¹ اَیُّوبؔ کاجواب تب اَیُّوبؔ نے جَواب میں کہا۔ ² کاش میرا غم تو لا جاتا۔ اَور میری مُصِیبت ساتھ ہی ترازُو میں رکھّی جاتی۔ ³ کیونکہ وہ ساحِل کی ریت سے زیادہ بھاری ہوتی۔ اِسی باعِث میری باتیں بے تامّل ہَیں۔ ⁴ کیونکہ قادرِ مُطلِق کے تیِر میرے اندر ہَیں میری رُوح اُن کا زہر پِیتی ہے۔ اَور خُدا کی دہشتیں میرے خلاف صف باندھتی ہَیں۔ ⁵ کیا گورخر رینگتا ہے۔ جب اُس کے سامنے گھاس ہو۔ یا بَیل ڈکارتا ہے جب اُس کے آگے چارا ہو۔ ⁶ کیا پھیِکی چیز بغیر نمک کے کھائی جاتی ہے؟ کیا انڈے کی سفیدی میں مَزہ ہے؟ ⁷ میری جان تو اُن کے چُھونے سے بھی اِنکار کرتی ہے۔ وہ میرے لئے مَکرُوہ غِذا ہَیں۔ ⁸ کاش!میری خواہش پُوری کی جائے اَور خُدا میری اُمّید برلائے۔ ⁹ اگر خُدا کی مرضی ہو۔ تو مُجھے چُور کر دے۔ اَور اگر اپنا ہاتھ بڑھائے تو مُجھے کاٹ ڈالے۔ ¹⁰ تو مُجھے کُچھ تسلّی ہوتی۔ بلکہ مَیں اُس اٹل درد میں بھی شادمان ہوتا۔ کیونکہ مَیں نے قُدّوس کی باتوں کا اِنکار نہیں کِیا۔ ¹¹ میری کیا طاقت ہے۔ کہ مَیں اِنتظار کرُوں؟ اَور میری زِندگی کِتنی ہے۔ کہ مَیں صبر کرُوں؟ ¹² کیا میری طاقت پتّھروں کی طاقت ہے یا میرا گوشت پیِتل کا ہے؟ ¹³ کیا میرے لئے میرے اندر مدد نہیں۔ اَور بچنے کی اُمّید مُجھ سے جاتی رہی ہے۔ ¹⁴ چاہیئے کہ دوست بے دِل پر مہربان ہو۔ ایسا نہ ہو کہ وہ قادرِ مُطلِق کے خوف کو چھوڑ دے۔ ¹⁵ میرے بھائی ندی کی طرح دھوکا دیتے ہَیں۔ یعنی اُن وادیوں کی ندی کی طرح جو بہتی جاتی ہے۔ ^{17 16} جس وقت وہ گرم ہوتے ہیں تو غائب ہو جاتےہیں اور جب گرمی پڑتی ہے تو اپنی جگہ سے اڑ جاتے ہَیں۔ ¹⁸ وہ اپنی راہ سے پھِرتی ہیں۔ وہ بِیابان میں جا کر گُم ہو جاتی ہیں۔ ¹⁹ تیماؔ کے قافلے اُن کی راہ دیکھتے اَور سَؔبا کے مُسافِر اُن کے مُنتظِر ہَیں۔ ²⁰ وہ مایوس ہو گئے کیونکہ اُنہوں نے اُمّید رکھّی۔ وہ وہاں پُہنچے اَور شرمندہ ہو گئے۔ ²¹ اِسی طرح اَب تُم میرے لئے بن بیٹھے ہو۔ تُم میری مُصیِبت دیکھ کر خوفزدہ ہوتے ہو۔ ²² کیا مَیں نے تُم سے کہا کہ مُجھے کُچھ دو یا اپنے مال میں سے مُجھے کُچھ بخشو؟ ²³ یا کہ دُشمن کے ہاتھ سے مُجھے چُھڑاؤ یا ظالموں کے ہاتھ سے مُجھے بچاؤ؟ ²⁴ مُجھے سِکھاؤ تو مَیں چُپ چاپ رُہوں گا مُجھے بتاؤ۔ کہ کِس بات میں مَیں نے غلطی کی۔ ²⁵ سچّی باتیں کیا ہی مُوثّر ہوتی ہَیں۔ لیکن تمہاری ملامت کِس قدر تلخ ہے؟ ²⁶ کیا تُم اِس خیال میں ہو کہ اُن لفظوں کے باعِث ملامت کرو۔ جو نا اُمّیدی کی حالت میں ہَوا کی مانند کہے گئے۔ ²⁷ ہاں تُم یتیم پر حملہ کرتے ہو۔ اَور اپنے دوست کے لئے گڑھا کھودتے ہو۔ ²⁸ اَب مہربانی کر کے میری طرف توجُّہ کرو۔ مَیں تُمہارے مُنہ پر جُھوٹ نہ بولُوں گا۔ ²⁹ پھِرو ظُلم نہ کرو۔ پھِرو کیونکہ میری راست بازی حق ہے۔ ³⁰ کیا میری زُبان پر بے اِنصافی ہےَ ؟یا خراب چیزوں کی تمیز کرنے کا مُجھے سلیِقہ نہیں؟