1 2 3 Lino vyapita vii naweni umungelo muze akwika ukufuma kwiyulu.Wali ni nsambu izikulu,nukuti insi yawalilwe nuwuchindame wakwe. Wapunzile nizwi lyamaka, ukuti, "Wapona, waponaBabiloni umukulu! Waya amasyo yakwikala imipasi iyiyipe, umwakusunjila imipasi yonsi iyikombele, nukuya umwakusunjilamo ichikombele chonsi ni vyunyi ivipatwe. Pakuti insi zyonsi zyati zimwa uwengwa wa wuchende wakwe. Yamwene ya munsi yati yachita nawe uwuchende. Yakakazya yamunsi yaya ayakankhala ukufumila mumaka ya wikazi wa wuchende wakwe." 4 5 6 Apano nuvwile nupya izwi ukufuma kwiyulu ukuti, "Fumini muli weliwe, yanthu yane, umwakuti mutize mwankhane muwononyi wakwe, nukuti umwakuti mutize mupochele nanthilimwi pa masundo yakwe. Uwonopnyi wakwe wapamphana ukukwela ngati ukwiyulu, nukuti Leza wizuka imiwombele yakwe iyiyipe. Mumuwezezye ngati vino nawe wawezezyanga ayawuze, nupya mumuliye kayili pali vino wawombanga; vino wasanzyanga muchikomkbe, musanzye ukuvula kayili kuli weliwe. 7 8 Ngati muno wayichindichilanga wenga nukwikala uwumi wa papela, mumupe ivyakumusunda ivivule ni chakumulizya. Pakuti akavwanga mumwenzo wakwe akati, 'Inthenzi ngati amwene umwanachi; Isine mufwilwe, nukuti inthalitela indolepo ukulosya.' Achino muwanda wonga amasundo yakwe yaliza: imfwa, ukulosya, ni nzala. Alimilulwa nu moto, pakuti umwene Leza uwamaka, nukuti akapingula wakwe.'' 9 10 Yamwene yamunsi yano yapanzile uwuchende nukufuma mumasunde ponga nawe yalilila nukulosya pali weliwe ndi yiza yalola ichunsi cha kwaka kwakwe. Yalimililako apatali, ukutina ukuchula kwakwe, ukuti, ''Umukosi,umukosi kumusumba uwukulu,Babiloni,umusumba wamaka! Pakuti pi ola lyonga ukusundwa kwako kwafika.'' 11 12 13 Yakakazya ya munsi ya pansi yalilila nu kulosya pali weliwe pano nawumwi wino alikala iviya vyawo nakupya-- Ivyakukazya vyakwe golide, siliva, niwe lya mutengo, imbaluti, imyenda iyitelepele, iyiyenzuluchile, siliko,ni yiyenzu, ni miti yonsi iyinunchile, ni chiya chonsi icha mphembe zya nzovu, ni chiya chonsi icha muti wa mutengo, safwali, ichela, mabo, kinamoni, ivilungo, ivyakununchizya, amafuta yakupaka, ulubani, uwengwa, amafuta, uwusu uwutelemuchile, ingano, ing'ombe ni ng'onzi, imphunda na ma gileta, nu kukazya kwa yanthu na mawumi ya yanthu. 14 Ichikomwa chino walondanga na maka yako wonsi vyafumako kuli wewe. Ivizima vyonsi ivyako vyakupulumuka vyapita, vitalitala vizanwe nakupya.