¹ Paulu, mutumwa--kutali mutumwa kuhwa ku bantu nikuba kubikwa u muntu unji, pele kwiita mwa Jeso Kilisito u Leza taata, walo wakamubusha kuhwa kubafwu-- ² ulimwi u bakwesu boonse bali ame, bakushikombelo shaku Galantiya: ³ Luse lube kwenu u luumuno luhwa kwa Leza ushesu ulimwi u Mwami Jeso Kilisito, ⁴ walo wakalipa mwini ukaambo kashibi shesu kwaamba alozhe kutunununa uswe kuchibi chamusela wezu, kwiingayina uluzando lwa Leza wesu Taata, ⁵ u kwakwe akube bulemu lyoonse u lyoonse. Amen. ⁶ Ndazoowa kuyana mwakuhwa chakufwaambaana kwakwe wezo wakamoompolola kwiita muluse lwaka Kilisito. Ndazoowa mwaya kubuyiishe bunji bwamulumbe, ⁷ kutali kwaamba ati kuli mulumbe unji, pele kuli bamwi balombwana u bakukuletela manyongwe ubazanda kuchincha mulumbe waka Kilisito. ⁸ Pele nikuba kuti uswe na angelo uu hwa kwizeulu aambe mulumbe kwenu utali wezo ngutwakamushimwina, nashinganyiwe. ⁹ Umbona mbutwakamwaambila kale, uninzho awa ndaamba alimwi, "kuti umwi waamba mulumbe kwenu utali ngumwakatambula, nashinganyiwe." ¹⁰ Sa ume ninzho ndakapula kuboshezha bantu na Leza? Naa kuti nchisoleka kubotezha bantu? Nakuti nchisoleka kubotezha bantu, Nshili muzhike waka Kilisito. ¹¹ Kaambo ndazanda umwe muzhibe, nubakwesu, kuti mulumbe ngu ndakamushimwina tooli mulumbe wa muntu. ¹² Ndiina indakauyana ku muntu, naa kushimwinwa pe. Pele, kachili chizubuluzho chaka Jeso kuli ume. ¹³ Mwakaateelela aa bumi bwangu bwakale kale bwachi Juda, u buli mbunda kaakupenzha shikombelo shaka Leza u kusoleka kushizonauna. ¹⁴ Ndakaakuchita bobo muchi Juda kubaala bamwi babo bakaakuli bamusela wangu, kuhwa mwini ku bantu bangu. Mbubobo mwini mbundakaakubele ndakaakuzandisha batunshiya nshiya twa maushesu. ¹⁵ Pele Leza, wakansala kuhwa mwifwu lyaka baama, walo nguwakang'ompolola kwiita muluse lwakwe, wakabotelwa ¹⁶ kwaamba azubulule Mwanakwe mwangu, kwaamba Ume mukambauke akati kabahwa Mashi, Ubobo kufwaambaana ndiina indakabuzha ku muntu bulyo na bulowa. ¹⁷ Ndiina indakaya ku Jelusalemu kuli babo bakaakuli batumwa ume chintana kuba. Pele, Ndakaya ku Alebiya mane ndakapiluka ku Damasikasi. ¹⁸ Lelyo nikwayita myaka yotatwe ndakabweela ku Jelusalemu kwaamba nkamuzhibe Kefasi u kukala Aze mazuba aali ikumi umazuba osanwe. ¹⁹ Pele Ndiina indakabona naaba omwi mutumwa chita Jemusi, munina Mwami. ²⁰ U kuli nshindamulembela, Ndamushomezha kwa Leza nshibeyi. ²¹ Mane ndakaya kubusena bwa Siliya uku Silisiya. ²² Awo nchitana kuzhibwa kubushu bwashikombelo ku Judeya babo bakaakuli mwa Kilisito. ²³ Kabateelela bulyo nichaakwaambwa, "Mulombwana wakaakutupenzha uninzho ulakambauka mulumbe mubotu lushomo ndwaakaku soleka kumwaya.'' ²⁴ Ngaawo bakatembaula Leza kaambo kangu.