¹ Hino kugonda kutenda gwinyiso reizvo zvinogarirwa, gwinyiso rezviro zvisikaoneki. ² Ngegwinyiso ngokugonda madzibaba makuru edu vakapupurirwa zvakanaka. ³ Ngokugonda tinozwisisa kuti nyika dzakaitwa ngeizwi raMwari, ndizvo izvo zvinooneka zvakaitwa ngezviro zvisikaoneki. ⁴ Ngokugonda Abhera wakapa Mwari mudiro wakanasa kunaka kupinda waKheni. Kubudikidza ndiwo kwakapupurirwa kwaari kuti wainga akatendeka, Mwari pachake echipupura ngendaa yezvipo zvake; wakafa, asi kubudikidza ngegonda rake uchandoreketa. ⁵ Ngokugonda Enokhi wakatorwa kuti asaona rufu; “Naye aazi kuoneka, ngokuti Mwari wainga amutora.” Ngokuti zvakapupurwa ndiye asati atorwa kuti, “Wakanasa kudakadza Mwari.” ⁶ Asi pasina kugonda azvingaitiki kumudakadza, ngokuti kunyazwi ndiani uwo unouya kunaMwari, unofanira kuti atende kuti uriyo, naye unopa muthuso avo vanomutsvaka. ⁷ Ngekugonda Noa, echipangwa ndiMwari ngendaa yezvaizoitika zvainga zvisati zvaoneka, echimutya Mwari, wakanasira ngarava kuti vaponeswe vemhatso yake; ngokudaro wakaitira ndaa nyika, wakaita unogara nhaka yekunaka kubudikidza ngokugonda. ⁸ Ngekugonda Abrahama wakazwisisa apo adaidzwa, kuti abude kuenda kundau yaaizoashira kuita nhaka; naye wakabuda kuenda, asikazii paaienda. ⁹ Ngekugonda wakaita munhu mupara munyika yaakagondiswa, kudai ngouri munyika isiri yake, echigara mumatende, kudai ngezvakaita Isaka naJakobe, avo vainga vagari venhaka naye yechigondiso chimwe. ¹⁰ Ngekuti wainingirira dhorobha rine madzeyo, Mwari ndiye ngwazi nemuaki waro. ¹¹ Ngekugonda Sara emene kunyazwi waiya ngomwa wakaashira simba rokuita mimba apo aamusharuka, ngokuti wakamuerenga kuita wakagondeka uwo wakagondisa. ¹² Ndizvo kubva kuno munhu umwe, naye wakaita kudai ngowakafa, yakabarwa mibarirwana yakawanda kudai ngouwandu hwenyeredzi dzemudenga nokuwanda kudai ngeuwandu wejecha riri pahumbikumbi yeruandhle risikaerengeki. ¹³ Veshe ava vakafa mukugonda vasikazi kuashira zvigondiso, asi vakazviona, vakazvichingamidza zviri kuretu. Vakatenda kuti vainga vanhu vapara nevahambi munyika. ¹⁴ Ngokuti vanhu avo vanoronza zvakadaro vanoonisa pamhene kuti vanotsvaka nyika yavo. ¹⁵ Ngegwinyiso dai vaikarakadza ngenyika yevakabuda kubva kweiri, vaizoano mukuwo wokuhwirirayo. ¹⁶ Asi zvino vanodisisa nyika yakapinda kunaka, kuronza kuti, yomudenga. Ndizvo Mwari aanyari kudaidzwa kuti Mwari wavo. Ngokuti wakavanasirira dhorobha. ¹⁷ Ngokugonda Abrahama, apo echiedzwa, wakapira Isaka kuita mudiro. Eya, uwo wakaashira zvigondiso, wakanasirira akapira mwana wake wakabarwa ari ega. ¹⁸ Ndiyezve wakaronzwa kuti, “Kubudikidza ndiIsaka mibarirwana yako inozodudzwa ngezina rako''. ¹⁹ Echierenga kuti