¹ Kubazhibalula bantu kulibonzha ku beendelezhi alimwi u ku basololi, kubateelela, u kubachitila milimo yoonse mibotu, ² kutabi naaba womwi ngu batuka pe, kutazandisha kulwa, pele babe bashichamba, balitondezhe kulibonzha ku muntu woonse. ³ Kaambo aswe lwesu tubeni twakaakuli balimbushi alimwi batateeleli. Twakatolwa munzhila imwi u kuchitwa buzhike mushiyanza shinji shinji alimwi umu misobano imwi. Twakaakukala mu bubiyabi alimwi u munyono. Kabatatufwini aswe twakaakusulene umwi u mweenzhiina. ⁴ Pele lelyo iswezha monzo lyaka Leza alimwi u lufwuno lwakwe nilyakabulika ku bantu, ⁵ keetali milimo ya bululami yezho njitwakachita pe, pele kaambo ka luse lwakwe lolo ndwaakatufwutulila mo, kwiita mukusanzhiwa mu buzhale bupiya alimwi u kubukulushiwa ku moza usalala, ⁶ wezo Leza ngwaakakununa mu bunji aali uswe kwiita mu mufwutuli wesu Jeso Kilisito, ⁷ kwaamba ati uswe tululamikwe kwiita mu luse lwakwe, kwaamba ati uswe tukabe bakona lulangilo lwa bumi butamana. ⁸ Wezu mulumbe mwini mwini. Ndazanda kwaamba ati u shaambishe shintu sheshi, kwaamba ati babo bakashoma mwa Leza balangishe u kulyaaba lwabo beni kuchita milimo mibotu. Sheshi shintu nshibotu alimwi shilayohwa ku muntu woonse. ⁹ Pele kukake kukashanya kwa bulimbushi kwa mazhalane u kuzwangana alimwi u kukazhanya sha mulawo. Shesho shintu shiina impindu alimwi nsha bulyo. ¹⁰ Mukake kufwumbwa wezo uleta lwaandaano akati kenu, wamana kumuchenjezha komwi naa kobile, ¹¹ zhiba kwaamba ati muntu uli bobo wamuhwa munzhila ili kabotu alimwi watalika kuchita bubi alimwi walibisha bisha kale mwini. ¹² Awo ndakamutuma Antimasi naaba Tayikikasi kwako, u kafwambaane kuzhiza ku Nikopolisi nkwimbele, koko nkwindasala kwaamba nkale nkuko chiindi cha mweto. ¹³ Chita kufwumbwa nchuulozha kubatuma ba Zenasi shi mulawo alimwi u Apolosi mulweendo lwabo, kwaamba ati kukabule chibashupa. ¹⁴ Bantu besu balyeelele kwiiya kulibika lwabo beni mu milimo mibotu kwaamba bachilozhe kupa awo azandika, kwaamba kutabi chiina impindu. ¹⁵ Boonse babo mbutuli abo balamwaanzha. Baanzhe babo batufwini mu lushomo. Luse alube kwenu noonse.