¹ Pele uwe, amba checho cheelela malailile ashinizhe. ² Balailile bakando babe bantu bashitikile, balemu, balitelaisha lwabo beni, alimwi baluleme mu lushomo, mu lufwuno, alimwi u mulukakatilo. ³ Munzhila njiyona ili bolya, bayiishe bakaintu bakando bakwate bumi bubotu, bataakwaamba shintu shibiyabi ku beenzhinokwabo nikuba kuba bazhike ku waini ukola, pele babe bamaayi ba shintu shibotu, ⁴ alimwi bayiishe bakaintu bachili bana kufwuna balumi abo alimwi u kufwuna banabo, ⁵ babe balitelaisha beni, basalala, babamba maanda abo kabotu, alimwi baakuteelela chaamba balumi abo, kwaamba ati izwi lyaka Leza litabi nili sampaulwa. ⁶ Mbubona bobo, bazumye zumye balombwana bachili bana babe batelekele. ⁷ Choonse chiindi ulitondezhe lwako u mwini kuba chitondezho cha milimo mibotu. Mukuyiisha kwako, tondezha kushininzha, u bulemu, ⁸ alimwi mulumbe ushinizhe u takazhiwa, kwaamba woonse wezo u kukazha afwe insoni lwakwe mwini kaambo bayina nchibakonzha kwaamba chibiyabi aali uswe. ⁹ Bazhike balyeelele kulibonzha kuli bashimatwangaabo mushintu shoonse, bababotezhe alimwi kutali kukazhanya abo pe, ¹⁰ kutabebila pe, pele bulyo babe batondezha kushomeka mushintu shoonse, kwaamba ati munzhila ili buti u buti balete bubotu kushiiyo shaka Leza mufwutuli wesu. ¹¹ Luse lwaka Leza lwakabulika kwiza kufwutula bantu boonse. ¹² Chechi chilatuyiisha uswe kukaka bumi bwakutapona u Leza alimwi u kuzandisha sha luundu, pele kupona bumi bwa kulichindulula, bululeme, bu leza bulapona mu musela wezu, ¹³ lelyo nituchilangila kuya kutambula bulangizhi bobo bulongezhe, mbububoneka bulemu bwa Leza mukando alimwi u mufwutuli wesu Jeso Kilisito. ¹⁴ Jeso wakalyaaba lwakwe mwini nkutubele kwaamba ati a tununune uswe kuhwa ku bubiyabi boonse u kutusalazha kwaamba tube bantu bakwe bazandisha kuchita milimo mibotu. ¹⁵ Shaambe shintu sheshi, bazumye zumye bantu kuchita bobo, alimwi u bachindulule u kubalemanina chansana. Kutabi muntu u kunyansha pe.