Ndima 1
1
Jakobe, muranda waMwari newaMambo Jesu Kristu, ndinonyorera kumadzinza gumi nemairi akapararira, ndinomuchingamidza.
2
Hama dzangu, apo mwogumirwa ngekuedzwa kwembeu zhinji, musakuerenga kuita chiro asi kudakara.
3
Ngekuti munozia kuti kuedzwa kwekugonda kwenyu kunobara kusengerera.
4
asi kushingiriranga kudzadiskwe nemushando wakaperera, kuti muite vakaperera vabva muzero, musikatami chiro.
5
Kudai aripo umwe wenyu unotama ungwaru, ngaakumbire kuna Mwari, uwo unopa kunevanhu veshe ngokuwanzisa, asikatongi, waanopa, kunozopuwa kwaari.
6
Asi ngaakumbire ngekugonda, asikagonondi, ngokuti uwo unogononda wakadai ngefungu yeruandhle, rinosundwa ngedutu nokukandirwa apo neapo.
7
Uwo munhu asakarira kuti unozoashira chiro kubva kunaMambo;
8
munhu unemipfungwa miiri unotsanduka-tsanduka munjira dzake dzeshe.
9
Asi hama iri pashi ngaidakare ngekukudzwa kwayo,
10
negurudza ngaridakare ngokuninipiswa kwaro, ngokuti gurudza rinozopinda kudai ngeruva romwenje.
11
Ngokuti zuva rinobuda pamwepo nokupisha kwaro, rinoomesa mwenje; neruva rawo rinowa pashi, nounaku hwaro hunopera. Ndizvo zvinoita gurudza; rinozonyangarika munjira dzaro.
12
Unomuchena munhuwo unoshingirira mukuedzwa. Ngokuti apo aedzwa unozoashira dzungudza rokupona rakagondiswa kwavari vanomuda.
13
Munhu apo aedzwa asaronza kuti, “Ndinoedzwa ndiMwari”, ngokuti Mwari aangakoni kuedzwa ngezvakashata, zve, aaedzi munhu kunyazwi ngouri.
14
Asi munhu weshe unoedzwa apo ookweyiwa ngokuemura kwake nokunyengererwa.
15
Ndizvo apo kuemura kwamera mimba, kunobara kushaisha, nokushaisha apo kwakura, kunobara rufu.
16
Musachengedzerwa, hama dzangu dzinodikanwa.
17
Zvipo zveshe zvakanaka, nezvipo zveshe zvakaperera, zvinobva mudenga, zvechidzaka kubva kunaBaba vokujeka, kwaari akuna kutchinja nokuti kabvuri kokukunukuka.
18
Ngokuda kwake ena wakatibara ngeizwi regwinyiso, kuti tiite kudai ngemichero yekutanga yezvakasikwa zvake.
19
Munofanira kuzwisisa izvi, hama dzangu dzinodikanwa: munhu weshe ngaakasire
kuzwa, anonoke kureketa, anonoke kunyangadzwa.
20
Ngokuti kunyangadzwa kwomunhu akushandi kururama kwaMwari.
21
Ndizvo mwechirasha tsvina yeshe nokushata kunofashukira, muashire ngekupfaa izwi rakasimwa, rine simba rekuponesa mweya yenyu.
22
Asi itai vaiti veizwi, haiwa vanozwa kwega mwechidzichengedzera.
23
Ngokuti kudai Muzwi weizwi, asiri muiti waro, uyu wakadai ngomunhu unoningira hope yake yechibarirwe muchiboniboni.
24
Ngokuti unodziona pachake, orooenda, paripo unoiyarwa chiemo chaanacho kuti chakaitawani.
25
Asi uwo unoningira mupango wakaperera wekusunhurika, echiangira kudaro, asikaiti unozwa echiiyarwa, asi muiti wemushando, uyu munhu unozopfumiswa muzviito zvake.
26
Kudai aripo munhu unokarakadza kuti mudiri, naye asikakoni kubata rurumi rwake, asi unochengedzera mwoyo wake, kudira kwake munhu uyu akuna shwiro.
27
Kudira kwakaperera nokusikazi kusvipiswa pamberi paMwari wedu naBaba ndikwo uku, kuhambira nherera neshirikadzi mukutambudzika kwavo, nokudzingwarira kuti asasvipiswa ngezvenyika.