¹ Tulazanda kwaamba muzhibe, nubakwesu, a luse lwaka Leza lolo lwakapewa kushikombelo shaku Masedoniya. ² Kuchiindi chakusunkwa kwa mapenzhi makando, bunji bwakubotelwa kwabo u bupenzhi bwabo bukando bwakaleta buhubi bukando kuhwa kunshi ku myonzo yabo. ³ Ume ndapa bumboni bwakuti bakapa shinji shinji mbubona mbubakaakulozha, alimwi u kubaala mbuli mbubakaakulozha, alimwi bakachita chakutashinikizhiwa ⁴ bakatukumbila cha monzo womwi kwaamba tukwate choolwe chakwaabana mu mulimo wezu ku bantu basalala baka Leza. ⁵ Chechi chiina nichakachitika mbuli mbutwatakaakulangila, pele bakataanguna kulipa lwabo beni ku Mwami bamane bakalipa kuli uswe kwiita mu luzando lwaka Leza. ⁶ U bobo twakamukumbila Taitasi, wezo walo wakaukanka mulimo, a kaumaninzhe wezu mulimo a kati kenu wa luse. ⁷ Pele mbuli mbumulisungulile mushintu shoonse---mulushomo, mukwaamba, mu luzhibo u mukulyaaba, alimwi u mulufwuno lwenu kuli uswe. U bobo amutolelele kuchita kabotu mu mulimo wezu wa luse. ⁸ Ume ndakaamba bobo kutali kumushinikizha pele kumusunka ku kulisungula kwenu mulufwuno kwiingayinya u kukwatisha kwa bantu bamwi. ⁹ Mbubona mbumwizhi luse lwa Mwami wezu Jeso Kilisito. Nikuba kuti kali muhubi, kaambo kenu wakaba mupushi, kwaamba ati kwiita mushintu shakwe mulakaba bahubi. ¹⁰ Uninzho mu kaambo kaka Ume ndakamupa lulayo lolo lukakamuyohwa. Mwaka womwi wayita, mwiina nimwakatalika bulyo kuchita chintu, pele mwakaakuzandisha kuchichita. ¹¹ Uninzho a muchimaninzhe, mbubona mbumwakaakuzandisha kuchichita, mbubona a muchishishe kuumaninzha, mbubona mbumukonzha. ¹² Naakuti mulazandisha kuchita yezhi michito, chechi chintu nchibotu alimwi chilatambulika. Chilyeelele kuba kwiingayina u checho muntu nchaakwete, kutali kuli checho nchaatakwete. ¹³ Koku takuli kuti bamwi balemununwe kuli umwe mukuli wa mapenzhi, pele kushiingayinya. ¹⁴ Mbumukwete shinji shinji kuchiindi cheno mulakabapa checho nchibazandisha. Chechi acho chili bolya kwaamba ati shesho abo nshibakwete shilakapewa nkumubele lelyo nimushizandisha, alimwi kwaamba ati shintu shikaingayine. ¹⁵ Chili mbubona mbu chilembelwe ati: "Wezo wakaakukwete shinji shinji kwiina u nchaakashaazha, alimwi aze wezo wakaakukwete tushoonto kakwiina u nchaakaakubula." ¹⁶ Pele kulumba kube kwa Leza, wezo wakabika mu monzo mwa Taitasi wakalyaaba mbubona Ame mbundakalyaaba kwenu. ¹⁷ Kaambo wiina naakachitambula bulyo checho nchitwakamulailila, pele aze kali shikulyaaba kuli nchicho. Wakashika kwenu mukuzanda kwakwe mwini. ¹⁸ Twakamutuma u mukwesu wezo akati ka shikombelo shoonse ku mulimo wakwe wakukambauka mulumbe. ¹⁹ Kutali bulyo chechi, pele aze wakasalwa mu shikombelo kuba shikweenda nokwesu ku mulimo wezu wa luse, checho chakaletwa aswe ku bulemu bwa Mwami lwakwe mwini u kuzandisha kwesu. ²⁰ Tatuzanda kwaamba bantu batulengelele alimwi u kutongauka nitwaaba shipo sha luse shesho nshitukwete. ²¹ Tulabambilila kuchita kabotu, kutali bulyo ku Mwami, pele u ku bantu ako. ²² Alimwi tulatuma umwi mukwesu babe abo. Twakamusunka munzhila shinji shinji twakamuyana kwaamba ati ulalozha kushakuchita shinji shinji. Alimwi ulabaala kuzandisha ninzho u kaambo ka lushomo ndwaakwete mwenu. ²³ Kuli aka Taitasi, mulongwaangu alimwi musebezhima kuli umwe. Ku bakwesu, mbatumwa bakahwa mushikombelo. Mba bulemu bwaka Kilisito. ²⁴ Amubatondezhe lushomo lwenu, amana amutondezhe kushikombelo ku kaambo kako nkutulyeensheensha u kaambo kenu.