¹ Imwimwi vaGaratia mapenzi! Ndiani wakamuroya? Imwimwi pamberi pemadziso enyu Jesu Kristu wakaoniswa pambhene akakohomerwa pamuchinjiko! ² Chiro chega chendinoda kuzwa kubva kwemuri ngeichi: Mwakaashira Mweya ngemushando yeMupango here nokuti ngekugonda zvemwakazwa? ³ Muri mapenzi akadai here? Mwakatoamba ndiMweya, zvino mwogumisira ngenyama here? ⁴ Mwakatambudzikira zviro zvakawanda kudaro pasina shwiro here? Kudai zvakadaro ngegwinyiso pari pasina shkwiro. ⁵ Ndizvo uwo unomupa Mweya, echishanda mushamiso pakati penyu, unozviita ngemushando yeMupango here nokuti ngokuzwa mwakagonda? ⁶ Kudai ndiAbrahama “Wakagonda Mwari, nakwo kwakaerengerwa kwaari kuti ndikwo kutendeka.” ⁷ Ndizvo munoona kuti avo vanogonda ndivo vana vaAbrahama. ⁸ Nezvinyorwa zvechiona ngepamberi kuti Mwari waizopembedza vemadzinza ngekugonda, zvakachumaira vhangeri kuretu kunaAbrahama zvechiti, “Mweuri madzinza eshe anozopfumiswka.” ⁹ Ndizvo avo vekugonda vanofumiswa pamwepo naAbrahama uwo wainga nekugonda. ¹⁰ Ngokuti veshe avo vanogonda mushando yeMupango vari pashi pechituko, ngokuti kwakanyorwa kuti: “Wakatukwa weshe usikangwariri zveshe zvakanyorwa mubhuku reMupango kuti azviite.” ¹¹ Zvino zviri pamhene kuti apana munhu unopembedzwa ngeMupango pamberi paMwari; ngokuti, “Uwo wakarurama unozopona ngekugonda.” ¹² Asi Mupango autseyami pakugonda, ngenjira imweni, “Kunyazwi ndiani unoita mushando yeMupango unozopona ndiyo.” ¹³ Kristu wakatiripira kubva pachituko cheMupango, ena waitwa wakatukwa ngendaa yedu; ngokuti kwakanyorwa kuti: “Wakatukwa weshe unoturikwa pamuti''. ¹⁴ Kuti munaKristu Jesu chifumiso chaAbrahama chiuye padera pevemadzinza, kuti tiashire chigondiso cheMweya kubudikidza ngekugonda. ¹⁵ Hama, ngemuedzaniso wendaramo yemazuva eshe, akuna munhu ungaita chitenderano chevanhu kuti chiite chisina shwiro kunyazwi kututsira kwechiri apo chatosimiswa. ¹⁶ Zvino zvigondiso zvakaitwa kunaAbrahama nokunemubarirwana wake; azvironzi kuti, “Nokumibarirwana'', kuronza yakawanda, asi chinoti, “Nokumubarirwana wako'', ndikwo kuti, kumunhu umwe, ari Kristu. ¹⁷ Chendinoronza ngeichi: Mupango wakauya mazana marongomuna nemakumi matatu emakore karetu achingaiti kuti chiite chisina shkwiro chitenderano chaiya chakaemeswa ndiMwari karetu, kuti chigondiso chaMwari chikorere. ¹⁸ Ngokuti kudai nhaka yechipuwa ngokungwarira Mupango, aichabvi muchigondisopi. Asi Mwari wakaipa kunaAbrahama kubudikidza ngechigondiso. ¹⁹ Mupango ngewenyi? Uwo wakatutsirwa ngendaa yezvipaukwa, metsa mubarirwana uapo, uwo wakaitirwa chigondiso; nacho chakaemeswa kubudikidza ngengirosi ngomuiyanisi. ²⁰ Zvino muiyanisi azvironzi rupande rimwe akadi; asi Mwari ndiumwe ²¹ Ndizvo Mupango unorwisana here nezvigondiso zvaMwari? Haiwa! Ngokuti kudai ngezvewakapuwa Mupango unesimba rekukona kuita ruponeso ngegwinyiso kururama kwaizouya kubudikidza ngeMupango. ²² Asi zvinyorwa zvakakonyera zveshe pashi pesimba rekushaisha, kuti icho chakagondiswa kubudikidza ngekugonda munaJesu Kristu chipuwe kwavari avo vanotenda. ²³ Asi kugonda kusati kwaguma, tainga takakonyerwa pashi peMupango, metsa kutenda kwaoniswa. ²⁴ Ndizvo Mupango wakaita mudzidzisi wedu metsa Kristu auya, kuti tipembedzwe kubudikidza ngekugonda. ²⁵ Asi zvino apo kugonda kwaguma, atichiri pashi pemudzidzisi. ²⁶ Ngokuti munaKristu Jesu imwimwi mweshe muri vana vaMwari kubudikidza ngokugonda. ²⁷ Ngekuti avo veshe pakati penyu vakabhabhatidzwa munaKristu, mwakamupfeka Kristu. ²⁸ Apachina muJudha nekuti muGiriki, apachina wakasungwa nokuti wakasunhurika, apachina mwamuna nokuti mukadzi, ngokuti imwimwi mweshe muri umwe munaKristu Jesu. ²⁹ Zvino kudai muri vaKristu, muri mubarirwana yaAbrahama, muri vadyi venhaka kudai ngechigondiso.