¹ Phauri mupostori - andizi kutumwa ndechibva kuvanhu nekuti kubva kumasimba evanhu, asi kubudikidza ndiJesu Kristu naMwari Baba, uwo wakamumusa kubva kwavakafa - , ² nehama dzeshe dzineni, Kuzviara zveGaratia. ³ Nyasha kwemuri nekunyarara zvinobva kunaMwari Baba edu nekuna Mambo Jesu Kristu, ⁴ uwo wakadzipira pachake ngendaa yezvishaishi zvedu, kuti atinunure kubva munguva ino yakashata, kudai ngekuda kwaMwari wedu naBaba. ⁵ Kwaari ngaugare utswene mhesa nariini nariini. Ameni. ⁶ Ndinoshamiswa kuti mwakasira kutiza kubva kwaari uwo wakamudaidza ngenyasha dzaKristu nokuenda kunerimweni vhangeri. ⁷ Haiwa kuti ririyo vhangeri rimweni, asi kuti variyo vamweni vanomunzeremusa, vanoda kupausa vhangeri raKristu. ⁸ Asi kunyazwi tisu, nokuti ngirosi inobva mudenga, ikachumaira kwemuri vhangeri rakaparadzana neiro retakachumaira kwomuri, ngaitukwe! ⁹ Kudai ngezvetakaronza kare, ndinoronzazve kudaro zvino kuti, kudai aripo munhu unochumaira kwemuri vhangeri rakaparadzana neiro remwakaashira, ngaatukwe! ¹⁰ Ngokuti inini zvino ndinotsvaka kudiwa ngevanhu here, nokuti kudiwa ndiMwari? Nokuti ndinoedza kudakadza vanhu here? Kudai ndainga ndichadakadza vanhu, ngekudaro andingaiti muranda waKristu. ¹¹ Ngokuti inini ndinoda kuti muzie, hama, kuti vhangeri rakachumairwa ndini, rainga risiri revanhu. ¹² Ngokuti andizi kuriashira kubva kumunhu, nekuti kuridzidziswa, asi rakauya kwendiri kubudikidza ngekuoneswa ndiJesu Kristu. ¹³ Ngokuti mwakazwa ngegwinyiso ngendaramo yangu yenguva yakapinda, mukudira kwevaJudha. Inini ndakatambudza chiara chaMwari ngenjira inopinda binzo yaamho, ndaedza kuchiparadza. ¹⁴ Neni ndakapinda vanhu vazhinji vendanga yangu mukudira kwevaJudha, pakati pevanhu vedzinza rangu, ndechivapinda kukuru mukungwarira mishuma yemadzibaba angu. ¹⁵ Asi apo Mwari, uwo wakandiketa wakandiemesa ndisati ndabarwa, akandidaidza kubudikidza ngenyasha dzake, wakadakadzwa, ¹⁶ kuti aonise kwendiri Mwana wake, kuti ndichumaire ndiye pakati pevemadzinza; paripo andizi kupangana nounenyama nengazi, ¹⁷ nokuti andizi kukwira Jerusarema kuneavo vaiya vapostori kutangira inini, asi paripo ndakaenda Arabhia, ndorondo hwirirazve Dhamasekusi. ¹⁸ Zvino kwapera makore matatu ndakakwira Jerusarema koomusa Khefasi, ndakagara naye mazuva gumi nemashanu. ¹⁹ Asi andizi kuona vamweni vapostori, ngepabanze paJakobe munukuna waMambo. ²⁰ Muneizvo zvendinonyora kwemuri, pamberi paMwari andinyepi. ²¹ Zvino ndakaenda kunharaunda yeSiria neyeSirisia. ²² Ndainga ndisikaziikanwi ngehope kunezviara zveJudhia zvaiya muna Kristu; ²³ asi vakazwa zvega kuti: “Uwo waititambudza, zvino waakuchumaira ukwo kutenda kwaakamboedza kuparadza.” ²⁴ Navo vakakudza Mwari kubudikidza ndini.