¹ Naapo mbungano yakamanikana kuti izwe izwi raMwari, iye wakaema pagandwa reGenesareta. ² Naye wakaona ngarava mbiri dzakaema pagandwa, asi vabati vehove vaiya vabuda mungarava vechisuka nhaa dzavo. ³ Naye wakakwira kuneimweni yengarava, yaiya yaSimoni, wakamukumbira kuti aisundire mugandwa kadodoko kubva pahumbikumbi. Naye wakagara pashi, akadzidzisa mbungano ari mungarava. ⁴ Naapo apedza kudzidzisa, wakati kunaSimoni, “Sundira kwakadzama mwechidzasa nhaa dzenyu koobata hove”. ⁵ Simoni wakapingura akati, “Mambo, tashanda usiku hweshe, atizi kubata chiro! Asi ngeizwi rako ndinozodzasa nhaa”. ⁶ Naapo vaita kudaro, vakatendenedza hove zhinji, nenhaa dzavo dzaibauka. ⁷ Vakakopera vamweni vavo vaiya mungarava imweni kuti vauye vavadetsere. Navo vakauya, vakazadza ngarava dzeshe mbiri, nadzo dzakatanga kunyura. ⁸ Asi Simoni Petro aona wakadzirigira pashi pamabvi aJesu echiti, “Mambo, ibva kwendiri, ngokuti ndiri munhu wakashata”. ⁹ Ngokuti iye wakashamiswa, naavo veshe vaiya naye ngokuwanda kwehove dzevaiya vabata. ¹⁰ Ndizvo zvakaitikawo kunaJakobe naJohani, vakororo vaZebhedhi, avo vaiya shamwari dzaSimoni. NaJesu wakati kunaSimoni, “Usatya; kubvira zvinopano unozobata vanhu”. ¹¹ Naapo vaunza ngarava dzavo kuhumbikumbi, vakasiya zveshe, vakamuteera. ¹² Naapo ari munerimwe remadhorobha, penya, kwakauya munhu waiya nemapere muiri wake weshe; naapo aona Jesu, wakawa pashi ngehope yake, akamupota echiti, “Mambo, kudai wechida, ungandimhodyosa”. ¹³ Jesu wakatambanudza nyara yake, akamubata, akati, “ichi ndicho chidochangu.” Paripo mapere akapera. ¹⁴ Naye wakamupanga kuti asazoronzera munhu naumwe; asi wakati, “Enda, udzipangidzire kumupristi, upe mubairo ngendaa yokumhodyoswa kwako, kudai ngezvaakapanga Mosi, kuita chapupu kwavari”. ¹⁵ Asi mbiri yake yakaangirira kuteketeswa. Nembungano huru yakaungana pamwepo kuzwa nokuponeswa nhenda dzayo. ¹⁶ Asi iye wakadzipaura kuenda murubaya kookumbira. ¹⁷ Ngerimweni remazuva awo, Jesu echidzidzisa, vaiyapo vaFarisi nevadzidzisi veMipango vakagarapo, avo vaiya vakauya kubva kumaguta eshe eGarire, Judhia neJerusarema; nesimba raMambo Mwari rokuponesa raiya naye. ¹⁸ Apapo, vamweni varume vakaunza munhu wairwara ngokuoma muiri, ari pamusengere, navo vakatsvaka kuti vamungenese mukati nokumuradzika pamberi paJesu. ¹⁹ Vasikaoni njira yokumungenesa ndiyo mukati ngendaa yembungano, vakakwira padera vakaita buri padenga remhatso, vakamudzasa pashi ari pamusengere pakati pevanhu pamberi paJesu. ²⁰ Iye echiona kugonda kwavo wakati, “Mwamuna, zvishaishi zvako zvarekererwa kwouri”. ²¹ Vanyori nevaFarisi vakatanga kubvunzana pachavo vechiti, “Ndiani uyu unoereketa zvituko? Ndiani ungakona kurekerera zvishaishi, kwega Mwari”. ²² Asi Jesu echindozia kupinimidza kwavo, wakapingura akati kwavari, “Munobvunzana ngenyi mumwoyo yenyu;? ²³ Chiinyi chinopinda kureruka, kuronza kuti, ‘Zvishaishi zvako zvarekererwa kwouri,’ nokuti kuronza kuti, ‘Miruka uhambe?’ ²⁴ Asi kuti muzie kuti Mwana woMunhu unesimba munyika rokurekerera zvishaishi, Ndinoti kwouri, ;muruka utore musengere wako, uyende kumhatso kwako”. ²⁵ Paripo wakamuruka pamberi pavo, wakatora icho chaaiya akaata padera pacho, akaenda kumhatso yake echikudza Mwari. ²⁶ Navo veshe vakabatwa ngokushamiswa, navo vakakudza Mwari, vakazara ngokutya vechiti, “Taona zvinoshamisa nyamashi”. ²⁷ Ngesure kweizvi Jesu wakabvapo, akaona mubharisi zina rake ndiRevhi, akagara pandau yokubhadarisa muthero, wakati kwaari, “Nditeere”. ²⁸ Levi wakasiya zveshe, wakamuruka, akamuteera. ²⁹ NaRevhi wakaitira Jesu dhiri guru mumhatso yake; vaiyapo vazhinji vevabharisi nevamweni avo vaaigara navo pakudya. ³⁰ VaFarisi nevanyori vavo vakavhuruvhutira vadzidzi vake vechiti, “Munodya nokumwa ngenyi nevabharisi nevashaishi?”. ³¹ Jesu wakapingura, akati kwavari, “Avo vakapona avatami n'anga, asi avo vanorwara, ³² andizi kuuya kudaidza vakarurama akadi, asi vashaishi kuti vatenderuke”. ³³ Navo vakati kwaari, “Vadzidzi vaJohani vanogara nguwadzeshe variparutsanyo vechikumbira, ngokudarozve naavo vevaFarisi, asi vadzidzi vako vanorya nokumwa”. ³⁴ Jesu wakati kwavari, “Mungakona here kuita kuti vemhatso yanyamuroorwa vaere kurya apo mukwambo achinavo? ³⁵ Asi mazuva anozouya apo mukwambo unozoduswa kwavari, naapo vanozoera kudya ngaawo mazuva”. ³⁶ Jesu wakavaronzera muedzaniso echiti, “Akuna munhu unobaura chitembwe pajira idzva kuchitungira pajira ratsakara; echiita kudaro, unozoshaishira jira idzva nechitembwe chitsva achizotodzani nejira rakatsakara. ³⁷ Apana munhu unoisa vhini idzva mukati mwenyede dzatsakara; echiita kudaro, vhini idzva rinozoputisa nyede nevhini rinozorashika nenyede inozotsakatika. ³⁸ Asi vhini idzva rinoiswa munyede itsva. ³⁹ Zve apana munhu wakambomwa vhini rekare, paripo orooemura idzva; ngokuti unoti, ‘Rekare rakapinda kunaka''.