¹ Ibuka lyabuzhalwe bwaka Jeso Kilisito, mwanakwe Devidi, mwanakwe Abulahamu. ² Abulahamu wakazhala Iyizeki, Iyizeki wakazhala Jakobo, Jakobo wakazhala Juda u banina. ³ Juda wakazhala Pelezi u Zela ukwa Tama, Pelezi wakazhala Heziloni, Heziloni wakazhala Lamu. ⁴ Lamu ngu wakazhala Aminadabu, Aminadabu wakazhala Nashoni, Nashoni wakazhala Salumoni. ⁵ Salumoni ngu wakazhala Bowazi kwa Lahabu, Bowazi wakazhala Obedi kwa Lute, Obedi wakazhala Jese. ⁶ Jese ngu wakazhala Mwami Devidi. Devidi ngu wakazhala Solomoni ku mwinakwe Uliya. ⁷ Solomoni ngu wakazhala Lehobowamu, Lehobowamu wakazhala Abija, Abija wakazhala Asa. ⁸ Asa ngu wakazhala Jehoshafati, Jehoshafati wakazhala Jolamu, Jolamu wakazhala Uziya. ⁹ Uziya ngu wakazhala Jotamu, Jotamu wakazhala Ahazi, Ahazi wakazhala Hezekiya. ¹⁰ Hezekiya ngu wakazhala Manase, Manase wakazhala Amoni, Amoni wakazhala Josiya. ¹¹ Josiya ngu wakazhala Jekoniya u banina kuchiindi nibakatandwa kuhwa ku Babuloni. ¹² Nibakamana kutandwa kuhwa ku babuloni, Jekoniya ngu wakazhala Shetewu, shetewu ngu wakazhala Zelubabelu. ¹³ Zelubabelu ngu wakazhala Abiwudi, Abiwudi,wakazhala Elikimu, Elikimu wakazhala Azo. ¹⁴ Azo ngu wakazhala Zadoki, Zadoki wakazhala Achimu, Achimu wakazhala Eliwudi. ¹⁵ Eliwudi ngu wakazhala Eliyeza, Eliyeza wakazhala Matani, Matani wakazhala Jakobo. ¹⁶ Jakobo ngu wakazhala Jozefu mulumi Maliya, momo mwaakazhalwa Jeso, utewa ati Kilisito. ¹⁷ Woonse mazhalane kuhwa kwa Abulahamu kushikila kwa Devidi kaali ikumi umazhalane one, kuhwa kwa Devidi kuya ku kutandwa kuhwa ku Babuloni ikumi umazhalane one, alimwi kuhwa ku kutandwa kuhwa ku Babuloni kushika kwa Kilisito ikumi u mazhalane one. ¹⁸ Kuzhalwa kwaka Jeso Kilisito kwakachitika bolya. Baina, Maliya, wakaakutangilwe kutwalwa kwa Jozefu, pele kabatana kuba antoomwi, wakayanwa ulimishi ku moza usalala. ¹⁹ Pele Jozefu, waakuli mulumi, kali mulombwana mululami amana katazanda kwaamba amuubaule, ubobo wakazanda kumuleka kumali. ²⁰ Kachitelaika ku twaambo totu, mungelo wa Mwami wakalibonya kwakwe muchiloto, waamba ati, "Jozefu mwanakwe Devidi, utabi nuutiya mubweze Maliya abe mwinako, kaambo wezo uu mitilwe mwakwe wakamita umoza usalala. ²¹ Ulakazhala mwana mweembezhi, amana mulakamwita izhina ati Jeso, kaambo ulakahwuna bantu bakwe kuhwa kushibi." ²² Inzho choonse chechi chakachitika kuzuzukizha checho chakaambwa kuhwa Mwami kwiita mu mushinshimi, kwaamba ati, ²³ "Bona, kamwale ulakamita amana ulakazhala mwana mweembezhi, alimwi balakamwita izhina lya Emanuweli"---lyalo lipandululwa ati, "Leza uli aswe." ²⁴ Jozefu naakashinshimuka kuhwa mutulo wakachita mbubona angelo wa Mwami mbwaakamushimwina, wakamubweza kuba mwinakwe. ²⁵ Pele nikuba bobo katamwizhi kushikila lelyo naakatumbuka mwana mweembezhi.Amane wakamuulika izhina ati Jeso.