¹ Veshe vari varanda pasi pejoko, ngavati vatenzi vavo vanofanirwa nekukudzwa kweshe, kuti zita raMwari nedzidziso zviregere kuhungurwa. ² Avo vana vatenzi vanotenda, ngavaregere kuvazvidza zvedziri hama, asi zvikuru ngavavabatire, zvavari vatendi nevanodikanwa vanobatsirwa nekubata kwavo kwakanaka. Dzidzisa zvinhu izvi, uzviraire. ³ Kana kunomunhu unodzidzisa imwe dzidziso, asingabvumiri mashoko akatendeka, mashoko aShe wedu, Jesu Kristu, nedzidziso inofambirana nekunamata Mwari, ⁴ unozvikudza, asingazii chiro, asi unokarira mubvunzo nenharo dzinomusa godo, negakava, nekutuka, nekufungidzira kwakaipa, ⁵ nekukakavadzana kusingaperi kwevanhu vanomurangariro wakapodzwa, vakatorerwa chokwadi, vechiti kunamata Mwari ndizvo zvinopfumisa. ⁶ Asi kunamata Mwari pamwechete nekugutsikana nezvatinazvo ndizvo zvinopfumisa kwazvo. ⁷ Nokuti atina kuuya nechiropanyika, hatigonivo kubuda tine chiro. ⁸ Kunze kwazvo, kana tine zvokurha nezvokufuka, tichatenda nazvo. ⁹ Asi vanotsvaka kupfuma, vanowira mukuedzwa nemumusungo, nemukuchiva keupenzi kuzhinji kunokuadza, zvinonyudza vanhu mukuparadzwa nekurashwa. ¹⁰ Nokuti kuda mari ndiko midzi wezvakaipa zveshe; vamweni vakati vechiida zvikuru vakatsauswa pakutenda, vakazvibaya neshungu jinji. ¹¹ Asi iwewe, munhu waMwari, tiza zviro izvi. Uteere kunasa nekunamata Mwari, nekutenda, nerudo, nokutsungirira, nounyoro. ¹² Urwe kurwa kwakanaka kekutenda, ubatisise upenyu usingaperi, wawakadanirwa kwabwuri, ukapupura kupupura kwakanaka pamberi pe zvapupu zvijinji. ¹³ Ndinokuraira pamberi paMwari, unopa zviro zveshe upenyu wazvo, nepamberi paKristu Jesu, wakapupura kupupura kwakanaka pamberi paPontio Pirato; ¹⁴ kuti uchengete murairo, usina chaungapomerwa, kusvikira pakuonekwa kwaShe wedu, Jesu Kristu; ¹⁵ kwaachazoratidza panguva dzake,ena ega wakaropafadzwa newamasimbaose, Mambo wamadzimambo, Ishe wamadzishe. ¹⁶ Ena ega usingafi, unogara pachiedza chisingakoni kuti munhu akwedere kwachiri; usina kumboonekwa nemunhu, uye usingakoni kuonekwa; kukudzwa nesimba risingaperi ngazvive kwaari. Ameni. ¹⁷ Reketera vafumi panyika apa, kuti varegere kuzvikudza, kana kuvimba nepfuma isingagari, asi naMwari, unotipa zveshe echiwanza, kuti tifare nazvo. ¹⁸ Kuti vaite zvakanaka, vave vapfumi pamabasa akanaka, vafarire kupa vamwe, nokugovana. ¹⁹ Vazvirongedzere nheyo dzakanaka dzenguva inouya, kuti vabatisise upenyu chaiwo. ²⁰ Timotio, chengeta icho chewakapiwa, ufuratire kutaura kusinehanya naMwari nokuramba kunobva pazivo inonzi zivo. Dziri nhema hadzo. ²¹ Iyo yakapupurwa nevamweni, vakazorashika pakutenda. Nyasha ngadzive nemwi.