¹ Ichi ni chibvumbuluso cha Yesu Mkhirisitu omwe Mulungu adampereka pala kuonesera akapolo wache bzomwe bzimfuna kuchitika tsapanopali. Adamudziwisa pakutumiza anjero wache kuna kapolo wache Yohani, ² Omwe adaikhira umboni bza mafala ya Mulungu na umboni bwa Yesu Mkhirisitu, bzinthu bzense ndibzo iye adabziona. ³ Wakudalisika ndiye ambalewenga mwakukuwa bza uneneri ubu na wale ndiwo ambatetekera mafala ya uneneri bwache na omwe ambabvera ndibzo bzidanembiwa mwemo, thangwe nthawe yafendera. ⁴ Yohani, kuna mipingo minomwe mu Asia: chifundo mbachikhale kuna imwe na mtendere kuchokera kuna iye ndiye ali, na ndiye akhali, na iye ali nkubwera, na kuchoka ku mizimu minomwe yomwe iri pa chikadera chache, ⁵ na kuchoka kuna Yesu Mkhirisitu, omwe ni mboni yakukhulupirika, wakutoma kubadwa kuna anyamuya, na mtongi wa mafumu ya pa dziko lapansi. Kuna iye wakutikonda omwe watitsudzula ku bzakuphonya bzathu thangwera mulopa wache---- ⁶ watichitisa kukhala ufumu, wansembe wa Mulungu wache na Baba--kuna iye kukhale ulemelero na mphamvu zaku nthawe za nthawe . Amen. ⁷ Nyang'anani, akubwera na mitambo; diso lirirense limdzamuona, kuphatanidza pomwe na wense omwe adamupha. Mitundu yensene yapadziko lapansi imdzalira nkhawa thangwera iye. ⁸ ''Ndine Alefa na Omega,'' Watenepo Mbuya Mulungu, ''omwe ali, akhali, na ndiye alikubwera, wamphamvu zense.'' Bwakunembera bzinango bzachi Herene bzimbati, Ndine Alefa na Omega, wakutoma na wakumaliza, watenepo Mbuya Mulungu. ⁹ Ine, Yohani--m'bale wanu na omwe ndili namwe pabodzi mu kubonera na ufumu na kupilira kwa kuderekha ndiko kuli mwa Yesu--akhali pa nsuwa yakuchemeriwa Patimo thangwera mafala ya Mulungu na umboni bwa Yesu. ¹⁰ Ndikhali mu Mzim u wa nsiku ya Mbuya. Ndidabva mmambuyo mwangu mkuwe ukulu ninga lipenga. ¹¹ Udati, ''Nembani bzomwe mulikuona m'bukhu, apo mubzitumize kumipingo minomwe---ku Aefeso, ku Smurina, ku Pergamo, ku Tiyatira, ku Sarde, ku Filadelfeya na ku Laodikaya.'' ¹² Ndidazungunuka pala ndione kuti mafala yakhasewera kuna ineyo yakhali ya mbani, apo pomwe ndidazungunuka ndidaona bzakumanikira kandiyero bzinomwe bza oro. ¹³ Pakati nakati pa bzakumanikira kandiyerobzo ndidaona winango ninga Mwana wa Munthu, atabvala mkanjo utali wa, kufika mu nzayo zache na bande wa golide kuzungulira pa kadedema pache. ¹⁴ Msolo wache na tsisi bzikhali bzicena ninga ukuse---bzichena ninga matalala---apo maso yache yakhali ninga bzibvuli bza moto. ¹⁵ Nzayo zache zikhali ninga mkuwa wakuyetima, ninga mkuwa wakuvukutiwa kachiwiri mu ng'anjo, apo mafala yache yakhali ninga madzi mazinji yakuthamanga. ¹⁶ Akhana nyenyezi zinomwe m'boko lache lakumadidi, na psimo lakukhala na nsonga ziwiri zakuthwa likhabula mkamwa mwace. Nkhope yache ikhatoya ninga dzuwa lakupsa maninge. ¹⁷ Pomwe ndidaona, ndidagwa panzayo zace ninga munthu wakufa. Iye adabzatika boko lace lakumadidi pa ine achiti, ''Nampodi kubva mantha. Ndine wakutoma na wakumaliza ¹⁸ na wamoyo. Ndikhali wakufa, soma nyang'anani nimkhala ku nthawe za nthawe. Apo ndina bzavi bza imfa na bza Hade. ¹⁹ Mthangwe lache nembani ndibzo mwaona, bzatsapano lino, na ndibzo bzimdzachitika bzikamala bzobzi. ²⁰ Soma pala thumbudzulo la bzakubisika bza nyenyezi zinomwe zomwe mudaziona kuboko langu la madidi, na bzakukhazikira kandiyero bzinomwe: Nyenyezi zinomwezo ni anjero wa mipingo minomwe apo bzakukhazikira kandiyero bzinomwebzo ni mipingo minomwe.''