¹ Nubana, amulemeke bamuzhele mu Mwami, kaambo chechi nchichili kabotu. ² "Lemeka bauso u banoko" (wezu ngu mulawo mutaanzhi uli u chishomezho)' ³ "kwaambaati shibe kabotu kwako amana upone kwa chiindi chilafwu ano anshi." ⁴ Nubazhali, mutabi nimubishizha banenu kushika kukulemana. Pele, a mubakuzhe mumulawo alimwi u muluyiisho lwa Mwami. ⁵ Nubazhike, amubombe ku bashimatwanga enu kwiingayina u mubili u bulemu bubaala u chakuzhangama, kuhwa kunshi ku monzo wako. Amubabombele mbubona mbuubombela Kilisito. ⁶ Amubabombele lyoonse kutali lelyo shimatwangaako naakubwene, kutewa mubabotezhe pe. Pele, amubombe ukoya bazhike baka Kilisito, wezo uchita luzando lwaka Leza kuhwa ku monzo wakwe. ⁷ Sebeza u monzo wako woonse, ukoya usebezela Mwami kutali bantu, ⁸ kaambo tulizhi kuti kufwumbwa checho muntu chibotu nchaachita ulakatambula bulumbu kuhwa ku Mwami, naakaba muzhike naa utali muzhike. ⁹ Nubashimatwanga, amubabambe bazhike benu munzhila yomwi njiyona. Mutabi nimubakonga. Mulizhi kuti wezo aze ngushimatwangaabo mbubona amwe uli kwizeulu, amana kwiina lwaandaano kwakwe ¹⁰ Kumanizha, amuzume mu Mwami alimwi u munsana shakwe ikando. ¹¹ Amubike shakusama shankondo shaka Leza, kwaamba ati mukalozhe kuzhima kumakanze aka shatani. ¹² Kaambo kulwisha kwesu takuli kwakulwisha mubili nibuba bulowa, pele kaambo ka baleli, u kaambo ka beendelezhi, u bashinsana ku mushinze wezu, u kunsana shamyoza mibiyabi kumasena a kwizeulu. ¹³ U bobo amubike shoonse shilwisho shaka Leza, kwaamba mukalozhe kuzhima kumazuba mabiyabi, awo mwakamana kuchita sheshi shoonse, kuti muzhime nchi. ¹⁴ Inzho amuzhime nchi, u lutambo lwa bwini mulwaange muchibuno chenu, alimwi mwamana kubika chisamwa chaachamba cha bululami, ¹⁵ alimwi, u matende enu mabike kabotu alibambile kuli checho chizhiza kuhwa kumulumbe wa luumuno. ¹⁶ Mushiindi shoonse amubweze intobo ya lushomo, muli nchicho mulakakonzha kuzhima mihwi ihwilima yaka wezo mubiyabi. ¹⁷ Lufwutuko lwenu alube u koya chifwuse chakulikwabilila alimwi iicheba lya Moza, lyalo ndizwi lyaka Leza. ¹⁸ Kukomba koonse u kukumbila, amukombe kuchiindi choonse mu moza. Kumamanino aza, lyoonse amukwatishe chakukakatila lelyo nimukomba ku bantu boonse baka Leza basalala. ¹⁹ Alimwi amunkombele ame, kwaamba mulumbe upewe kuli ume lelyo Ume ndayalula mulomo wangu. Amukombe kwaamba ati Ume chizhibwe kwakubula bukandu maseseke a bwini amulumbe wezu. ²⁰ Kaambo ka mulumbe wezo Ume nchindi muzhiminizhi walo mwaange muncheetani, kwaamba ati Ume nkaambe chakutafwa bukandu, mbubona mbwindozha kwaamba. ²¹ Tayichikasi, mukwesu mufwunwa alimwi mushomeshi musebezhi mu Mwami, ulakamushimwina shoonse, kwaamba mukezhibe shabuponi bwangu. ²² Ume ndamutuma kwenu u kaambo kachecho, kwaamba mukezhibe mbutupona, alimwi kwaamba ati akazumye zumye myonzo yenu. ²³ Luumuno alube ku bakwesu, alimwi u lufwuno lwa lushomo luhwa kwa Leza Tatesu alimwi u Mwami Jeso Kilisito. ²⁴ Luse alube kuli babo boonse bafwini Mwami Jeso Kilisito u lufwuno lwiina kampenda.