¹ Nazvo iwewe, mwana wangu, iva nesimba munyasha dziri munaKristu Jesu. ² Izvo zvawakazwa kwendiri pamberi pezvapupu zvizhinji, uzvipe vanhu vakatendeka, vanokona vo kudzidzisa vamweni. ³ Utambudzike pamwepo neni, semurwi wakanaka waKristu Jesu. ⁴ Akuna munhu unorwa papfumo unozvipinganidza nemabasa ehupenyu wuno, kuti akone kufadza uyo wakakokera kuhondo. ⁵ Nomunhuvo kana achivivana nevamweni, haashongedzwi korona, kana asina kuvivana sezvakarairwa. ⁶ Murimi unobate-basa ndiye unofanira kutanga kudya zvibereko. ⁷ Funga zvandinoreva, nokuti Ishe uchakupa kunzwisisa pazviro zveshe. ⁸ Rangarira Jesu Kristu wakamuka kuvakafa, worudzi rwaDhavhidhi, sezvandinoparidza paevhangeri yangu, ⁹ yandinotambudzikira kusvikira pakusungwa semunyangadzi; asi shoko raMwari arina kusungwa. ¹⁰ Saka ndinotsungirira pazvinhu zveshe nokuda kwavakasanangurwa, kuti navo vawane kuponeswa kuri munaKristu Jesu, pamwepo nekugwinya kusingaperi. ¹¹ Izwi iri ngeregwinyiso: Kudai takafa pamwepo naye, tinozoraramazve naye. ¹² kudai techitsungirira, tinozotongazve naye; kudai techimuramba, ena unozotirambawo. ¹³ kudai isusu tisikagondeki, iye unogara akagondeka, ngokuti aakoni kudziramba. ¹⁴ Uwayevudzire zviro izvi, uwaraire pamberi paMwari, kuti varegere kuita nharo dzisina maturo, zvinongoparadza vanozwa. ¹⁵ Shingaira kuti uzvikombedze pamberi paMwari uri munhu wakatendeka, mubati usingafaniri hake kunyadziswa, unonasa kukoshesa shoko rechokwadi. ¹⁶ Nzvenga kureketa kusinehanya naMwari; nekuti vecharamba vechingonyanya pakusanamata Mwari. ¹⁷ Neshoko ravo richanyenga seronda; pakati pavo kunaHimenayo naFireto. ¹⁸ Avo vakarashika pachokwadi, vachiti, kumuka kwavakafa kwatopfuvura, vachikanganisa kutenda kwevamweni. ¹⁹ Kunyange zvakadaro, nheyo dzakasimba dzaMwari dzinoramba, dzinechisimbiso ichi: Ishe unoziva vanhu vake; uye: Mumwe nemumwe unodhaidzira zita raShe ngaabve pakusatendeka. ²⁰ Muimba huru amuna midziyo yendarama neyesirvheri bedzi, asi imwe yematanda vo, neyevhu; imwe inokudzwa, imwe isingakudzwi. ²¹ Nazvo kana munhu achizvinatsa kwazvo pazviro izvi, uchava mudziyo unokudzwa, wakaitwa mutsvene, wakakwanira basa raTenzi, wakagadzirirwa mabasa eshe akanaka. ²² Asi tiza kuchiva keujaya, uvinge kunaka, nekutenda, nerudo, nerugare, pamwepo nevanodana kunaShe nemoyo wakachena. ²³ Asi urambe mibvunzo yovupenzi nokusaziva, uchiziva kuti zvinobereka kukakavara. ²⁴ Zvino muranda waShe haafaniri kukakavara, asi ave munyoro kuvanhu veshe, unoziya kudzidzisa, unotsungirira pakuitirwa zvakashata. ²⁵ Ena unodzidzisa nounyoro avo vanomudziisa, kuti zvimweni Mwari avape kutendeuka vazoziya chokwadi. ²⁶ Vapengenukezve, vave pamusungo waDhiabhorosi, wavakanga vakabatwa naye.