¹ Paulo na Timoteo, akapolo wa Yesu mkhirisitu, kuna wanthu wa Mulungu wensene wakuchena mtima mwa Yesu mkhirisitu wakukhala ku Filippi, pabodzi na wakunyang'anira na atumiki. ² Chidalitso mbachikhale kuna imwe na mtendere wakuchokera kwa Mulungu na Baba wathu na Mbuya Yesu mkhirisitu. ³ Ndikutenda Mulungu wangu nthawe zensene pakukumbukira imwe, ⁴ nthawe zensene, mu pemphero langu kuna mwensemwe, nimchita pemphero langu na nsangala ⁵ thangwera chibverano chanu cha kuthandizira uthenga bwabwino kuchoka pa nsiku ya kutoma ate lero lino. ⁶ Ndine wakukhutira na chinthu chochi, kuona kuti iye omwe adayamba mabasa yabwino amdzayamaliza kufikira nsiku ya Yesu mkhirisitu. ⁷ M'bzakuthemeradi ine kubva moda umweyu kuna imwe thangwe ndinamwe mumtima mwangumu. Nakuti imwe mwakhala anzangu mu chifundo na mkaoko kubodzi na pomwe ndikhabwikhotcherera pale na kuzindikira bza mafala ya bwinoya. ⁸ Nakuti Mulungu ndiye mboni yangu, kuti ndikulakalaka imwe mwensene mu nsisi zache za Yesu Mkhirisitu. ⁹ Tsapano ili ni pemphero langu: kuti chikondi chanu chifambe chichiwanda mu kudziwa kwanu na kubvesesa kwense ¹⁰ pakuti mukadziwe bzachaibzo, kuti mukakhale wa mtima wa chadidi wakusaya kuphonya kufikira pa nsiku yakubwera Mkhirisitu, ¹¹ kudzaziwa na chipatso ca kulungama ndicho chinibwera kudzera mwa Yesu Mkhirisitu na kuchitira ulemerero na kutenda kwa Mulungu. ¹² Tsapano ndikufuna mudziwe, abale, kuti ndibzo bzandichitikira inebzi bzatumikira zedi kuti mafala ya Mulungu yaende patsogolo. ¹³ Mwakuti, bzakumangira bzangu bzidaonekera mu mbuto ya alindiri na kuna wensene. ¹⁴ Abale azinji tsapano ana chikhulupiriro mwa Mbuya thangwera bzakumangira bzangubzi, apo tsapano ana kulimbika mtima pa kulewalewa mafala mwakusaya kugopa. ¹⁵ Winango chadidi ambalalikira nkumbaguma bza Yesu mwa makiriyado na ndeu, na winango pomwe wakumufuniradi bzabwino. ¹⁶ Winango ambachitadi thangwera chikondi na kudziwa kuti ndidaikhiwa pano pala kukhotcherera mafala ya Mulungu. ¹⁷ Soma wina ambalalikira bzakuguma Mkhirisitu mwa thangwe la kubzikonda, sikuti bza chadidi neye, akukumbuka kuti ningagumane chitsautso pomwe ndiri wakumangiwapo. ¹⁸ Mchani tsono? Chokha chakuti munjira iriyense----penu m'bzakunama ayai bza chadidi---Mkhirisitu anilalikiwa, apo tenepoyo ni m'dekedwa. Inde, apodi nimdzasekera, ¹⁹ nakuti nimdziwa kuti mapeto yache ngakuti bzimdzandichitira ine chipulumuso kudzera mwa mapemphero yanu na chithandizo cha Mzimu wa Yesu Mkhirisitu. ²⁰ Mwa kulakalaka na chidikiriro changu na chikhulupiro kuti nimdzachitisiwa lini manyazi, soma mwa kulimbika mtima kwense, tsapano lino na kunthawe zense, Mkhirisitu amdzakwiziwa mthupi langu, pinango mwa moyo ayai mu impfa. ²¹ Pakuti kuna ine kukhala na moyo ndiye Mkhirisitu na kusaika ndiye kuphindula. ²² Soma penu nimkhala na moyo ku thupi, ndiye kuti ni chipatso cha basa pala ine. Kuti ndisankhule chiponi? Ndikudziwa lini. ²³ Pakuti nimpaniwa nabzo bziwiribzi. Chakukhumba changu mchakunyamuka kukakhala na Mkhirisitu, chomwe mchabwino maninge, ²⁴ soma kukhazikika mu thupi mkwakufunika kwene kwene pala imwe. ²⁵ Pakukhulupirira ichi, nimdziwa kuti nimdzapitirira kukhala na imwe mwense, na kuthimizira kukomedwa na mchikhulupiriro ²⁶ pala kuti kubzithemba kwanu kuwande mwa Yesu Mkhirisitu pomwe nimdzabwera pomwe. ²⁷ Chakufunika mchakuti mukhale na makhaliro yakuthemera bwino mu mafala ya Mkhirisitu, pala kuti neye ndibwere kudzakuonani ayai neye, ndiri pano basi pala imwe, kuti mwaima nji mu mzimu wachiphatano, na nzeru pomwe zibodzi kulimbana pabodzi pala chikhulupiro cha mafala ya Mulungu. ²⁸ Nampodi kugopa anyakukuwengani mu njira iriyense. Icho ni chizindikiro cha chionongeko kuna iwo, soma kuna imwe mchipulumuso---apo ichi mchakuchoka kuna Mulungu. ²⁹ Thangwe chaperekiwa fovolo kuna imwe pala Yesu sikuti pala kukhulupirira iye kokha nada, soma pala kubva bzakuwawa pomwe thangwera iye, ³⁰ nakukhala imwe pa chikangano chibodzibodzichi ndico mudaona mwa ine, apo tsapano mumchibva mwa ine.