Mwari unesimba rokumumusa, eya kubva kwevakafa, apapozve wakamuashira mumuedzaniso ²⁰ Ngokugonda Isaka wakafumisa Jakobe naIsau ngezviro zvaizoitika panguva ichauya. ²¹ Ngokugonda Jakobe, pakufa kwake, wakapfumisa umwe ngaumwe wevana vaJosefa, “Pakudira akatseama padera pendonga yake.” ²² Ngekugonda Josefa, pamagumo ekupona kwake, wakaronza ngedaa yekubuda kwevana vaIsuaeri, wakapanga ngedaa yemagodo ake. ²³ Ngokugonda Mosi wakafishkwa ngevabari vake mwedzi mutatu pakubarwa kwake, ngokuti vakaona kuti mwana wainga akanaka; navo avazi kutya mupango wamambo. ²⁴ Ngokugonda Mosi, apo akura, wakaramba kuzwi mukororo womwanasikana waFaro. ²⁵ Wakatsanangura kuitirwa zvakashata pamwepo nevanhu vaMwari kuno kudakara kamukuwo muzvidakadziso zvokushaisha. ²⁶ echierenga kuti kudaniskwa ngendaa yaKristu kuri upfumi wakakura kupinda upfumi weEgipite, ngokuti wainingirira mberi kumubairo. ²⁷ Ngokugonda wakabuda kubva muEgipite, asikatyi ushungu hwamambo; ngokuti wakashingirira kudai ngewaimuona uwo usikaoneki. ²⁸ Ngokugonda wakangwarira Phasika nokufafazwa kwengazi, kuti muurayi asazogwama matangwe aIsuraeri. ²⁹ Ngokugonda vanhu vakaambuka Ruandhle Rwakatsvuka kudai ngevanoambuka panyika yakaoma, asi apo vaEgipite vechiedzererawo kuambuka vakanzvaidzwa. ³⁰ Ngokugonda marukumbati eJerikho akawa pashi, sure kwokutendererwa mazuva manomwe. ³¹ Ngokugonda Rahabhi chifebi aazi kufa pamwepo naavo vaiya vasikapurutani, ngokuti wainga aashira vadongoreri ngekunyarara. ³² Chiinyi chimweni chendingaronza? Ngokuti mukuwo unozondiperera kudai ndechironza ndiGidheoni, Bharaki, Samusoni, Jefetha, Dhavhidha, Samueri nevaprofeti. ³³ Avo kubudikidza ngokugonda vakanyisa umambo, vakashanda zvakanaka, vakahanira zvigondiso, vakakonya miromo yemhondoro, ³⁴ vakadzima mirazvu yemuriro waibaka, vakapokonyoka kubva kushoti dzaipinza, pakurembaremba vakagwinyiswa, vakaita vanesimba guru mukurwa, vakadzinga hondo dzemadzinza. ³⁵ Vakadzi vakapuwa vakafa vavo vamuswa. Vamweni vakarwadziswa, vechiramba kuashira kununurirwa, kuti vahanire kumuka kwakapinda kunaka. ³⁶ Vamweni vakaedzwa ngekuitirwe jee nokushwapurwa, kunyazwi vakasungwa ngemaketani nokukonyerwa mutirongo. ³⁷ Vakapondwa ngemapuwe, vakaadzwa ngepakati ngesaho, vakaurawa ngeshoti. Vakahamba vakasimira matoo emakwai neembudzi, vechitama, vechitambudzwa, vechiitirwa zvakashata; ³⁸ Nyika yainga isizi kuvafanira, vechipepesheka mumashango nemumatunhu, mumapako nomumabani enyika. ³⁹ Neava veshe kunyazwi vakapupurirwa ngekugonda kwavo, avazikuashira icho chakagondiswa. ⁴⁰ wari wainga akatinasirira chiro chimweni chakapinda kunaka, kuti ngokubanze kwedu avo vasazoita vakaperera