¹ Penu pana chilimbikiso mwa Mkhirisitu, penu pana chinyamalizo cha mchikondi, penu pana chibverano na mzimu, penu pana nsisi, ² apo kwanirisani chisekerero changu chidzale pakukhala cha moda wa kufanana, chakukhala na chikondi chakufanana, chachiphatano mu mzimu, na kukhala na chakulinga chibodzi pomwe. ³ Nampodi kuchita cha bzakukhumba bzanu ayai bzakutsangalaza moyo wanu. Mmalo mwache mwakubzichepesa mtima ganiziranimbo anzanu mwakuwatenga kuti mbakufunikira ate zjai kuposa imwepo wenekachiro. ⁴ Chitani bzakuti aliyense wa imwe nampodi ambabzilewengere bzakufuna bzache yekha neye, soma na bzakufunambo bza anzache. ⁵ Khalani na mtima mwa imwe ninga omwe ukhali mwa Mkhirisitu Yesu, ⁶ omwe, mwakukhala nayo maonekedwe ya Umulungu, alibe kubzitenga kuti ngwa kundendemereratu na Mulunguyo. ⁷ Soma, adabzikhuthula yekha kubzindendemeza na kapolo, apo adabadwa mwakundendemera na munthu. Na kuoneka mwakukhala ninga munthu, ⁸ adabzichepesa achikhala wakubvera na kukhosoma mpakana kufa kwache, ate impfa ya pamtanda! ⁹ Mthangwe lache Mulungu adamukwiza maninge achimupa dzina ndiro limposa madzina yansene, ¹⁰ pala kuti mu dzina la Yesu bondo lirilense lidzamugodamire, kudzaulu na pansi pano na kunsi kwa dziko, ¹¹ pomwe kuti lirime lirilense litawirizedi kuti Yesu Mkhirisitu ni Mbuya, pa ulemerero bwa Mulungu Baba. ¹² Apo, tsono, wakukondeka wangu, ninga mwakubvera kwanu kwa nsiku zense, sikuti pokhapokha ningakhala popo neye soma na nthawe ndiyo ine palibe kubodzi, phatani basa na chipulumuso chanu na mantha na kunjenjemera. ¹³ Nakuti ni Mulungu ndiye akuphata basa mwa imwe mu bzakufuna na mmabasa kubodzi ya kudeka mtima kwace. ¹⁴ Chitani bzobzi mwakusaya kudandaula ayai kuchita makani ¹⁵ kuti mudzakhale wakusaya kuphonya na wangwiro, wana wa Mulungu wakusaya kupunduka pampikiti pa wanthu wa mbwado wakugongonyeka na kuphongonyoka, momwe mukutoya ninga maluju mdziko. ¹⁶ Phatisani mafala ya moyo pala kuti pa nsiku ya Mkhirisitu nimdzakunyadirirani kuti ndiribe kubonera kuthamanga pa pezi ayai kuphata basa pa pezi. ¹⁷ Soma neye apo kuti ndikukhuthuliwa kuna imwe ninga nsembe na chikhulupiriro cha mabasa yanu, ndiri wakudekedwa na kusekera na imwe mwense. ¹⁸ Munjira yoi terezeranimbo kukhala wakudekedwa na kusekera na ine. ¹⁹ Soma ndikukhulupirira mwa Mbuya Yesu pa kutumiza Timoteo kuna imwe tsampanopali, pala kuti ndikalimbikisike mtima pakudziwa bzinthu bza imwe. ²⁰ Nakuti ndiribe winango ninga iye, wakuikhira mtima bzachadidi kuna imwe. ²¹ Nakuti wensene ambapsaga bzakukomera iwo okha basi, sikuti bza Yesu Mkhirisiti neye. ²² Soma mumzindikira matsimimikizidwe yache, ninga mwana wachimuna na babache, na tenepo adatumikira na ine mu uthenga bwabwino. ²³ Tsono ndikukhulupirira bza kumutuma pa nthawe ndiyo nitondo kuona momwe bzinthu bzafambira kuna ine. ²⁴ Soma ndina chikhulupiro mwa Mbuya kuti nimdzabwera pomwe tsampanopali. ²⁵ Soma ndikukumbuka kuti m'bzabwino kutuma Epafrodito kubwerera kuna imwe. Ni m'bale wangu na nyabasa mwayangu na msirikali mwayangu, na mtumi wanu na kapolo wa bzakufuna bzangu. ²⁶ Nakuti adabonera mumtima, achikhumba kukhala namwe mwense, thangwe mudabva kuti akhadwala. ²⁷ Nakuti akhadadwala chadidi mwa penu penu kutsala pang'ono kusaika. Soma Mulungu adamuchitira chifundo, sikutinso kuchitira iye yekha neye , soma na ine kubodzi, pala kuti nampodi ndikhale na nsisi za kuthimizira pa nsisi. ²⁸ Na tenepo ndidamtuma iye mwa kufunisisa kamfulumize, pala kuti mungamuona pomwe musekere, kuti ndikhale na nsisi zakuchepa. ²⁹ Mthangwe lache, mutambireni mwa Ambuye na chisekerero chense. Chitirani ulemu wanthu ninga iye. ³⁰ Nakuti thangwera mabasa ya Mkhirisitu adafikira pafupi impfa. Adaikha moyo wache pamphole mphole kubweresa pa mpikisano bzomwe bzikhasaika utumiki bwanu kuna ine.