¹ Nikwakaita mazuba ali osanwe, Ananiyasi mupaizhi mukando, bamwi bakando kando umwambilizhi wachikombelo wakutewa Tetulusi bakaya kolya. Babo balombwana bakaleta milandu yaka Paulu ku mukando wa nkambe. ² Lelyo Paulu nakazhima kumbele lya mukando wa nkambe, Tetulusi wakatalika kumulengelezha kwaamba ku mukando wa nkambe, "Nkaambo kako tulikwete lumuno lukando, alimwi kubona kwako kumbele kulaleta buchinche bubotu ku chishi chesu; ³ ubobo kulumba tulakutambula ushoonse nshuchita, kwambisha Felikisi. ⁴ Kwaamba intakukwatilili linji, ndakulomba mu luse lwako ututelele uswe ashoonto. ⁵ Ukuti twayana kwamba wezu mulombwana mupuka alimwi ngushinikizha ba Juda kwamba bazange inshi yoonse. Ngu musololi wakabunga kamwi mu Nazaleta. ⁶ Alimwi wasoleka kusofwazha chikombelo, inzho tamwaanga. ⁷ Pele Lysias, mupulisa, wakeza ukumubweza chansana kumukusha mu matashi esu, ⁸ Niwamubuzha Paulu kumazwi aza, ulakonzha kwiiya ati shoonse shintu shitumulengelezha." ⁹ Ba Juda abo bakasangana mukumubeesha, kwaamba yezhi milandu ilishinizhe. ¹⁰ Pele mukando wa nkambe nakatondezha itashi Paulo kwamba ambe, Paulu wakaingula ati, "Ume ndizhi kwaamba myaka minji wakuli mubeteshi ku chishi chechi, alimwi ndibotelelwe kwamba ndipandulule kwako ndimwini. ¹¹ Mulakonzha kuzhiba nubeni kwamba tana kwiita mazuba ali ikumi u obile nindakakwiile kukomba ku Jelusalema. ¹² Nibakanjana muchikombelo ndina kukakazhanya umuntu naba omwi, alimwi kwiina nindakambila bantu kwaamba bazange, nikuba muma sinagogu, naaba mu minzhi mikando. ¹³ Tabakonzha kupa bumboni buzulile kutwaambo ntubanengelezha ume. ¹⁴ Pele ndalyambila kwenu, mbubona mbuchezhi kuba munzhila njibaamba kwaamba kabunga, ndamanina milimo Leza wama ushesu, kushoma shoonse shintu shendelana umulawo alimwi chilembelwe mu bashinshimi. ¹⁵ Ndikwete bulangizhi mwa Leza, bwalo mbubakwete ubaba balombwana kwaamba kulakaba bubuke bwa boonse balulami uba shishibi. ¹⁶ Ubobo ndazandisha lyoonse kuba mululami kubushu bwa Leza alimwi uku bantu. ¹⁷ Inzho nikwaita myaka minji minji ndakeza kupa shipo ukupa mulumbo. ¹⁸ Ninda kachita chechi, bamwi ba Juda bavwa ku Asia bakanjana kwipobwe lyakusalazhiwa mu chikombelo, kakwiina inkamu nibaba bakukazha. ¹⁹ Balombwana baba balyelele kuba kumbele lyako bwasunu ukumpa mulandu nakuli nchubakwete. ²⁰ Ubuyo, balombwana baba balyelele kwamba chibiyabi nchikanjanina lelyo nindakazhima munkuta yaba Juda, ²¹ chita kwaamba ati chintu chomwi nchinda tapata nindakuli abo, chilamba bubuke bwa bafu nchiinda kubetekelwa kumbele lyako bwasunu.''' ²² Inzo Felikisi, wakuli mushimwine inzhila, wakabuchincha buzuba bwakupulala, wakaamba, "Chiindi Lysiasi mukando wabashilikani azhoka kuvwa ku Jelusalema, ndakalanganya kaambo kako." ²³ Amane wakambika bashilikani chansana kwamba Paulu ulyelele kusungilwa muntolongo, pele ulyelele kukwata lwanguluko kwaamba kubule naba womwi wabenzhiina ukashiwa kumutolela nchazanda ²⁴ Nikwakaita mazuba, Felikisi wakazhoka uli u Dilasila mwinakwe, wakuli mu Juda, wakatuma kwaamba Paulu ashike amane wakatelela kuvwa kwakwe makani a lushomo mwa Jeso Kilisito. ²⁵ Pele Paulu nakabandika aze makani a busalali, kuli chindulula alimwi u lubeta lushika, Felikisi wakatiya ukumwambila ati, "Koya chaninzho.Pele ndakwata chiindi kabotu ndakutumina." ²⁶ Achiindi nchichona kalangila kwamba ambweni Paulu ulamupa mali, kamoompolola lyoonse ukubandika aze. ²⁷ Pele nikwakaita myaka yobile, Poshasi Fesitasi wakaba mukando wa nkambe nakavwa Felikisi, pele Felikisi kazanda ati afunwe kuba Juda, ubobo wakamushiya Paulu ulyangilwe.