¹ Paulu, waketiwa u Kilisito Jeso kwaamba abe mutumwa mu luzando lwa Leza, u Sositenesi mukwesu, ² ku chikombelo ca Leza mucishi ca Kolinto, babo bakasalazhiwa mwa Kilisito Jeso ukutewa banamusalazhi, ubabo boonse mu masena oonse beta ezhina lya Mwami wesu Jeso Kilisito, walo inguwe Mwami wesu toonse. ³ Luse u Luumuno lube kuli umwe kuvwa kwa Leza Ushesu alimwi u Mwamiwesu Jeso Kilisito ⁴ Lyoonse ndapa kulumba kwa Leza wangu nkaambo nkaambo kenu nkaambo ka Luse lwa Leza lwalo Kilisito Jeso ndwakamupa. ⁵ Wakapa kwaamb mube bahubi mushiyanza shoose, mu myaambo alimwi u Luhibo, ⁶ mbubona bumboni bwa Kilisito mbu bwakezhibwa mbwa bwini akati kenu. ⁷ Ubobo umwe kwiina ncimubula cipo ca ku moza ciindi nimulindila kuzubululwa kwa Mwami wesu Jeso Kilisito. ⁸ Ulakamuzumya zumya kushikila kumamanino, kwaamba mukayanwe mwiina kaambo mu buzuba bwa Mwami wesu Jeso Kilisito. ⁹ Leza ulashomeka, walo wakamwiita kwaamba mube mumbungano ya Mwanakwe, Jeso Kilisito Mwami wesu. ¹⁰ Inzho ndamukumbila, nubakwesu, kwitila mwizhina lya Mwami wesu Jeso Kilisito, kwaamba noonse mutelezhanye, ulimwi kubule lwandaano akati kenu. Ndamulomba kwaamba mukamantane antoomwi iitelaishi lyomwi, u muzeezo womwi bulyo. ¹¹ Nkaambo ndakambilwa kale makani enu, nubakwesu kuvwa ku bantu bana Kilowe ati kuli mazwanga akati kenu. ¹² Ncin'gamba cakuti: Umwi uumwi wenu ulaamba ati, "Ume ndi u Paulu,'' na ati, ''Ndi u Apolosi,'' na ati, ''Ndi u Kefasi, naaba ati, "Ndi u Kilisito. ¹³ Sa Kilisito ulyapaulilwe? Sa Paulu wakakankaminwa nkaambo kenu? Sa mwakapapatizwa mwizhina lya Paulu? ¹⁴ Ndalumba Leza kwaamba kwiina wenu ngundakapapatiza, cita buyo Kilisipasi u Gayasi. ¹⁵ Ceci cakaba kwaamba kukabule waamba ati mwakapapatizwa mwizhina lyangu. ¹⁶ (Ame ndakapapatiza mukwashi wa Sitefanasi. Kunze kwa bobo nshizhi kwaamba kuli mbindakapapatiza.) ¹⁷ Nkaambo Kilisito wiina nakantuma kwaamba nkapapatize pele wakantuma kukambauka makani mabotu - umutali mu mwaambo wa busongo, kwaamba cicinkano ca Kilisito citabi nicikushiwa bulemu. ¹⁸ Ukuti mulumbe wa cicinkano ngwabulimbushi kuli babo baya kufwa. Pele ukuli babo bayakufutulwa , ninsana sha Mwami Leza. ¹⁹ Ukuti kulilembelwe ati, "Ndakazonauna busongo bwa basongo. Ndakabika ambali luzhibo lwababo basongo sha.'' ²⁰ Ulikwi muntu musongo? Ulikwi shibusongo? Ulikwi shikukazhanya wa ano anshi? Sa Leza wiina nasandula busongo bwa ano anshi kuba bulimbushi? ²¹ Nkaambo ka kuti mu busongo bwa ano anshi Leza wiina nakezhibwa, Leza wiina nakabotelwa kufutula babo bashoma kwiitila mu bulimbushi bwa kukambauka. ²² Ukuti ba Juuda balazanda shitondezho sha maleele amanaba Giliki balakapula busongo. ²³ Pele uswe tulakambauka Kilisito mukankamine cilebyo ku ba Juuda u ku bantu bakunze mbulimbushi. ²⁴ Pele kuli babo Leza mbaketa, ba Juuda u ba Giliki, tulakambauka Kilisito ati niinsana alimwi u busongombwa Leza. ²⁵ Ukuti bulimbushi bwa Leza bulabaala busongo bantu, alimwi busepweleshi bwa Leza bulabaala insana bantu. ²⁶ Amulange bwite bwenu, nubakwesu. Tabali banji akati kenu bakuli basongo kwitiila mu bunyama. Tababli banji benu bakuli bashinsana. Tabali banji akati kenu bakuli balemu ku buzhalwe bwabo. ²⁷ Pele Leza wakasala shintu sha bulimbushi sha mu luundu kwaamba aushe insoni basongo. Leza wakasala cakuli cisepweleshi mu luundu kuusha insoni ba shinsana. ²⁸ Leza wakasala shakuli anshi alimwi shesho shisampaulwa mu luundu. Ulimwi wakasala shintu shesho shitelaikwa ati shiina mulimo kwaamba shesho shibikilwe ati nshilemu shitewe ati shiina mulimo. ²⁹ Wakacita bobo kwaamba kubule muntu wanyama ukonzha kulisumpula kumbele lyakwe. ³⁰ Nkaambo ka cintu ncakacita Leza, bwasunu muli mwa Kilisito Jeso walo wakaba busongo bwesu kuvwa kwa Leza. Wakaba busalali, bululami, u lufutuko lwesu. ³¹ Ukoya mbucakaba, mbubona mbukulembelwe ati, ''Amuleke wezo ulisumpula, nalisumpulile mu Mwami.''