¹ Inzho ku makani a kuzhoka kwa Mwami wesu Jeso Kilisito alimwi lelyo twakabungana antoomwi kwaamba tukabe aze, ndamukumbila, nubakwesu, ² kwaamba ati mutabi nimuzungaana alimwi mutapengi, nikuba ku moza ulibuti naaba mulumbe ulibuti, niluba lukalata lulibonya u koya lwahwa nkutubele, ku kaambo kako kaamba sha buzuba bwa Mwami bwaamba ati bwa kashika kale. ³ Kutabi naaba womwi u muchenga munzhila niiba buti. Nikuba bobo kabutana kushika buzuba bobo bwakwaandaana u muntu shimafwunze a kazubululwa, mwana wa luzonauko. ⁴ Wezu ngushikuzumanana alimwi u lalisumpula lwakwe mwini kuhwa ku twaambo twaamba shaka Leza naaba kuli shesho shakupaila. U bobo, u lakala muchikombelo cha Leza u kulibika lwakwe mwini ati ngu Leza. ⁵ Saa tamuzhibaluka kwaamba ati Ume lelyo indakaakuli amwe ndakamwaambila shintu sheshi? ⁶ Inzho mulichizhi chechi chimukasha, kwaamba ati a kazubuluke ku chiindi checho cheelele. ⁷ Kaambo maseseke a bushimafwunze a lasebeza kale, kaambo kuli wezo walo u mukasha kasha chita lelyo a kakushiwa munzhila yezho. ⁸ Inzho shimafwunze u lakazubululwa, walo Mwami Jeso ngwaati a kayaye kuli nchaati a kakushe mu mulomo wakwe kuhwa ku buzubuluzhi bwa kuzhoka kwakwe. ⁹ Kuzhiza kwa shimafwunze wezu kulakaba kwiita mu michito yaka Shatani munsana shoonse, shitondezho, alimwi u shizoosha sha bubeshi, ¹⁰ alimwi u mishobo mishobo ya bubiyabi a kachenge babo baya kuzonauka, kaambo bakakaka kabatazanda sha bwini shibatola ku lufwutuko. ¹¹ Ku kaambo kaka Leza u lakabatumina insana sha lupyopyongano kwaamba ati bakashome sha bubeshi ¹² alimwi kwaamba ati boonse bakazonaunwe babo batakashoma makani meni meni pele bakazandisha shitali shabululami. ¹³ Pele tulyeelele kupa kulumba kwa Leza u kaambo kenu, nubakwesu nubafwunwa ku Mwami, Leza wakamusala kuba bataanzhi kuya ku kufwutulwa kwiita mukusalazhiwa u Moza alimwi u kushoma sha makani meni meni. ¹⁴ Wakamoompolola kwiita mu mulumbe wesu, kwaamba ati mukapewe bulemu bwa Mwami wesu Jeso Kilisito. ¹⁵ Inzho, nubakwesu, a muzhime nchi mwamana mukwatishe kutunshiya nshiya ntumwakashimwinwa, kwiita mwizwi naaba mu lukalata lwesu. ¹⁶ Inzho Mwami wesu Jeso Kilisito lwakwe mwini alimwi u Leza ushesu, walo wakatufwuna u kutupa kuumbulizhiwa kutamana alimwi u lushomo lwini lwini kwiita mu luse, ¹⁷ kuumbulizhiwa alimwi u kuzumya zumya myonzo yesu mu milimo mibotu alimwi u mazwi.