¹ Kuna mnjero wampingo waku Ayefeso nemba: 'Mafala ya ule omwe adaphata nyenyezi zinomwe ku boko lache lamadidi na ndiye ankufamba pakati pa bzakuikhira kandiyero bzinomwe bza oro, ² ''Ndikudziwa bzichito bzako, basa lako lakukhuma, kupirira kwako kwakuderekha, nakuti ungabvume lini wale wakuipa, soma wawayezera wale omwe ambati mba atumwi uko neye, apo wawabulukira kuti mbakunama. ³ Uli kupirira mwakuderekha apo ulibe kuneta thangwera dzina langu. ⁴ Soma ndinacho chakukugaza thangwe udataya chikondi chako chapakutoma. ⁵ Kumbukira tsono pomwe wayambira kugwa. Lapa apo uchite bzinthu ndibzo ukhachita pakutoma. Pokha pokha ungalapa ndiye nimdzabwera kuna iwe ndichidzachosa chakukhazikira kandiyero chako pambuto pache. ⁶ Soma una ichi: Umbaipidwa na bzakuchita bza Anikolai bzomwe nimbawengana nabzombo. ⁷ Omwe ana khutu, abve bzomwe Mzimu ukulewa ku mipingo. Kuna iye wakugonjesa nimdzamupa udidi bwakudya bza mmuti wa moyo, bomwe buli mu paradaizo wa Mulungu.''' ⁸ ''Kuyenda kuna mnjero wampingo wa Smurina nemba: 'Mafala ya ule omwe ngwakutoma na kumaliza, omwe akhali wakusaika achisanduka pomwe wamoyo: ⁹ ''Ndikudziwa kubonera kwako na kusaya kwako, soma ndiwe wakudala. Ndikudziwa bza makiriyado ya wale omwe ambabziti Ayuda, uko neye. Mba asunagoge wa Satana. ¹⁰ Nampodi kugopa bzomwe bziri pafupi kuti bzikubonerese. Nyang'ana! Satana ali pafupi kufuna kukuthusani winangomwe mkaoko pakuti mukuyezeriwa, apo mumkabonera kwa nsiku khumi. Khalani wakukhulupirika kufikira imfa, nimdzakupani korona wamoyo. ¹¹ Wakukhala na khutu, abve ndibzo mzimu ukulewa kumipingo. Iye wakugonjesa amdzadzongeka lini na imfa yachiwiri.''' ¹² Kuyenda kuna mnjero wa mpingo wa Pergamo nemba: 'Mafala ya iye wakukhala na psimo la nsonga ziwiri zakuthwa: ¹³ Ndikudziwa ndiko umbakhala, kule komwe kadera yachifumu ya Satana iri. Chensecho umbaphatisisa dzina langu. Ndikudziwa ulibe kulamba chikhulupiriro chako mwa ine, neye mu nsiku za Antipa mboni yangu, wakukhulupirika wangu, omwe adaphiwa pakati panu, kule komwe Satana ambakhala. ¹⁴ Soma ndina bzinthu bzakuchepa bza kukugaza: Uli nawo koko omwe ambaphatisisa chipfunziso cha Balaamu, omwe adapfunzisa Balaki kuthusa chakupsomesa pa wana wa Isaraeri pala kuti akadye chakudya chakuperekiwa kuna mafano yakutsema na kukhala wakuchita chigololo. ¹⁵ Munjira ninga yoyi, muna pomwe winango wakuphatisisa chipfunziso cha Anikolai. ¹⁶ Lapa, tsono! Ungasaya kutenepo, nimdzabwera kamangu kuna iwe, apo nimdzawathira nkhondo na psimo la mkamwa mwangu. ¹⁷ Wakukhala na khutu, abve ndibzo Mzimu ukulewa ku mipingo. Kuna iye wakugonjesa, nimdzamupa mwala uchena wa dzina lipsa lakunemba pamwalapo, dzina lakuti palibe wina anilidziwa soma omwe anilitambirayo.''' ¹⁸ ''Kuyenda kuna mnjero wa mpingo waku Tiyatira nemba: ''Aya ni mafala ya Mwana wa Mulungu omwe ana maso ninga malambi ya moto na nzayo za mkuwa wakuyetima. ¹⁹ ''Ndikudziwa bzakuchita bzako: Chikondi chako na chikhulupiriro na mabasa na kupirira kwakuderekha. Ndikudziwa bzomwe wachita tsampanopali bzikuposa ndibzo udachita pakutoma. ²⁰ Soma ndina ichi chakukugaza: Ukubvuma mkazi Yezeberi, omwe ambabzichemera mneneri. Na chipfunziso chache ambanyengeza akapolo wangu kumbachita chigololo na kumbadya bzakudya bzakuperekiwa kuna mafano yakutsema. ²¹ Ndidamupa nthawe yakulapa soma akufuna lini kulapa kulekana nacho chigololo chache. ²² Nyang'anani! Nimdzamuthusa pa kama wamatenda na wale omwe ambachita chigololo na iye mu chitsautso chikulutsa, pokha pokha alape bzichito bzao. ²³ Nimdzamenya wana wache kupha, apo mipingo yensene imdzadziwa kuti ndine ule omwe nimbapsaga psaga mu bzakukumbuka na mmitima. Nimdzapa kuna aliyense waimwe malingana na bzichito bzanu. ²⁴ Soma kuna winango mwensene ku Tiyatira, kuna aliyense omwe ambaphatisa lini chipfunziso ichi na ndiye ambadziwa lini bzomwe wina ambachemera mkati mwa bzinthu bza Satana-----kuna imwepo nilewa kuti, 'Nimkuikhirani lini chakuwawa chirichense kuna imwe.' ²⁵ Mu njira iriyense, phatisisani chaibzo ate ndidzabwere. ²⁶ Omwe ambagonjesa achichita bzichito bzangu ate kumapeto, kuna iye nimdzamupa kadera yakutonga wamitundu. ²⁷ 'Amdzatonga na mpsimbo ya fero, apo ninga dongo mmitsuko amdzawapsa m'bzidupsa.' ²⁸ Ninga ndimo ndatambirira kuchoka kuna Baba, nimdzamupa pomwe nyenyezi ya kumachibese. ²⁹ Omwe ana khutu, abve ndibzo Mzimu ukulewa kuna mipingo.'''