¹ Nuba shimatwanga, amupe bazhike benu checho chili kabotu alimwi chiluleme, kaambo amwe mulizhi kwaamba ati mulikwete shimatwangeenu kwizeulu. ² Amukwatishe u kutolelela mukukomba, mupakamane muli nchicho u kupa kulumba, ³ a mutukombele noonse antoomwi, kwaamba Leza ayalule mulyango kuli uswe kwizwi, tubandike maseseke aka Kilisito, u kaambo kako Ume ndakaakuli mwaange u macheni. ⁴ Amukombe kwaamba ati Ume mpandulule bweelele, lelyo Ume ndaakwaamba. ⁵ A mweende cha busongo kuli babo bakunze, kwaamba muchisebezhe kabotu chiindi chenu. ⁶ Mazwi enu lyoonse naabe a luse. Abe malamushi mabike mwino, kwaamba muzhibe mbumweezhi kwiingula muntu uli woonse. ⁷ Kushintu shoonse shesho shaamba makani angu, Tikikasi ulakamuzhibya shoonse. Wezu mukwesu nakufwunwa, musebezhi ushomeka, muzhike nokwesu mu Mwami. ⁸ Ume ndakamutuma kwenu kaambo ka chechi, kwaamba mutuzhibe twaambo tumwi twaamba uswe, kwaamba azumye zumye myonzo yenu. ⁹ Ndakamutuma antoomwi u Onesimasi, mukwesu ushomeka nakufwunwa, walo nguwa bamwi benu. Balakamushimwina shoonse shesho shaka chitika kono. ¹⁰ Alisitakasi, ngutwaangilwe aze, u lamwaanzha, alimwi u Maako ulamwaanzha, munina Banabasi (Kuli wezo nkumwakatambula malailile; a kashika kwenu, mukamutambule), ¹¹ alimwi aze Jeso utewa ati Jusitasi. Baba balo beni bapalule mbuba shimilimoma ba bwami bwaka Leza. Kabankalika chamba lyoonse. ¹² Epafulasi u lamwaanzha. Walo nguwa bamwi benu alimwi muzhike waka Kilisito Jeso. Ulamuzhibaluka lyoonse mukukomba kwakwe, kwaamba ati muzhime chakumaninina mukushomezhiwa muluzando lwaka Leza. ¹³ Ume ndapa bumboni kwaamba ati ulasebeza chasana kaambo kenu, kuli babo bali ku Lawodekiya, alimwi u babo ku Hilapolisi. ¹⁴ Luka mufwunwa mushilishi alimwi u Demasi balamwaanzha. ¹⁵ A mubaanzhe bakwesu mu Lawodekiya, alimwi u Nipa, alimwi u chikombelo checho chili mung'anda mwakwe. ¹⁶ Awo lolu lukalata lwakabalwa akati kenu, a lukabalwe alimwi u muchikombelo cha bantu baku Lawodesiya, alimwi u kabone kwaamba ati lwabalwa lukalata kuhwa ku Lawodekiya. ¹⁷ Amumushimwine Akipasi ati, "Kwatisha kumulimo wezo ngwaakatambula mu Mwami, kwaamba ati ulyeelele kuuzuzukizha." ¹⁸ Koku kwaanzha kwaita mwitashi lyangu---ndi Paulu.Amutelaike incheetani shangu. Luse alube amwe.