¹ Jesu wakasimuka akaringira, akaona vamfhumi vechiisa zvipo zvavo mundau yezvipo. ² naye wakaona shirikadzi yaiya murombo yechiisawo zvimapeni zviiri zvidoko. ³ Naye wakati, “Ngegwinyiso ndinomuronzera, kuti iyi shirikadzi murombo yaisamwo mare yakapinda kuwanda kupinda vamweni veshe, ⁴ ngokuti avo veshe vaisamwo muzvipo kubva pauwandu wepfuma yavo, asi iye kubva muurombo hwake waisamwo zveshe zvaanopona ndizvo”. ⁵ Naapo vamweni vachaereketa ngendaa yeTemperi, kuti rakanemeswa ngemapuwe akawanda nezvipo, iye wakati, ⁶ Hino Jesu wakati “Ngendaa yeizvi zvomunoona, mazuva anozouya naapo arizosiiwi buwe rimwe rakaturikidzwa padera perimweni risikazowiswi pashi”. ⁷ Navo vakamubvunza vechiti, “Mudzidzisi, izvi zvinozoitika riini? Chiinyi chinozoita chioniso apo zvooda kuitika? ⁸ Jesu wakati, “Ngwarai kuti musazopaukiswa; ngokuti vazhinji vanozouya ngezina rangu vechiti, ‘Ndini aye!’ Nokuti, ‘Mukuwo wakwedzera!’ Musavateera. ⁹ Naapo mwoozwa ngehondo nokumukirana, musazotyiswa; ngokuti kunosisira kuti izvi zviitike kutanga, asi magumo aasati aapasinde”. ¹⁰ Naapo wakati kwavari, “Dzinza rinozomukira dzinza noumambo hunozomukira umambo. ¹¹ kunozoapo kuzungunyika kukurutu kwenyika, nokundau dzakaparadzana nzara nenhenda, nezvinotyisa kakurutu nezvioniso zvakakura zvinobva mudenga. ¹² Asi izvi zveshe zvisati zvaitika vanozomubata, navo vanozomutambudza, vechimupira kumhatso dzokudira nomumatirongo, vechimuunza pamberi pemadzimambo nepevatongi ngendaa yezina rangu. ¹³ Iyi inozoita nguva yenyu yokuita uchapupu. ¹⁴ Ndizvo nasirirai mipinimidzo yenyu, kuti musazodembatemba ngepamberi kuti chiinyi chomunozopingura;, ¹⁵ ngokuti ndinozomupa mazwi nokungwara, akuna naumwe wemagaa enyu ungakona kurwisana nakwo nokuti kuzviemera. ¹⁶ Munozopirwa kuvatongi kunyazwi ngevabereki, vakoma, hama neshamwari, navo vanozoita kuti vamweni venyu vaurawe. ¹⁷ Nemwi munozonyenywa ndivo veshe ngendaa yezina rangu. ¹⁸ Asi akuna nekabvudzi nakamwe kesoro renyu kanozorashika. ¹⁹ Mukusengerera kwenyu munozoponesa ndaramo dzenyu. ²⁰ Asi apo mwoona Jerusarema rechitendenedzwa ngehondo, zvino ziai kuti kuparadzwa kwaro kwaapasinde. ²¹ Naapo vari muJudhia ngavatizire kumitunhu, naavo vari mukati mwaro ngavabudemwo, naavo vari kubanze munharaunda vasazopoteramwo. ²² ngokuti aya ari mazuva okuunzidzirwa, kuti zveshe izvo zvakanyorwa zvizadzisike. ²³ Hezvo kwavari vane mimba naavo vanoamwisa ngaawo mazuva! Ngokuti kutambudzika kukurutu kuchaapo padera penyika noushungu padera pevanhu ava. ²⁴ vanozowa ngokupinza kweshoti, vanozokweiwa kuita hloko kumadzinza eshe; neJerusarema rinozotsikwatsikwa pashi ngevemadzinza, metsa nguva yevemadzinza yazadzisika. ²⁵ Nezvioniso zvinozoitika pazuva, pamwedzi, panyeredzi, nepadera penyika kunozoapo kupera simba nokutyiswa ngendaa yokutinhira kworuandhle nemafungu. ²⁶ Vanhu vachapera simba ngokutyiswa apo vakaringira izvo zvinouya padera penyika; ngokuti masimba omudenga anozozungunyiswa. ²⁷ Naapo vanozoona Mukororo woMunhu echiuya mumakore anesimba nouthende hukurutu. ²⁸ Naapo izvi zviro zvootanga kuitika, ringirai mudenga mumirudze masoro enyu, ngokuti kuripirwa kwenyu kwakwedzera pasinde”. ²⁹ Jesu wakavaronzera muedzaniso echiti, “Ringirai muonde nemiti yeshe; ³⁰ kuti yaburikira mashakani, munodzionera pachenyu, nemwi munozia mwemene kuti zienza zvinopano raapasinde. ³¹ Ndizvozve, apo mwoona izvi zvechiitika, mwechizia kuti umambo hwaMwari hwaapasinde. ³² Ngegwinyiso ndinoti kwomuri, uyu mubarirwana auzopindi akadi zvisati zvaitika izvi zveshe. ³³ Denga nenyika zvinozopinda, asi mazwi angu aatongozopindi akadi. ³⁴ Asi mwechidzingwarira imwimwi kuti pamweni mwoyo yenyu ingazozvimbirwa ngokudyisa nokuraradza nokudembatemba ngezvendaramo iyi, nezuva iro rimugumire ngokukasira kudai ngechirimbana. ³⁵ Ngokuti rinozogumira padera pavo veshe avo vanogara padera penyika yeshe. ³⁶ Asi rindai nguva dzeshe, kumbirai kuti muwe nesimba rokupokonyoka kubva kuneizvi zveshe zvinozoitika, nokuema pamberi poMukororo woMunhu''. ³⁷ Masikati eshe waidzidzisa muTemperi, asi usiku waibuda kuenda kooata muDunhu remaOrivhi., ³⁸ Vanhu veshe vaifumira kuuya kwaari muTemperi koomuzwa.