¹ Paulu, mwa apositolo waka Kilisito Jeso kwiita mu luzando lwaka Leza, u Timoti mukwesu, ² ku bantu bakwe Leza basalala u bakwesu bashomeka mwa Kilisito babo bali ku Kolose. Luse a lube kwenu, alimwi u luumuno luhwa kwa Leza u shesu. ³ Tulapa kulumba kwa Leza, Ushi Mwami wesu Jeso Kilisito, alimwi lyoonse tulamukombela. ⁴ Twakaluteelela lushomo lwenu mwa Kilisito Jeso alimwi u lufwuno lolo ndumukwete ku bantu boonse baka Leza basalala, ⁵ kaambo ka lulangilo lubambilwe umwe luli kwizeulu, lolo ndumwakateelela lwaamba izwi a lya bwini, mulumbe ⁶ wezo wa kashika kwenu. Munzhila yomwi njiyona wezu mulumbe ulaya bweezha muchelo alimwi u laya bukomena muluundu loonse---mbubona mbuchakaakubele akati kenu kuhwa kubuzuba bobo nimwakaliteelela u kuzhiba luse lwa Leza mubwini. ⁷ Wezu inguwe mulumbe mbubona mbumwakayiya kuhwa kwa Epafulasi, mufwunwa musebezhi nokwesu, musebezhi mushomeshi waka Kilisito kwiita mwesu. ⁸ Epafulasi wakatuzhibya lufwuno lwenu mu Moza. ⁹ U kaambo ka lufwuno lolu, kuhwa ku buzuba nitwakachiteelela chechi twiina nitwakachileka ku mukombela. Tulakomba kwaamba ati mukazuzhiwe luzhibo lwa luzando lwakwe mu busongo boonse alimwi u kuteelelesha mu moza, ¹⁰ kwaamba ati mulozhe kweenda mu muzeezo wezo mulemu mu Mwami alimwi wezo u mubotezha kufwumbwa inzhila: kweezha muchelo mu mulimo woonse mubotu alimwi u kukomena mu luzhibo lwaka Leza, ¹¹ u kuzumizhiwa kunsana shoonse, kwiingayina u masana masana a bulemu bwakwe, kwaamba mukwate lulangilo lukando alimwi u bushichamba, amana u mukusapwa ¹² kupa kulumba kwa Tatesu, wezo wakamuchita kulozha kuyana chaabilo mukukona mumuni wa bantu baka Leza basalala. ¹³ Wakatukusha kuhwa kunsana shamushinze u kututola ku bwami bwa Mwanakwe nakufwunwa, ¹⁴ mwalo mwakwe mutukwete lununuko, u lulekelelo lwa shibi. ¹⁵ Walo nchichinkozha cha Leza u tabonwa, ngumuzhale mutaanzhi kushilenge shoonse. ¹⁶ Kwiita mwakwe shoonse shintu musha kalengelwa, u shesho shili mwizeulu alimwi u shesho shili anshi, u shibonwa alimwi u shintu shitabonwa. Nishiba shuuna shabulemu nikuba insana naaba ifwulumede nikuba baleli, shoonse shintu shakalengwa kwiita mwakwe alimwi nshakwe. ¹⁷ Walo lwakwe mwini uli a shintu shoonse, alimwi mwakwe shoonse shintu shili kwatene antoomwi. ¹⁸ Walo ngu mutwi wa mubili, u chikombelo. Ngumatalikilo, ngumuzhale mutaanzhi a kati ka bafwu, u bobo ulikwete busena butaanzhi a kati kashintu shoonse. ¹⁹ Leza wakabotelwa kuleta boonse buzulile kuba mu Mwanakwe, ²⁰ alimwi kwiita mu Mwanakwe a kayanzanye shoonse shintu kwakwe mwini, naakamana kuleta luumuno kwiita mubulowa bwakwe achichinkano, nikuba shintu shili ano anshi nikuba shili mwizeulu. ²¹ Kuchiindi chimwi mwakaakusakene alimwi u kuba bashinkondonina Leza mu mizeezo alimwi u mumichito mibiyabi. ²² Pele ninzho wakamuzhololola kwiita mu mubili wakwe kwiita mulufwu kwaamba mukatolwe kwakwe mulasalala, bayina kampenda, alimwi u bubiyabi boonse kumbele lyakwe, ²³ Naakuti nchobeni mwatolelela mulushomo, mwalibamba u kuzhima nchi, chakutazungaana kuhwa ku lulangilo lwa mulumbe wezo ngumwakateelela, wezo wakakambaukwa ku muntu woonse wakalengwa anshi yezeulu. Wezu ngu mulumbe wezo walo Ume, ndi Paulu, kuba mutwanga wakwe. ²⁴ Uninzho Ume ndabotelwa mu mapenzhi angu kaambo kenu, alimwi Ume ndazuzha mumubili wangu checho chibulile kukupenzhiwa kwaka Kilisito u kaambo kamubili wakwe, chalo nchi chikombelo. ²⁵ Nku kako ku chikombelo Ume nchindakabela mutwanga wakwe, kwiingayina u kumusebezela Leza koko nkundakapewa kaambo kenu, kuzuzukizha izwi lya Leza. ²⁶ Aza ngumaseseke azo a kaakusesekelwe ku misela u misela pele ninzho azubululwa ku bantu baka Leza basalala. ²⁷ U kuli mbabo Leza wakazanda kubika atuba buhubi bwa bulemu bwa maseseke aza akati kabahwamashi, kaambo ka Kilisito uli mwenu, lulangilo lwa bulemu. ²⁸ Tulamukambauka, u kuchenjenzha muntu woonse alimwi u kuyiisha muntu woonse ku busongo boonse, kwaamba ati tukatole woonse muntu wachizhiba muli Kilisito. ²⁹ Kuchechi Ume ndasebeza alimwi u kukakatila kwiingayina insana shakwe shesho shisebeza mwangu munsana.