¹ Inzho mungelo wakantondezha mulonga wa meenzhi a bumi, alasweya. Mulonga kokunka kuvwa ku chuuna cha bwami bwa Leza u Mwanambelele ² kwiita akati ka tuzhila twa mu munzhi. Koonse koonse kumabali a mulonga kakuli isamu lya bumi, lyeezha mishobo ya michelo ili ikumi u itwesha yobile, alimwi lileezha michelo lyoonse a mwezhi. Matuhu avwa kwisamu alasebezhiwa kushilika bantu. ³ Kuchiina linji kushinganyiwa. Chuuna chabwami bwa Leza u Mwanambelele chilakuli mu munzhi, alimwi basebezhi bakwe balaka mumanina milimo. ⁴ Balakabubona bushu bwa Leza, alimwi izhina lyakwe lilakalembwa ankumu shabo. ⁵ Kuchiina linji nikukaaba mashiku; niliba izuba kubala nkaambo Mwami Leza ulakabamunikila. Balakendelezha lyoonse u lyoonse. ⁶ Mungelo wakaamba kwangu ati, ''Aza mazwi alyelele kushomwa alimwi meni meni. Mwami, Mwami wa myoza ya bashinshimi, wakamutuma mungelo ku musebezhi wakwe kumutondezha shintu shelele kuchitika ndilyona.'' ⁷ ''Bona! Ndakwiza chakufwambaana! Ngushichoolwe wezo u tobela mazwi abushinshimi bwe buka leli.'' ⁸ Ume ndi Johani, ndime ndakatelela ukubona shintu sheshi. Nindakatelela ukubona, ndakawila anshi kwaamba nkombe ku matende a mungelo wakuntondezha sheshi shintu. ⁹ Wakan'gambila ati, "Utachiti checho! Ame ndimusebezhi, u bashinshimi banyoko, u babo batobela mazwi avwa mwibuka leli. Komba Leza!'' ¹⁰ Amane wakaamba kwangu ati, ''Utahumba mazwi a bushinshimi bwa mwibuka leli, ukuti chiindi chili afwaafwi. ¹¹ Wezo utasalali, nomuleke atolelele kuchita shitasalali. Wezo shimuchita shibi atolele mushibi. Wezo ululeme, natolele kuchita shiluleme, aze wezo u salala, natolele kuba u salala.'' ¹² ''Bona! Ndakwiza chakufwambaana. Shipo shangu ndishikwete, shakupa umwi uumwi kwendelana u milimo yakwe. ¹³ Ndime Alufa u Omega, mutaanzhi u mushlizhi, makankilo u mamanino. ¹⁴ Bali u choolwe babo basanzha shikobelo kwaamba bahumizhiwe kulya kwisamu lya bumi alimwi ukunjila mu munzhi kwitila mu milyango. ¹⁵ Ansengwe ali babwa, balozhi, bashimamambe, bayazhi, bashikukomba mituni, u babo boonse bazandisha kwaamba twaambo twakuchenga. ¹⁶ Ume, ndi Jeso, ndatuma mungelo wangu kupa bumboni kuli umwe makani a sheshi shintu sha shikombelo. Ndime muzanda u lunungu lwa Davida, Intongwezhi imweka ya chifumo. ¹⁷ Moza u nabwinga baamba, ''Kweza'' Amuleke wezo utelela aambe, ''Kweza'' Kufumbwa ufwile inyotwa, nomuleke ashike, alimwi u wezo uzandisha, nomuleke anwe meenzhi a bumi. ¹⁸ Ndapa bumboni kuli wezo woonse watelela mazwi a bushinshimi bwebuka leli: Kuti umwi wazungila ko, Leza ulakazungila ku mapenzhi alembelwe mwibuka leli. ¹⁹ Kuti umwi wakusha kuvwa mwibuka leli lya bushinshimi, Leza ulakakusha kuchabilo chakwe kwisamu lya bumi u mu munzhi u salala ulembelwe mwibuka leli. ²⁰ Wezo upa bumboni kushintu sheshi waamba, ''Eee! Ndakwiza chakufwambaana.'' Ameni! Kweza, Mwami Jeso! ²¹ Luse lwa Mwami Jeso lube amwe noonse. Ameni.