¹ Paulu, Silivanasi, alimwi u Timoti, kushikombelo sha Batesalonika mwa Leza Ushesu alimwi u Mwami Jeso Kilisito. ² Luse lube nkumubele alimwi u luumuno kuhwa kwa Leza Tatesu alimwi u Mwami Jeso Kilisito. ³ Tulyeelele kupa kulumba kwa Leza u kaambo kenu, nubakwesu, kaambo nchizandishi kuchita bobo, kaambo kakuti lushomo lwenu lulaya bukula chibaala, alimwi u lufwuno lulaya buhula kuli umwi umwi. ⁴ Uswe lwesu tubeni tulalyeensheensha aali umwe mushikombelo shaka Leza kubulindizhi bwenu alimwi u lushomo mu mapenzhi enu woonse, alimwi umu kupenga koko nkumwiita mumo. ⁵ Bobu mbumboni bwaka Leza ku bukosozhi bwakwe bululeme, kwaamba ati mukabalilwe kuba balemu mu bwami bwaka Leza, bobo umwe mbumupengela. ⁶ Chini chini, chililuleme kwa Leza kupilusha ipenzhi kuli babo balo bamupenzha, ⁷ mulakalyookezha umwe numupenga antoomwi aswe, lelyo Mwami Jeso a kazhoka kuhwa kwizeulu u bangelo bakwe ba shinsana ⁸ mu mulilo unhwilima, kwiza kusubula babo bamukaka Leza alimwi u babo batachilila mulumbe wa Mwami Jeso. ⁹ Balakapenga ku chisubulo chakuzonaunwa kuteeli balatandwa kuhwa ku bushu bwa Mwami alimwi u ku bulemu bwansana shakwe. ¹⁰ Ulakachita bobo lelyo a kazhoka mu buzuba bobo ulakapewa bulemu ku bantu bakwe basalala alimwi balakazoowa babo boonse bakashoma, kaambo mwakashoma bumboni bwesu mbutwakamwaambila. ¹¹ U kaambo ka chechi tulamukombela lyoonse chakutaleka, kwaamba ati Leza wesu amupe choolwe ku bwite bwenu alimwi kunsana shakwe azuzukizhe bubotu bwa mulimo wezu wa lushomo. ¹² Tulakomba bobo kwaamba ati inzhina lya Mwami wesu Jeso lilumbaizhiwe mwenu, alimwi amwe kwiita mwakwe, kwiingayina u luse lwaka Leza wesu alimwi u Mwami Jeso Kilisito.