¹ Paulo, kapolo wa Mulungu na mtumiki wa Yesu Mkhirisitu pala chikhulupiriro cha wanthu wakusanhkuliwa wa Mulungu na kudziwa cadidi ndico chiri mu chinamato, ² na chidikiriro ca moyo wakusays kumala, ndio Mulungu omwe ambanama liniyo, adalonjeza kalekalero. ³ Pa nthawe yace adaulula mafala yace kudzera mwa ulaliki bomwe adandisungiza ninga mwa chitongero cha mpulumusi wathu Mulungu. ⁴ Kuna Tito, mwana wangu chaiyeiye, ninga mwa chikhulupiriro cha ifepano tense. Nsisi na mtendere wa kwa Mulungu Baba na Mkhirisitu mpulumusi wathu. ⁵ Na thangwe limweri ndipopa ndidakusiya ku Krete, pala kuti ulongosole mu mndando mwace bzinthu ndibzo bzikhanati kumaliziwa na kuikha akulu mmiyi yakuthemera ninga ndimo ndidakupanganizira. ⁶ Mkulu wa mpingo akhale wakusaya uchilema, mwamuna wa mkazi m'bodzi yekha, na wana wa chikhulupiriro wakusaya kumbatongewa milandu ya kusaya kusamala ayai ya kusaya kumbabvera. ⁷ Mpsakufunika kuti wakunyan'ganira mpingo akhale wakusaya uchilema, ninga nyabasa wa Mulungu, wakusaya mirandu. Nampodi akhale wakumbaumira, wakumbafulumiza kukalipa, wa kumbamwa bwadwa, wa kumbapoka na wanthu, nampodi pomwe akhale wa kalisirira ka bzakunyansa , nampodi pomwe akhale wamingululi. ⁸ Soma, akhale wakuchezesa alendo, wakukonda bza kudeka, wakumbabzitonga, wakulungama, wakuchena mtima, wakubzilambiza. ⁹ Wakuphata mafala ya kukhulupirika ninga mwa chipfunziso, kuti akakwanise kuchenjezambo winango mchipfunziso cha chadidi chire na kuthamula maganizo ya omwe animugaza. ¹⁰ Nakuti alipo azinjitsa wakusaya kubvera mafala, wakusewera mwa kusasata bza pezipezi, wakunyenjeza, maka maka omwe adatambira mgwatidwe. ¹¹ Mpsakufunika kumbawatseka pakamwa wamaseweredwe yoya. Ambapasula mabanja ya anzao na kupfunzisa bza pezipezi thangwera kalisirira kao ka bzakunyansa. ¹² M'bodzi wa iwo omwe akhali mneneri adati, ''Akerete basa lao mkunama, bzilombo bzakuipa, atofu wa mingululi.'' ¹³ Umbonibu m'bwa chadidi. Natenepo uwatsimule mwa kukalipa kuti akhale wakudziwa chikhulupiriro ca chadidi, ¹⁴ wakumbanyansidwa angabva magunkha ya Chiyuda ayai bzitongi bza wanthu wakupanduka mnjira ya chadidi. ¹⁵ Kuna iwo wakuchena mtima, bzense kuna iwo m'bzichenambo. Soma kuna iwo wakupsipiziwa wakatangale na kusaya kukhulupirika kulibe chao chakuchena, soma adziwe kuti nzeru zao na chikumbumtima chao bzense bza psipiziwambo. ¹⁶ Ambatawira kuti Mulungu ambamudziwa, soma na mabasa yamchita iwo yambalatiza kumulamba. Popeza mbakunyansisisa na kusaya kubvera kwaoko na wapezipezi pa mabasa yense yabwino.