¹² Nevadzidzi vake vakauya vakatora muiri wake, vakauika, navo vakaenda vakaronzera Jesu. ¹³ Zvinopano Jesu azwa izwi wakabvapo ngengarava kuenda kundau iri yega ari ega. Naapo mbungano yazwa ndizvo, yakamuteera ngetsoka, yechibva kumadhorobha. ¹⁴ Naye wakabuda akaona mbungano huru, wakavazwira urombo naye wakaponesa vairwara vavo. ¹⁵ Kwakati aamadeekoni vadzidzi vake vakauya kwaari vechiti, “Panapa muri pandau iri yega nomukuwo watopera zvinopano. Ndizvo chiparadza mbungano kuti vaende mumaguta vadzitengere zvokudya''. ¹⁶ Asi Jesu wakati kwavari, “Avasisiri kuenda; vapei imwimwi zvokudya''. ¹⁷ Navo vakati kwaari, “Panapa tine zvingwa zvishanu zvega nehove mbiri''. ¹⁸ Naye wakati, “Zviunzenyi panapa pendiri''. ¹⁹ Naye wakapanga mbungano kuti igare pashi pamwenje, atora zvingwa zvishanu nehove mbiri, wakaringira mudenga, akazvibonga, akazvigura, akazvihina kunevadzidzi, nevadzidzi vakahina kune mbungano. ²⁰ Navo veshe vakadya, vakaguta, navo vakatonhera matsekeneswa ezvaiwarakatika vakazadza zvitundu gumi nazviiri. ²¹ Naavo vakadya vaiya vanoda kuita mazana makumi mashanu evamuna, ngepabanze pevakadzi nevana. ²² Paripo iye wakaronzera vadzidzi vake kuti vapotere mungarava, vatungamire kuambuka ruseri, achiendesa mbungano. ²³ Naapo aendesa mbungano, wakakwira pamutunhu ari ega kookumbira. Kwoita madeekoni waiya aripo ega. ²⁴ Asi zvinopano ngarava yaiya yaane mastadhia akawanda kubva kuhumbikumbi, yechikandirwa apo naapo ngemafungu, ngokuti dutu raipesana navo. ²⁵ Panguva yokurinda yechirongomuna yousiku iye wakauya kwavari, echihamba padera peruandhle. ²⁶ Asi vadzidzi vechimuona echihamba padera poruandhle vakatyiswa vechiti, “Idzimudzangara.” Navo vakadaidzira ngokutya. ²⁷ Asi paripo Jesu wakaereketa kwavari echiti, “Shingai, ndini hangu, musatya''. ²⁸ NaPetro wakamupingura echiti, “Mambo, kuti uriwe, ronza kuti ndiuye kwouri padera pemvura''. ²⁹ Naye wakati, “Uya.” Naapo Petro adzaka kubva mungarava, wakahamba padera pemvura kuuya kunaJesu. ³⁰ Asi echiona dutu rine simba rechipesana naye, wakatya; naye echitanga kudzemera, wakadaidzira echiti, “Mambo, ndiponese''. ³¹ Asi paripo Jesu wakatambanudza nyara yake, akamubata, akati kwaari, “Iwewe unokutenda kudoodoko, wagononda ngenyi?” ³² Kwakati apo vakwira mungarava, dutu rakaterama ³³ Naavo vaiya mungarava vakamudira, vakati, “Ngegwinyiso iwewe uri Mukororo waMwari''. ³⁴ Naapo vakaambuka ruseri vakaguma munyika yeGenesareta., ³⁵ Naapo vanhu vomunyikamwo vamuzia, vakaziisa munyika mweshe, vakaunza kwaari veshe avo vaiya nenhenda. ³⁶ Navo vakamupota kuti ava vatenderwe kwega kubata mupendero wegauni rake. Naavo veshe vakaubata vakaponeswa yaamho.