¹ Zvino kwapera makore gumi nemarongomuna ndakakwirazve Jerusarema, pamwepo naBhanabhasi, ndikatorazve Thithusi. ² Neni ndakakwirayo ngokuti ndakaoniswa chioniso. Ndakaisa pamberi pavo vhangeri rendinochumaira pakati pemadzinza, asi ndakariisa kunevakuru vari vega ngekufishika, kuitira kuti ndaizotera kurumba nekuti ndainga ndakambotera kurumba pasina shkwiro. ³ Asi kunyazwi naThithusi uwo wainga neni, aazi kuangiridzwa kuti achekwe kunyazwi wainga muGiriki. ⁴ Asi ndakaita kudaro ngendaa yevatendi vokunyepa avo vakapotedzwamwo tisikazii, vechipoteramwo ngokufishika kuti vanengere kusununguka kwedu kwetinakwo munaKristu Jesu, kuti vatipotedze muuhloko. ⁵ Atizi kudzipfaisa kwavari, kunyazwi nepadoko, kuitira kuti gwinyiso revhangeri rigare nemwi. ⁶ Asi kubva kuneavo vainga nembiri yekuti vari vakuru kunyazwi vari vakadini, azvina ndaa kwendir. Mwari aasarudze unhu wemunhu. Avo ndinoti, vainga vanembirikira avazi kututsira chiro kwendiri. ⁷ Asi ngenjira imweni, apo vaona kuti inini ndakapuwa vhangeri kune vasikazi kuchekwa, kudai ngezvakapuwawo Petro vhangeri kunevakachekwa, ⁸ ngekuti uwo wakashanda kubudikidza ndiPetro kumuita mupostori kune vakachekwa, wakashandawo kubudikidza ndini ngokunditumira kune vemadzinza. ⁹ Apo Jakobe, Khefasi naJohani, avo vaizwi ndivo madzeyo vakazia nyasha idzo dzakapuwa kwendiri, vakatibata inini naBhanabhasi ngenyara dzekumudyo ngeukama, kuti isusu tiende kunevemadzinza, navo vaende kunevakachekwa. ¹⁰ Chiro chimwe chega chevakatironzera kuti tikarakadze ngevarombo. Icho chindainga ndei disisa kuita inini. ¹¹ Asi apo Khefasi aguma Antiokhi, ndakamuphikisa pamberi pehope yake, nge kuti wainga anendaa pachake. ¹² Ngekuti vasati vaguma vanhu vamweni vechibva kunaJakobe, ena waidya pamwepo nevemadzinza. Asi apo vaguma, wakanyongoroka akadzipaura, akagara ega pachake, ngokuti waityka chikwata chevakachekwa. ¹³ Nevamweni vaJudha vakadziitisawo kudai ndiye; kunyazwi naBhanabhasi wakapaukiswawo ngekudziitisa kwavo. ¹⁴ Asi apo ndaona kuti avazi kuhamba ngokururamisa, kudai ngegwinyiso revhangeri, ndakati kunaKhefasi pamberi pavo veshe, “Kudai iwewe kunyazwi uri muJudha, asi unogara kudai ngevari vemadzinza, haiwa kudai ngezvevanoita vaJudha, unovaangiridza ngenjiraiyi vemadzinza kuti vagare kudai ngevaJudha.” ¹⁵ Isusu pachedu tiri vaJudha ngechibarirwe, haiwa vemadzinza vashaishi. ¹⁶ Asi techizia kuti munhu aapembedzwi ngemishando yeMupango, asi kubudikidza ngokugonda munaKristu Jesu, isusu nesu takatenda muna Kristu Jesu, kuti tipembedzwe ngokugonda munaKristu, haiwa ngokuita mishando yeMupango, ngekuti akuna naumwe ungazopembedzwa ngemushando yeMupango. ¹⁷ Asi kudai, taitsvaka kupembedzwa munaKristu, isusuwo temene takaoneka tiri vashaishi, ndizvo Kristu waamushandi wekushaisha here? Haiwa! ¹⁸ Asi kudai ndechizoakazve izvo zvendakaparadza, ndinodzionisa kuti ndiri mupauki. ¹⁹ Ngokuti inini kubudikidza ngeMupango ndakafa kuneMupango, kuti ndipone kunaMwari. ²⁰ Ndakakohomerwa pamwepo naKristu, asi andinipi ndichapona, asi ndiKristu unopona mukati mwangu. Nendaramo yendinopona zvino munyama, ndinopona ngokugonda kuri kunoMwana waMwari, uwo wakandida, akadzipira ngendaa yangu. ²¹ Andingarambi nyasha dzaMwari, ngekuti kudai kupembedzwa kwechizounzwa ngeMupango, ngekudaro Kristu wakatera kufa pasina shKwiro.