¹ Paulu, mutumwa waka Kilisito Jeso kwiita mu luzanda lwaka Leza, kwiingayina u chishomezho cha bumi bobo buli mwa Kilisito Jeso, ² kwa Timoti, mwanangu nakufwunwa: Luse, inkumbu, alimwi u luumuno luhwa kwa Leza Taata alimwi u Kilisito Jeso Mwami wesu. ³ Ume ndalumba Leza, wezo ume ngunsebezela kuhwa kuba shaakale bangu, u monzo u shitikile, mbubona mbwimutelaika mu kukomba kwangu muunza u mashiku. ⁴ Ndatelaika misozhi yenu, ndazandisha kumubona, kwaamba ati nkazule lutangalo. ⁵ Ndakaluzhibaluka lushomo lwenu lwini lwini, lolo lwa kaakuli mwankambo yenu Loyisi alimwi u nokwenu Yunisi, alimwi ndashoma kwaamba ati lulakala mu mubele amwe. ⁶ Nku kaambo kako ndamuzhibalusha kukwatisha chipo chaka Leza checho chili mwenu kwiita mukubikwa matashi angu. ⁷ Kaambo Leza wiina naakatupa moza wa bukandu, pele wansana alimwi u lufwuno u kulilemeka. ⁸ U bobo mutabi nimufwa insoni ku bumboni bwa Mwami wesu, naaba ume, Paulu, ndimwaange wakwe. Pele, a mwaabane mapenzhi a mulumbe kwiingayina insana shaka Leza, ⁹ wezo wakatufwutula u kutoompolola u bwite Busalala. Wakachichita chechi, kutali ku milimo yesu pe, pele kwiingayina u bubambe bwakwe mwini alimwi u luse, lolo ndwaakatupa mwa Kilisito Jeso kaatana kushika malengelo pe. ¹⁰ Pele lufwutuko lwaka Leza lwakazubululwa u kubulika kwa Mufwutuli Kilisito Jeso, wezo ulozha kumanya lufwu alimwi u kuleta bumi butamana mu mumuni kwiita mu mulumbe. ¹¹ Ku kaambo kachechi, ndakatumwa, kuba mutumwa, alimwi u kuba mwiiyi. ¹² Muli chechi ame ndapenga ku shintu sheshi. Pele nshifwi insoni, kaambo ndimwizhi wezo ume ngundakashoma. Alimwi ndakazhiba kwaamba ati ulalozha kubamba chechi nchaakabika mwangu kushikila ku buzuba bobo. ¹³ Amube chitondezho ku mazwi a lushinizho azo ngumwakateelela kuhwa kwangu, lushomo alimwi u lufwuno luli mwa Kilisito Jeso. ¹⁴ Shintu shibotu shesho Leza nshaakachita aali umwe, amushibambilile kwiita mu Moza Usalala, wezo u kala mukati kenu. ¹⁵ Mulizhi kwaamba ati, boonse babo bakala mu Ezha. Aali babo mbuba Figelasi u Hemogenesi. ¹⁶ Mwami a bafwile luse bang'anda yaka Onesifolasi, kaambo wakambukulusha alimwi wiina u kamfwa insoni ku bwaange bwangu. ¹⁷ Pele, mbwaakashikila bulyo ku Loma, wakankapula, amane wakanjana. ¹⁸ Mwami naa mupe kwaamba a yane luse kuhwa kwakwe ku buzuba bolya. Muzhila yezho njaakansebezela mu Efeso, mulizhi kabotu kabotu.