¹ Soma imwe sewerani bzakuthemera chipfunziso cachadidi. ² Pfunzisani wakukalamba akhale wakubzikoya, wakulemekeza, wakubzilambiza na wakudziwa chadidi mchiponi, mchikondi, na mchipiriro. ³ Ndendende pomwe na azimai wakukalamba apfunziseni kukhala mmakhalidwe yakuthemera wanthu wakuchena, wakusaya kumbabzidyekerezera ayai wakusaya kuzerewera chikondi cha pa bwadwa, soma wakupfunzisa bzakudeka, ⁴ ntenepo pomwe pfunzisani wana wa chikazi kukonda azibayao na kumbakonda pomwe wana wao, ⁵ akhale wa kubzilambiza, wakuderekha, wakuchena, wakudziwa bzakufunika mnyumba mwao, wakubvera azibayao wa iwo okha, pala kuti mafala ya Mulungu nampodi yatambire makiriyado. ⁶ Ntenepo pomwe, anyamata uwadandaulire akhale wakubzilambiza. ⁷ Mu bzense ubzionesere chilatizo cha chitewezi cha mabasa yabwino. Mu chipfunziso chako, ubzionesere kukhala wa umunthu na kubzilemekeza, ⁸ na mafala ya chaiyo yakusaya kugazika pala kuti iye wakufuna kukugaza achite manyazi thangwera kusaya thangwe lakutilewera ife bzakuipa. ⁹ Akapolo abvere azimbuyao wa iwo okha mu bzense, kumbawasangalasa seye kumbakekedzana nawo, ¹⁰ wakusaya kumbawabera, soma mmalo mwace ambaonese chikhulupiriro chense chabwino, kuti akakomese chipfunziso ca Mulungu Mpulumusi wathu. ¹¹ Nakuti chifundo cha Mulungu chaonekera pala chipulumuso kuna wanthu wense. ¹² Chimbatipfunzisa ife kulamba chisanamato na bzikhumbokhumbo bza dziko lapansi, na kumbakhala wakubziletsa, na wakulungama na wakunamata mu mbwado uno, ¹³ pomwe tikudikhira chidikhiriro chakudala, na maonekedwe ya ulemerero bwa Mulungu Mpulumusi wathu mkulu na Yesu Mkhirisitu. ¹⁴ Yesu adabzipereka yekha kuna ife pala kuti atilombole ku bzakuipa bzense na kubzichenesa yekha wanthu akhale wache chaiwo iwo wakachangu pakuchita mabasa yabwino. ¹⁵ Sewerani ibzi, limbikisani wanthu kubzichita, tsimulani na ulamuliro bwense. Munthu wina nampodi akupepuseni.