¹ Jemusi musebezhi wa Leza alimwi u Mwami Jesu Kilisito, ku mishobo ili ikumi iitwesha yobile isabangene ndamwaanzha! ² Chambotela, nubakwesu, chiindi nimwiita mu mapenzhi manji manji. ³ Mulizhi kwaamba ati kusunkwa kwa lushomo lwenu kulaleta kuzhibila ukukakatila. ⁴ Amjuleke kukakatila kumanizhe milimo kwaamba umwe muvwilile ukumaninina, kutabulizha nichiba chomwi. ⁵ Pele kuti na umwi wenu ulazanda busongo, amumuleke akumbile kwa Leza, walo uupa chalumwemwe alimwi ukwiina ukubasinsa babo bamulomba, uninzho ulamupa wezo. ⁶ Pele aalombe mu lushomo, chakutazumbauzha. ⁷ Ukuti oonse wezo uzumbauzha ulakozhanya umankwishita ali mu lwatele atonkwa u muuwo ukuzhingulushiwa. Wezo muntu atabi natelaika kwaamba ulakonzha kutambula kuvwa ku Mwami; ⁸ ulikwete mizeezo itashitikile, tasuumrnr munzhila shakwe shoonse. ⁹ Amuleke munyokwenu wiina nchakwete abotelwe, ¹⁰ Pele aze muhubi mukufwiinshiwa kwakwe, nkaambo ulafwa ukoya iluba lili mubwizu. ¹¹ Ukuti izuba lilabala ukuleta ibangabanga litenta bwizu. Iluba lilawa anshi alimwi ubwebeshi bwalyo bulamana. Mbubona bobo aze muhubi ulafwa mushinzo wakwe kochili akati kati. ¹² Ngushichoolwe wezo uzuma mu masunko. Ukuti amana kwazunda masunko, ulakatambula mushini wa bumi, wakashomezhiwa kuli babo bamuzanda Leza. ¹³ Kutabi muntu waamba chiindi nasunkwa ati, "Ndasunkwa kwa Leza," nkaambo Leza wiina nasunkwa ku bubi, naaba walo lwakwe kusunka muntu. ¹⁴ Pele muntuoonse ulasunkwa kushizandishi shakwe, shalo shimukwela ukumubotezha. ¹⁵ Shamana shisushi kumita, chilazhala chibi, alimwi chamana kukomena chibi, chilazhala lufwu. ¹⁶ Mutachengwa nubafunwa bakwesu. ¹⁷ Choonse chipo chibotu alimwi chipo chiluleme chilavwila kwa Leza. Chilavwila ku muzhali wesu wa mimuni. Walo wiina na chincha njkuba kusanduka ukoya chinvule. ¹⁸ Leza wakasala kutuzhala kwiita mwiizwi lya lushinizho, kwaamba tukabe mushobo wa michelo mitaanzhi ya shilenge shakwe shoonse. ¹⁹ Mulizhi aza, nubafunwa bakwesu: Amuleke woonse muntu afwambaane kutelela, amuke kwaamba, alimwi amuke kulemana. ²⁰ Ukuti bukali bwa muntu tabumana bululami bwa Leza. ²¹ Ubobo amukushe shoonse shisushi sha bubi alimwi u shesho shoonse shileta chibi. Mukulifwiinsha amulitambule izwi lishangilwe, lyalo lionzha kufutula myoza yenu. ²² Aube bashi kucita batali bapupulazhi buyo, kwiita mukuchengana. ²³ Ukuti na muntu waba buyo mu pupulazhi utali shikuchita , ulikozhenye u mulombwana umwi ulilanga muchimboni. ²⁴ Ulalilanga mu chimboni amane waya ndilyona waluba mbwalibonya. ²⁵ Pele ku muntu walo ulangisha mulawo mubotu wa lwanguluko, amane watolelela kuchita bobo, kutali buyo mu puppulazhi uluba, wezu mulombwana ulakalongezhiwa mu michito yakwe. ²⁶ Kuti nakuli utelaika ati walo mukombi amane wiina nakwata mulaka wakwe, ulachenga mozo wakwe alimwi bukombi bwakwe tabukuli bwa nchobeni. ²⁷ Bukombi bwini bwini alimwi ubwiina kampenda ku bushu bwa Leza alimwi ushesu kwaamba ayovwe babo baina maushabo alimwi u ba muka bafu mu mapenzhi abo, alimwi ukupa muntu kwaamba abule kapenda nkaambo ka luundu.