¹ Katantuluh isa haut naan teka asalni, nyalah sahaut rengei nelang sahaut dinung andri mate kami pada haut taniki kami haut pada jame kami andri tangan kami, hanye yeru itah Firman, ² pamelum yeru haut natantarang ma kami nelang haut dinung Ni. Kami haut iwara ma hanyu neu pamelum isa kalalawah, isa haut naan ibaya Amah sahaut natantarang ma kami. ³ Inun sahaut nadinung andri sahaut rengei kami yiru, sagar natahampe kami pada ma naun, ngampan takam naan pipakatan. daya kami haut naan pipakatan andri Alatalla Amah baya anak-Ni Kristus Yesus. ⁴ Katuluh yena haut na surat kami ma naun ngampan naun pada jari penu kaaraien. Takia hang wuang Piraai. ⁵ Iti habar sahaut rengei kami neu Hanye balalu palus tahampe kami hampi naun pada, piraai yeru Alatalla nelang hang wuang Hanye yeru puang uweng piiyeng. ⁶ Amun takam kaeau, takam naan pipakatan andri Hanye, kode takam welum hang wuang piiyeng, takam ipusu nelang takam puang ngaraja isa maeh. ⁷ Kode amun takam takia hang wuang piraai. takam haut naan pipakatan isa kapu isa, balalu ira Yesus Anak-Ni ngabarasis takam tekka kawan dosa. ⁸ Amun takam kaeau takam puang badosa, takam musu tenga takam raerai bulu kawan ulah gawi takam puang uweng samaeh. ⁹ Kode amun takam mangaku kawan dosa takam, Hanye sagar satia nelang adil ngampun dosa-dosa takam palus ngabarasis katuluh kahalaen takam. ¹⁰ Amun takam kaeau takam puang suah ngulah dosa, takam ngulah Hanye jari mapusu nelang firman-Ni puang baya takam.