¹ Nubafunwa, lolu ndu n'gwalo lwabili ndundamulembela, alimwi muli ngawo muli kumuzhibalusha mu mizeezo yeno ² kwaamba mukonzhe kuzhibaluka mazwi ngubakaamba ba shinshimi basalala ku mazuba akaita alimwi u mulawo wa Mwami u Mufutuli wakapewa kwiita mu batumwa. ³ Amutangune kuzhiba aza, ati bashi kasampu sampu balakeza kushinku sha melaizho. Balakasampaula kwendelana u mizeezo yabo. ⁴ Bala kaamba ati, "Chilikwi chishomezho cha buzhoke bwakwe? Kuvwa lelyo bamaushesu nibakafwa, shoonse shintu shilikozhenye, kuvwa ku malengelo.'' ⁵ Balali lubya lubya ati kale kale ati kuvwa kwizwi lya Leza izeulu iinshi shakabako kuvwa mu meenzhi alimwi kuvwa ku meenzhi, ⁶ kwalo luundu nkulwakazonaunwa, kuvwa kwizambangulwe lya meenzhi. ⁷ Kuvwa kwizwi ndilyona izeulu iinshi shili bambililwe mulilo, kulindilila buzuba bwa lubeta ukuzonaunwa kwa bantu batashomi Leza. ⁸ Mutabi nimuluba aza, nubafunwa ati, buzuba ku Mwami Leza buli ukoya shuulu sha myaka, alimwi shuulu sha myaka shili ukoya buzuba bomwi. ⁹ Mwami tamukile ku cishomezho cakwe, ukoya bamwi mbubatweluka. Pele uli mukwatilile camba. Tazandisha kwaamba naaba womwi wenu akalobe, pele kwaamba woonse muntu asanduke. ¹⁰ Ubobo, buzuba bwa Leza bulakeza ukoya muteu: Izeulu lilakamwaika umuzuzumo. Shintu shoonse shilakatentwa u mulilo, alimwi luundu u michito yoonse ilakazubululwa. ¹¹ Kuti na shintu shoonse bobo imbubo mbushikazonaunwa, anu umwe mulyelele kuba bantu bali buti? Mulyelele kukala bumi bu salala alimwi u bumi bwa buna Leza. ¹² Umwe mulyelele kubulangila buzuba bwa kwiza bwa Leza. Mu buzuba bobo, izeulu lilakazonaunwa u mulilo, alimwi shintu shilakenzunuka mwi bangabanga. ¹³ Pele kwendelana u chishomezho cakwe tulalangila izeulu ipiya iinshi impiya, mwalo mukaaba busalazhi. ¹⁴ Ubobo, nubafunwa, mbumulangila shintu sheshi, amusolekeshe kwamba mukayanwe mulasalala ukubula kampenda kumbele lyakwe, mu luumuno. ¹⁵ Ulimwi amuzhibe kwaamba kutabindaana kwa Mwami ndu lufutuko, mbubona bwakalemba mufunwa munyokwesu Paulu ukuli umwe, kwendelanya u busongo mbwakapewa. ¹⁶ Paulu ulaamba shoonse sheshi mu man'gwalo akwe, mwalo muli shintu shikatazha kushitelela. Balimbushi u balombwana batalibambile balashinyonganya sheshi shintu, mbubona mbubachita malembe amwi, kubuzonauzhi bwabo. ¹⁷ Ubobo, nubafunwa, umbuli mbumwashihibila limwi shintu sheshi ciindi kachitana kushika, amulibambe kwaamba mutazhimini nkaambo kanjiisho sha bantu baina mulawo kwaamba mulusowe lushomo lwenu. ¹⁸ Pele amukomene mu luse u luzhibo lwa Mwami u Mufutuli Jeso Kilisito. Ukwakwe kube bulemu bwasunu u mazuba oonse. Ameni!