¹ Nubafwunwa, mbutukwete shishomezho sheshi, atulisalazhe lwesu tubeni kuhwa kubusofwaazhi boonse bwa mubili alimwi u ku moza. Atululamike busalazhi bwesu mukutiya Leza. ² Atuyane busena mukati kenu! Kwiina naaba womwi ngutwakabishizha. Kwiina naaba womwi ngutwakaula makulo naa ngutwakachenga. ³ Takuli kumubisha bisha kuti Ume ndaamba bobo kwenu. Umbuli Ume mbundaamba kale kwaamba ati umwe muli mu myonzo yesu, kwaamba uswe tukafwe antoomwi alimwi u kupona antoomwi. ⁴ Ume ndikwete lushomo lukando mulyuumwe, alimwi u kulisumpula kukando aali umwe. Ume ndizwile luumbulizho mukati kangu. Ume ndibotelelwe nikuba mu mapenzhi esu woonse. ⁵ Lelyo nitwakashika ku Masedoniya, mibili yesu yiina niyakapumuna. Nikuba bobo, twakapenzhewa munzhila ili yoonse twakayana buzumu zumu koku u koku. ⁶ Pele Leza uzumya zumya babula insana, wakatuzumya zumya lelyo naakabulika Tayitasi. ⁷ Kakutali bulyo kubulika kwakwe koko Leza nkwaakatuzumya zumya. Pele kakuli kuzumya zumya koko tayitasi nkwaakatambula kuhwa kwenu. Wakatwaambila lufwuno lwenu lukando, umbumuusile, alimwi u kuzandisha kwenu. Ubobo Ume ndabotelwa chini chini. ⁸ Nikuba kuti lukalata lwangu lwakamuusha insoni, Ume kwiina chipenzha pe. Pele Ume ndapenga kuti naandabona kuti lukalata lwangu lwamuyazha insoni, nikuba bobo nkwakaindi bulyo kashoonto. ⁹ Inzho Ume ndabotelwa, kutali kuti umwe mwakaba iinsoni, pele kaambo insoni shenu shakamuletela kusanduka. Chakamuletela buusu bwabu leza, mapenzhi enu ayina kuba aa bulyo u kaambo kesu. ¹⁰ Kaambo buusu bwa bu leza bulaleta lusanduko lolo lutola kulufwutuko chakubula kushinshanya. Buusu bwa luundu, u bobo, bulaleta lufwu. ¹¹ Amubone busungu bukando mbubwaleta buusu bwabu leza mukati kenu. Kwabota kuzandisha kwenu kwaleta kutayaninwa kampenda. Kwakomena kubeeshiwa, bukandu bwenu, kulangila, kuzandisha, alimwi u kuzandisha kubona kwaamba bwini buchitwe! Muli shoonse mwalitondezha nubeni kuba bayina kampenda mu kaambo kaka. ¹² Nikuba ati Ume ndamulembela, Nshilembi u kaambo kashikuchita bubiyabi, naaba wezo wakapenga mububiyabi, pele nkwaamba ati kulyaaaba kwenu kulyuuswe kulyeelele kuzhibwa kwenu a bushu bwaka Leza. ¹³ Kaambo kachechi uswe twakazumizhiwa. Mukuzungila kuumbulizhiwa kwesu, alimwi twakabotelwa kubaala u kaambo kaka Tayitasi kakubotelwa kwakwe, kaambo moza wakwe wakabukulushiwa u kaambo kenu noonse. ¹⁴ Naakuti Ume ndakalyeensheensha kwakwe kaambo kenu, Ndiina indakafwa insoni. Munzhila iimwi, mbubona muli shoonse nshitwaakaamba kwenu kashili shabwini, kulyeensheensha kwesu aali umwe kwa Tayitasi kakuli kwa lushinizho. ¹⁵ Kulyaaba kwakwe kulyuumwe nkukandosha lelyo naamutelaika mukutobela kwenu noonse, mbuli mbumwakamutambula mu bukandu alimwi u kuzhangama. ¹⁶ Ume ndabotelwa kaambo ndikwete lushomo mukati kenu.