¹ Phauri, wakadaidzwa kuita mupostori waKristo Jesu ngokuda kwaMwari, noHama yedu Sosithenesi, ² Kuchiara chaMwari icho chiri muKhorinte, kwavari vakacheneswa munaKristo, vakadaidzwa kuita vakachenerswa, pamwepo naavo wese vari kundau dzese vanodaidza zina raMambo Jesu Kristo, Mambo wavo nowedu. ³ Nyasha ngadzigare kwomuri nokunyarara kunobva kunaMwari Baba edu naMambo Jesu Kristo. ⁴ Ndinombonga Mwari wangu ngenguva dzese ndimwi, ndendaa yenyasha dzaMwari dzakapuwa kwomuri muna Kristo Jesu. ⁵ Ngokuti muzviro zvese mwakafimiswa mwaari mukuereketa kwese nomukuzia kwese; ⁶ Kudai ngouchapupu ndiKristo hwakagwinyiswa mukati mwenyu. ⁷ Kuti musatama chipo choMweya apo mwechingarira kuoniswa kwaMambo wedu Jesu Kristo, ⁸ Uwo unozomugwinyisawo metsa kumagumo, kuti muite vasikaitirwi ndaa ngenguva raMambo wedu Jesu Kristo. ⁹ Mwari unogondeka, uwo wemwakadaidzwa ndiye mukuiyana noMukororo wake, Jesu Kristo, Mambo wedu. ¹⁰ Zvino, ndinomupota, hama, ngezina raMambo Jesu Kristo, kutin mushe muerekete chiro mimwecho, zve, kuti kusaapo kuparadzana pakati penyu, asi kuti muite vakasungwa pamwepo mumupinimidzo umwe nebiningidzo rimwero. ¹¹ Nokuti, kwakaronzwa kwendiri, hama, dzangu ngaavo, vemhuri yaKhroe, kuti dziripo hasha pakati penyu. ¹² Zvendinoronza ngeizvi, kuti umwe ngaumwe wenyu unoti: ''Inini ndiri waPhauri'', nokuti, ''Inini ndiri waAporosi,'' nokuti, ''Inini ndiri waKhefasi,'' nokuti, ''Inini ndiri waKristo''. ¹³ Kristo wakaparadzaniswa here? Phauri wakakohomerwa here ngendaa yenyu? Nokuti mwakabhabhatidzwa here ngezina raPhauri? ¹⁴ Ndinobonga Mwari kuti andizi kubhabhatidza noumwe wenyu, kwega Krispusi naGaiusi; ¹⁵ kuti kusaapo noumwe ungazoti, mwakabhabhatidzwa ngezina rangu. ¹⁶ Inini ndakabhabhatidzawo vemheri yaStefanasi; ngokubanze kwavo andikarakadzi kuti ndakabhabhatidza umwenizve. ¹⁷ Ngokuti Kristo aazi kundituma kuti ndibhabhatidze, asi kuti ndichumaire vhangeri, haiwa ngoungwaru hwemazwi, kuti ngokudsaro, muchinjiko waKristo usazoitwa usina shwiro. ¹⁸ Ngokuti izwi romuchinjiko upenzi kwavari vanopona, asi kwetiri isusu tinoponeswa, isimba raMwari. ¹⁹ Ngokuti kwakanyorwa kuti: Ndinozoparadza ungwaru hwevakangwara nokuzwisisa kwevanozia ndizokurasha. ²⁰ Uripari wakangwara? Iripai ngwazi yokufunda? Iripai ngwazi yokuereketayeiyi nguva? Mwari aazi kuzviita upenzi here zvoungwaru hweiyi nyika? ²¹ Ngokuti, muugwaru hwaMwari, nyika aizi kuzia Mwari kubudikidza ngougwaru hwoyo, kwakadakadza Mwari, kubudikidza ngoupendzi hwokuchumaira, kuti avo vanotenda avoponese . ²² Ngokuti vaJudha vanokumbira chioniso nevaGiriki, vanotsvaka ungwaru. ²³ Asi isusu tinochumaira Kristo wakakohomerwa, kuvaJudha chipumhuniso nokunevemadzinza upenzi. ²⁴ Asi kwavari vakadaidzwa, vese vaJudha nevaGiriki, Kristo simba raMwari nougwaru hwaMwari. ²⁵ Ngokuti upenzi hwaMwari hwakapinda kungwara kuneugwaru hwevanhu; nokurembedzeka kwaMwari kwakapinda kungwiya kunekugwinya kwevanhu. ²⁶ Ngokuti ringirai kudaidzwa kwenyu, hama, akuna vazhinji venyu vakangwara ngokwenyama, akuna vazhinjivane simba, akuna vazhinji vanoremeredzwa, vanodaidzwa. ²⁷ Asi Mwari wakatsanangura zviro zvoupenzi munyika; kutserudza vakangwara; Mwari wakatswanagura zviro zvakaremedzeka munyika ktsverudza zvakagwinya. ²⁸ Mwari wakatsanagura zviri pashi nezvinoshoorwa munyika; kunyazwi nezviro zvishipo, kuita kuti zviripo zviite zvisina shwiro. ²⁹ Kuti kusazoapo naumwe unozoganza pamberi paMwari. ³⁰ Ndiye chinyuka chokupona kwenyu munaKristo Jesu, uwo wakaitwa ungwaru hwedu ndiMwari, nokururama kwedu, kucheneswa nokuripirwa. ³¹ Kuitira kuti kudai, ngezvakanyorwa, iye unoganza, ngaaganze ndiMambo Mwaru.