¹ Amane kuzhalwa Jeso mu Betelehemu waku Judeya ku mazuba aka Mwami Helodi, Balombwana basongo bahwa kwiwe bakashika ku Jelusalemu baamba ati, ² Ulikwi wezo wazhalwa Mwami waba Juda? Tweebona intongwezhi yakwe kwiwe twezhiza kumukomba." ³ Lelyo Mwami Helodi naakateelela bobo, wakapengana, uba mu Jelusalemu boonse. ⁴ Helodi wakoompolola boonse antoomwi bapayizhi bakando u balembi ba bantu,amane wakababuzha, "Ulikwi Kilisito uu kazhalwa?" ⁵ Bakaamba kwakwe ati, "Ku Betelehmu waku Judeya, ukuti nchichechi nchakalembwa u mushinshimi, ⁶ 'Pele uwe, Betelehemu, muchishi cha Juda, sa indiwe mushoonto akati kabaleli baba Juda, u kuti mwako mulakahwa umwi uulela, wezo uukakeembela bantu bangu bamu Izilaili." ⁷ Ngoonaawo Helodi wakoompolola balombwana bayiile kubabuzha chiindi chini chini intogwezhi niyakalibonya. ⁸ Wakabatuma ku Betelehemu, waamba ati, "Kamuya mukakapule kabotu kabotu mwana mushoonto nkwaabele. Mwakamuyana, mundetele makani kwaamba ati Ame ndukuya nkamukombe." ⁹ Nibakamana kumuteelela mwami, bakakanka kuya buya, intongwezhi njibakaakubwene kwiwe yakaakuya abo mpaka niyakashika yakazhima awo mwana ngaakakubele. ¹⁰ Lelyo nibakeebona intongwezhi, bakabotelwa chakubotelwa kukando. ¹¹ Bakanjila mung'anda babona mwana u Maliya baina. Bakawa anshi bakamukomba. Bakayalula nshibakatola u kumupa shipo sha ngolida, utwakununkilizha tukwete muulo mukando. ¹² Leza wakabachenjezha muchiloto kwaamba batapiluka kwa Helodi, bakapiluka kuchishi chakwabo kusebezha izhila iimwi. ¹³ Awo nibakaya, angelo wa Mwami wakamubulikila Jozefu muchiloto waamba ati, "zhimuka, mubweze mwana u baina, ulukankile ku Ijipiti. Ukakale kolya Mpaka nkakushimwine, kaambo Helodi ukalakapula mwana kwaamba amuzonaune." ¹⁴ Azo mashiku Jozefu wakazhimuka wabweza mwana u baina waya ku Ijipiti. ¹⁵ Wakakala kolya kushikila naakafwa Helodi. Chechi chilazuzukizha checho chakaamba Mwami kwiitila mushinshimi, kwaamba ati, "Kuhwa mu Ijipiti Ndoompolola mwanangu." ¹⁶ Awo Helodi, lelyo naakabona kwaamba bamulimbusha balya balombwana basongo, wakalemana chini chini. Wakatuma wayaya boonse bana beembezhi babo bakaakuli mu Betelehemu alimwi u mubusena boonse bakaakukwete myaka yobile kuya munshi, kuhwa kuchiindi checho nchakaakutelaikila kuhwa ku balombwana basongo. ¹⁷ Awo chakazuzukizha checho chakaamba mushinshimi Jelemiya, kwaamba ati, ¹⁸ "Izwi lyakateelelwa mu Lama, kukwiila u kulila kunji kunji, Lachelo wakalila banakwe, wakakaka kuumbulizhiwa, kaambo kwakabulila limwi." ¹⁹ Lelyo Helodi naakafwa, ngoonaawo angelo wa Mwami wakabulika muchiloto kwa Jozefu mu Ijipiti waamba ati, ²⁰ "Zhimuka bweza mwana u baina wamana ukuya kunshi yaku Izilaili, kaambo babo baakukapula bumi bwamwana bamana kufwa." ²¹ Jozefu wakazhimuka, wabweza mwana u baina, wakaya kunshi ya Izilaili. ²² Pele lelyo naakateelela kwaamba ati Achelasi nguulela mu Judeya mubusena bwakaushi Helodi, wakatiya kuya ko. Naakamana Leza kumuchenjezha muchiloto, wakaya kubusena bwaku Galili ²³ wakaya kukala mumunzhi mukando wa Nazaleta. Chechi chilazuzukizha chakaambwa kwiita mubashinshimi, kwaamba ulakatewa ati muna Nazalini.