¹ NaJesu, azadzwa ndiMweya Wakachena, wakahwirira kubva Jorodhani, wakasundwa ndiMweya kuenda kushango. ² Wakapedza mazuva makumi marongomuna mushango echiedzwa ndiDhiabhorosi. Naye aazi kudya chiro ngaawo mazuva; naapo apera, wakafukama. ³ Dhiabhorosi wakati kwaari, “Kudai uri Mukororo waMwari, panga buwe iri kuti riite chingwa”. ⁴ Jesu wakamupingura akati, “Kwakanyorwa kuti, ‘Munhu aazoponi ngechingwa chega''. ⁵ Dhiabhorosi wakamukwidza pamutunhu, akamupangidzira umambo hweshe ngekamukuwo kadoko, ⁶ naye wakati kwaari, “Ndinozopa kwouri iri simba reshe nouthende hwazvo, ngokuti rakapuwa kwendiri, kunyazwi ngouri wendinoda ndinozomupa. ⁷ Ndizvo kudai iwewe wechizondidira zveshe zvinozoita zvako”. ⁸ NaJesu wakamupingura akati kwaari, “Kwakanyorwa kuti, ‘Unozodira Mambo Mwari wako, umushandire iye ega''. ⁹ Diabhurosi wakatora Jesu kuenda Jerusarema, akamuisa padera pechachungu cheTemperi, akati kwaari, “Kudai uri Mwana waMwari, dzikandire pashi kubva panapa, ¹⁰ ngokuti kwakanyorwa kuti, ‘Iye unozopanga ngirosi dzake ngepamusoro pako, kuti dzikungwarire. ¹¹ Nomunyara dzadzo dzinozokubata, kuti kunyazwi ngouri mukuwo usapumhunwa tsoka yako pabuwe''. ¹² NaJesu wakapingura akati kwaari, “Kwakanyorwa kuti, ‘Usazoedza Mambo Mwari, Mwari wako”. ¹³ Naapo Dhiabhorosi aiya apedza zviedzo zveshe, wakabva kwaari kwekamukuwo., ¹⁴ Jesu wakahwirira Garire ari musimba roMweya, nembiri yakateketeswa ngendaa yake munyika dzeshe dzinotendenedza. ¹⁵ Naye wakadzidzisa mumhatso dzavo dzokudira, echikudzwa ngevanhu veshe. ¹⁶ Naye wakauya Nazaretha, padhoroba raakakurira; ena wakangena mumhatso. ngezuwa reSabhatha, apapo wakamuruka kuti aerenge zvinyorwa. ¹⁷ Kwakapuwa kwaari bhuku romuprofeti Isaya. Naye wakabeura bhuku, akaona apo pakanyorwa kuti, ¹⁸ “Mweya waMambo Mwari uri padera pangu, ngokuti iye wakandidzodza kuchumaira vhangeri kuvarombo. Wakandituma kuteketesa kusunhurwa kumabhanditi nokusvinurwa madziso emapofu, kusunhura avo vakatsikirirwa, ¹⁹ kuteketesa gore rinoashirika raMambo Mwari”. ²⁰ Naye wakakonya bhuku, akarihwirinza kunemuranda, akagara pashi. Nemadziso eavo veshe vaiya mumhatso akamuringira. ²¹ Naye wakatanga kuereketa kwavari kuti, “Nyamashi ichi chinyorwa chazadzisika munzee dzenyu” ²² Veshe vakamupupurira zvakanaka, vakashamiswa ngemazwi enyasha akabva kumuromo wake; navo vakati, “Uyu andiyepi ere mwana waJosefa?”. ²³ Naye wakati kwavari, “Ngegwinyiso munozoti kwendiri ngeichi chisana kuti ‘N'anga dziponese iwewe. Izvo zvetakazwa kuti wakazviita muKhapernaume, chizviitazve panapa munyika yekwako ”. ²⁴ Wakati, “Ngegwinyiso ndinoti kwomuri, akuna muprofeti unoashirika munyika yake. ²⁵ Asi ngegwinyiso ndinoti kwomuri, vaiya vazhinji vaiya shirikadzi muIsuraeri ngemazuva aErija, apo denga rakakonywa makore matatu nemwedzi mitanhatu, kwakaita nzara huru padera penyika yeshe. ²⁶ Asi Erija aazi kutumwa kunoumwe wavo, asi kwega kuZarefathi, munyika yeSidhoni, kunedzimai raiya shirikadzi. ²⁷ Panguwa yamuprofita Erisha, Vaiyapo vazhinji vaiya namapere muIsuraeri, asi umwe ndiye akarapwa, Naamani ega muSiria”. ²⁸ Navo vakazara veshe ngoushungu vaiya mumhatso yokudira, apo vazwa izvi zviro. ²⁹ Navo vakamuruka, vakamubudisa kubanze kwedhorobha, vakamukweyera kuruwere rwomutunhu apo paiya pakaakiwa dhorobha ravo, kuti vamukandire pashi. ³⁰ Asi iye wakahamba ngepakati pavo akaenda. ³¹ Naye wakadzaka Khapernaume, dhorobha reGarire. Waivadzidzisa ngezuva reSabatha., ³² Navo vakashamiswa ngokudzidzisa kwake, ngokuti mazwi ake aiya nesimba., ³³ Mumhatso kwaiyapo munhu unemweya wedhimoni unetsvina. Naye waka daidza ngeizwiguru, ³⁴ Tinenyi isusu newe, iwewe Jesu weNazaretha? Wauya here kutiuraya? Ndinokuzia kuti urianani, ndiwe Wakachena waMwari”. ^{36 35} Asi Jesu wakadaira dhimoni akati, “Nyarara, buda kubva kwaari!” Naapo dhimoni rakamukandira pashi pakati pavo, rakabuda kwaari, risikazi kumuremadza.v 36 Vakashamiswa veshe navo vakaereketa umwe noumweni vechiti, “Izwi iri rinoronzenyi? Ngokuti unopanga mweya ine tsvina ngesimba, nayo inobuda”. ³⁷ Mbiri yake yakateketeswa munyika dzeshe dzakatendenedza. ³⁸ Naye wakamuruka kubuda mumhatso, akapotera mumhatso yaSimoni. Ambuya vaSimoni vaiya nokudziyamuiri kukuru, navo vakamupota ngepamusoro pavo. ³⁹ Jesu wakakotama ngedera kwakewakanyaradza kudziya muiri, kungadarika. Paripo wakamuruka, akavashandira. ⁴⁰ Naapo zuva roopota, avo veshe vaiya nevanorwara ngenhenda dzakaparadzana, vakavaunza kwaari; naye wakaisa nyara dzake padera poumwe ngaumwe wavo, akavaponesa. ⁴¹ Nemadhimoni akabudawo kubva kuvazhinji, echizhambarara echiti, “Iwewe uri Mukororo waMwari!” Asi wakaakaraidza, aazi kuatendera kuti aerekete, ngokuti aimuzia kuti ndiKristu. ⁴² Naapo kwaedza iye wakabuda, akaenda murubaya musina vanhu. Vanhu vakamutsvaka, vakauya kwaari vechida kumubatiridza kuti asabva kwavari. ⁴³ asi wakati kwavari, “Kunosisira kuti ndichumaire vhangeri roumambo hwaMwari mumadhorobha amweniwo, ngokuti icho ndicho chendakatumirwa”. ⁴⁴ Naye waichumaira mumhatso dzokudira dzeJudhia.