¹ Ngezuva rimweni, Jesu echidzidzisa vanhu muTemperi nokuchumaira vhangeri, vapristi vakuru nevanyori nevakuru vevanhu vakauya kwaari vechiti, ² “Tironzere kuti unoita izvi ngesimba raani? Nokuti ndiani wakakupa iri simba?”. ³ Naye wakavapingura, akati kwavari, “Ininiwo ndinozomubvunza mubvunzo umwe, nemwi ndironzerei zvinopano ⁴ Rubhabhatidzo rwaJohani rwakabva mudenga here nokuti rwakabva kuvanhu?”. ⁵ Navo vakapangana pakati pavo vechiti, “Kuti tikati, ‘Rwakabva mudenga,’ iye unozoti, ‘Amuzi kumutenda ngenyi?’ ⁶ Asi tikati, ‘Rwakabva kuvanhu,’ vanhu veshe vanozotiponda ngemapuwe; ngokuti vanotenda kuti Johani waiya muprofeti”. ⁷ Navo vakapingura kuti avazi kuzia kuti rwakabva kuri. ⁸ Jesu wakati kwavari, “Neniwo andimuronzeri kuti ndinoita izvi zviro ngesimba raani”. ⁹ Jesu wakatanga kuronzera vanhu muedzaniso uyu: “Munhu wakasima munda wemivhini, akaupa kuvarimi, akaenda kunyika imweni koogareyo mukuwo wakareba. ¹⁰ Naapo nguva yaguma, wakatuma muranda kuvarimi, kuti vamupe imweni yemichero yomumunda wemivhini; asi varimi vakamurova, vakamupetudza asina chiro. ¹¹ Naye wakatumazve muranda umweni; nouwozve vakamurova, vakamubata ngenjira yaitsverudza, vakamupetudza asina chiro. ¹² Wakatumazve wechitatu, nayewo vakamukuwadza, vakamurasha kubanze. ¹³ Naapo mambo womunda wemivhini wakati, ‘Ndinozoitenyi? Ndinozotuma mukororo wangu unodikanwa; pamweni vanozomuremeredza’. ¹⁴ Asi apo varimi vamuona, vakapangana pachavo vechiti, ‘Uyu ndiye unogara nhaka; ngatimuuraye, kuti nhaka iite yedu’. ¹⁵ Vakamubudisa kubanze kwomunda wemivhini, vakamuuraya. Ndizvo mambo womunda wemivhini unozoitenyi kwavari? ¹⁶ Unozouya avauraye avo varimi, unozopa munda wemivhini kune vamweni.” Naapo vechizwa izvi vakati, “Mwari, musatendera kudaro!” ¹⁷ Asi Jesu wakavaringira, akati, “Ndizvo chiinyi ichi chakanyorwa chinoti, ‘Buwe iro rakarambwa ngevaaki, ndiro rakaita soro repakona? ¹⁸ Munhu weshe uwo unowira padera pebuwe iro unozoputika kuita zvigurwa; asi iye kwaari werinozowira padera pake rinozomukuya kuita bukuta”. ¹⁹ Vanyori nevapristi vakuru vakaedza kumubata ngeawa iro, asi vakatya vanhu; ngokuti vakazwisisa kuti wakaronza uyu muedzaniso ndivo. ²⁰ Ndizvo vakamurinda, vakatuma vadongoreri, avo vakadziitisa kudai ngevanhu vakarurama, ngokudaro vakamuteya ngemazwi ake, kuti vazomupira kusimba romutongi woumambo. ²¹ Vakamubvunza vakati, “Mudzidzisi, tinozia kuti izvo zvounoronza nokudzidzisa zvakanaka, auketi munhu, asi ngegwinyiso unodzidzisa ngenjira yaMwari. ²² Kunotenderwa here kwetiri kuti tipe muthero kunaSiza nokuti akutenderwi?” ²³ Asi Jesu echizia urimbwi hwavo wakati kwavari, ²⁴ “Ndipangidzirei chigurwa chemare. Chine muedzaniso wehope norunyoro rwaani?” Navo vakati, “Ngezva-Siza”. ²⁵ Jesu wakati kwavari, “Ndizvo mwechipa kunaSiza izvo zviri zvaSiza nokuna Mwari izvo zviri zvaMwari''. ²⁶ Navo vakakorera kumubata ngemazwi okuereketa kwake pamberi pevanhu; navo vechishamiswa ngokupingura kwake vakanyarara. ²⁷ Kwakaguma kwaari vamweni vevaSadhusi, avo vanoti akuna kumuswa kwevakafa, ²⁸ navo vakamuvundzisa vechiti, “Mudzidzisi, Mosi wakatinyorera echiti kuti mukoma womunhu afa, anemukadzi asina vana, munun'una wake unozotora mukadzi abarire mukoma wake vana. ²⁹ Ndizvo vaiyapo vakoma vanomwe; uwo wedangwe wakaroora mukadzi, akafa asina vana;, ³⁰ nouwo wechipiri wakamutora, ³¹ newechitatu wakamutora, ngokudaro veshe vanomwe vakafa avazi kusiya vana. ³² Ngesure kweizvi mukadzi naye wakafawo. ³³ Ndizvo pakumuka kwevakafa, unozoita mukadzi waani kwavari? Ngokuti veshe vanomwe vakamutora kuita mukadzi”. ³⁴ Jesu wakati kwavari, “Vanhu vomunyika muno vanoroora nokuroodzwa. ³⁵ asi avo vanoerengwa kuti vanosisira nyika iyo nokumuka kubva kwevakafa avaroori, avaroodzwizve. ³⁶ Ngokuti avachazofizve, ngokuti vanozodai ngengirosi vaa vana vaMwari, vaa vana vokumuka kwevakafa. ³⁷ Asi kuti vakafa vanomuswa, Mosi emene wakapangidzira kudaro, ngeizwi rinoronza ngendaa yepfiba, apo paakadaidza Mambo Mwari kuti ndiMwari waAbrahama, Isaka naJakobe. ³⁸ Zvinopano andiyepi Mwari wevakafa, asi Mwari wevanopona; ngokuti veshe vanoponera kwaari”. ³⁹ Vamweni vevanyori vakapingura, vakati, “Mudzidzisi, wanasa kuronza”. ⁴⁰ Ngokuti avazi kuchazoshingazve kumubvunza mubvunzo. ⁴¹ Asi Jesu wakati kwavari, “Vanoronza ngenyi kuti Kristu mukororo waDhavhidha? ⁴² Ngokuti Dhavhidha emene mubhuku reNduyo wakaronza kuti, ‘Mambo wakati kunaMambo wangu, gara ngokumudyo kwangu, ⁴³ metsa ndiite magaa ako chitambarariro chetsoka dzako’. ⁴⁴ Ndizvo kuti Dhavhidha echimudaidza kuti Mambo, ungaita mukororo wake ngokuitawani?”. ⁴⁵ Wakati kuvadzidzi vake mukuzwa kwevanhu veshe, ⁴⁶ “Ngwarai vanyori, avo vanodisisa kuhamba vakapfeka zvokusimira zvakareba, vanoda kuchingamidzwa pandau dzemisika nezvigaro zvepamberi mumhatso dzokudira nendau dzepamberi mumishongano yokudya, ⁴⁷ avo vanoparadza mhatso dzeshirikadzi nangokudziitisa vanoita mikumbiro yakareba. Vanozoashira kurashwa kwakanyanyisisa''.