¹ Ngokuti Mupango zveune mumvuri wega wezviro zvakanaka zvichauya, haiwa muemo wemene wezviro izvo zvegwinyiso, aungatongoiti kuti vaperere avo vanokwedzera paduze ngemidiro imweyo inogara yechipirwa gore ngegore. ² Kudai zvainga zvakadaro aisaizorekerwa kupirwa here, ngekuti kudai vadiri, apo vainga vacheneswa kamwe mhera nariini, avasaichazoa nemhumba yekushaisha? ³ Asi mumudiro iyi uripo mukarakadzisi wezvishaishi gore ngegore. ⁴ Ngekuti azvingaitiki kuti ngazi yemikono neyembudzi iduse zvishaishi. ⁵ Ndizvo apo Kristu auya munyika wakati, “Mubairo nezvipo iwewe auzi kuzvida, asi wakandinasirira muiri. ⁶ Mudiro yekupisha nemudiro yekushaisha amuzi kuidakarira. ⁷ Saka ndakati: ‘Wona, ndauya kuti ndiite kuda kwako, A Mwari’ mutsamba yakapetwa kwakanyorwa kudaro ndini''. ⁸ Zvaakaronza pakutanga kuti: “Mubairo nezvipo nembeu dzeshe dzemidiro nemubairo yezvishaishi auzi kuzvida, zve, auzi kudakara ndizvo izvo zvinopirwa kudai ngezvinodiwa ngoMupango''. ⁹ Hino wakati: “Wona, ndauya kuti ndiite kuda kwako.” Unodusa chokutanga kuti agwinyise chechipiri. ¹⁰ Ngekuda ukwo takacheneswa kubudikidza ngokupirwa kwemuiri waJesu Kristu kamwe kega. ¹¹ Nomupristi weshe ngegwinyiso unoema zuva ngezuva pamushando wake, echipira kazhinji mudiro inotodzana, isikatongokoni kudusa zvishaishi. ¹² Asi apo Kristu ainga apira mudiro umwe wemhera nariini ngendaa yezvishaishi, wakagara pashi ngekumurho kwaMwari. ¹³ Kubvira nguwa iyo echigarira metsa magaa ake aitwa chitambarariro chetsoka dzake. ¹⁴ Ngokuti ngekupira mudiro umwe Ena wakavaita vakaperera mhera nariini avo vakacheneswa. ¹⁵ Ne Mweya Wakachena unoitawo chapupu kwetiri, ngokuti ngesure Ena wakati: ¹⁶ “Ichi ndicho chitenderano chendinozoita navo ngesure kwemazuva awo, unoronza Mambo Mwari; ndinozoisa Mupango yangu mumwoyo yavo, ndinozoinyora mumipfungwa yavo, ¹⁷ Nezvishaishi zvavo nezvinyangadzo zvavo andichazozvikarakadzizve.” ¹⁸ Zvino apo pane kurekererwa kweizvi, apachina kupirwa kwomudiro umweni ngendaa yekushaisha. ¹⁹ Ndizvo hama, apo tinokutsunga kwokupotera kundau yakachena ngengazi yaJesu. ²⁰ Ngenjira itsva inopona yaakatibeurira, kubudikidza ngejira rechisitiro, ndikwo kuti kubudikidza ngenyama yake. ²¹ Hino zvetinaye mupristi mukuru padera pemhatso yaMwari, ²² ngatikwedzere tine mwoyo wegwinyiso mukugonda kwakazara, tine mwoyo yedu yakafafazwa kucheneswa kubva kumhumba yakashata nemiiri yedu yakashambwa ngemvura yakaera. ²³ Ngatibatisise kutenda kwegonda redu tisikazungunyiswi, ngokuti unogondeka uwo wakagondisa. ²⁴ Zve, ngatikarakadzane kumusirana rudo nokuita mishando yakanaka, ²⁵ Tisikarekeredzi kuungana pamwepo kudai ngomuitiro wevamweni, asi techigwinyisana umwe kuno umweni, kukuru apo munotoona kuti Zuva rinokwedzera ²⁶ Ngokuti kudai techizoshaisha maune ngesure kwokuashira kuzwisisa gwinyiso, akuchina mubairo unopirwa ngendaa yezvishaishi. ²⁷ Asi kwasara kugarira mukutya kutongwa, nemuriro uno ushungu unozopedza magaa. ²⁸ Munhu uwo wakagura MUpango yaMosi unofa asikaitirwi nyasha ngeizwi rezvapupu zviiri nokuti zvitatu. ²⁹ Kupanitshwa kwakapindisisa kushata kwakaitawani kukura kunozoitwa kuneuwo wakatsikatsika pashi petsoka Mwana waMwari, akaerenga ngazi yechitenderano, yaakacheneswa ndiyo, kuti chiro chisina shkwiro, akaita ngekushoora Mweya wenyasha? ³⁰ Ngokuti tinomuzia uwo wakaronza kuti: “Kuunzidzira ngokwangu, inini ndinozounzidzira.” nekuti Zve: “Mambo unozotonga vanhu vake.” ³¹ Ichi chiro chinotyisa kuwira munyara dzaMwari mupenyu. ³² Asi karakadzai ngemazuva ekutanga, apo ngesure kwokujekiswa kwenyu, mwakashingirira kurwisana kukuru ngekutambudzika. ³³ Pamweni mwakaemeswa pamhene kuti munyadziskwe nokutambudzwa, pamwenizve mwakakoanisirana naavo vakaitirwa zvakadaro. ³⁴ Ngokuti mwakazwira urombo avo vaiya mutirongo, mwakadakara mukushaishirwa kwenhumbi dzenyu, mwechizia kuti imwimwi mwemene mune nhaka yakapinda kunaka neinopinda kugara. ³⁵ Ndizvo musarasha kushinga kwenyu, ukwo kuno mubairo mukuru. ³⁶ Ngokuti munofanira kusengerera, kuti apo mwaita kuda kwaMwari, mungaashira icho chakagondiswa. ³⁷ Ngokuti, “Mumukuwo mudoko, uwo unouya unozouya, aazononoki. ³⁸ Asi wakatendeka wangu unozorarama ngekugonda. Mwoyo wangu auzodakari ngeuwo unopetuka sure.” ³⁹ Asi isusu atisiri pakati pavo avo vanopetuka sure kuenda mukurashkwa, asi tiri pakati peavo vanogonda vanoponeswa mweya.