¹ Azinji akuphata basa la kugwezeka bzinthu bzomwe bzakwanisiwa na manemba pakati pathu, ² ninga ndimo bzidafikirambo kuna ife kuchoka kuna omwe kuyambira pakutoma akhali mboni za chadidi zakuona na maso yawo na akapolo wa mafala. ³ Naterepoyo bzidaoneka bzabwino kuna ine pomwe, thangwe ndapsaga bwino bwino letu kucoka pa kutoma, kunemba mwa kandondondo bza imwe, Theofilo wa bwino kwerne kweneyo, ⁴ pala kuti mudziwe bzinthu bzomwe mukhapfunzisiwa m'buyomu. ⁵ Mu nsiku za Mfumu ikulu Herodi ya ku Yudeya pakhana wansembe winango wakuchemeriwa Zakaliya wakuchoka mu mgawaniko wa Abija; mkazi wace Elizabeti akhali pomwe wa dzina la Aaron. ⁶ Wense awiriwa akhali wakulungama pamaso pa Mulungu, wakumbafamba seye thangwe m'bzitongi bzense na bzicito pamaso pa Mbuya. ⁷ Soma akhalibe mwana thangwe Elizabeti akhali ngomwa, apo wensewa akhadakalamba. ⁸ Tsapano bzidachitika kuti Zakaliya akhali pamaso pa Mulungu nsiku inango, ali mkati mwa kuphata basa lace la unsembe pa kuteweza mitemo ya mabasa yace. ⁹ Malingana na chitewrezo cha mtemo wace wakasankhulidwe ka kuti ni wa nsembenyi wakuti apite m'basa, iye adasankhuliwa na Loti kupita mkachisi wa Mulungu kukathira nsembe. ¹⁰ Thimu lense la wanthu likhanamata panja pa nthaqwe yomwe nsembe ire ikhathiriwa. ¹¹ Tsapano mjero wa Mulungu adaonekewra kuna iye achiima ku boko la madidi la guwa la nsembe lire. ¹² Pomwe Zakaliya adaona iye, adabonera mumtima , apo adagwedwa na mantha. ¹³ Soma mjero ule adati kuna iye, ''Nampodi kubva msantha, Zakaliya, thangwe pemphero lako labveka. Mkazi wako Elizabeti amdzakubalira mwana. Umdzamuchemera dzina lache Yohani. ¹⁴ Umdzakhala uchisekera na kudekedwa, apo azinji pomwe amdzasekera na kubadwa kwache. ¹⁵ Thangwe amdzakhala mkulu pa maso pa Mulungu. Nampodi adzamwe vinyo ayai bzakuledzeresa, apo amdzadzaliwa na Mzimu Wakuchena kuchokera mu chiberekero cha mai wace. ¹⁶ Azinji wa dzina la Isaraeri amdzatembenuziwa kukhala kwa Mbuya Mulungu wao. ¹⁷ Amdzafamba pa maso pa Mbuya mu mzimu na mphamvu ya Eriya, kukatembenuza mitima ya abereki wa wana wa kusaya kubvera nzeru za wakulungama___kukonzekera pala kuti Mbuya wa wanthu akonzesere bza iye.'' ¹⁸ Zakaliya adati kuna mjero, ''Bzimebzi nimdzabzidziwa tani? Thangwe ndine nkhalamba na mkazangu pomwre nsiku zace zayenda.'' ¹⁹ Mjero ule adamutawira kuti, ''Ndine Gabirieri omwer ndaima kutumiwa na Mulungu. Ndidatumiwa kuti ndilewelewe nawe, kukubweresera nkhani ya bwinoyi. ²⁰ Ona! umdzakhala chete kutazira kusewera ate bzobzi bzidzachitike. Thangwera kuti ulibe kukhulupirira mafala yanguya, yomwe yamdzakwanisiwa pa nthawe yache.'' ²¹ Tsapano wanthu panja pale akhadikira basi Zakaliya ule. Adadabwa kuona kuti Zakaliya adakhala nthawe maninge seye nkubula. ²² Soma pomwe iye adabula panja akhakwanisa lini kusewera kuna iwo. Wanthu wale adadziwa kuti iye adaona masomphenya panthawe yomwe akhali zii zii mkati mule. Adapitiriza kumbalewalewa na manja seye nkubveka mafala na pakamwa. ²³ Idafika nsiku yakuti wamaliza nsiku za pfoti lache, apo adayenda kumuyi kwache. ²⁴ Patapita nsiku zozi, mkazi wace Elizabeti adatenga pathupi apo kwa miyezi mishanu adakhala mwa kubisala. Iye adati, '' ²⁵ Ibzi ndibzo Mulungu wachita kuna ine pomwe adandinyang'ana na nsisi kuchosa manyazi yangu kuna wanthu.'' ²⁷ Mu mwezi wa chitanthatu, mjero Gabirieri adatumiziwa na Mulungu kuyenda mu mzinda wa dziko la Galileya wakuchemeriwa Nazareti, ²⁶ kuna dende ndili likhadatomeriwa na mamuna dzina lace Yosefe, omwe akhali wa dzinza la Davide, apo dzina la dendero likhali Mariya. ²⁸ Adabwera kuna iye achiti, ''Mamukom iwe omwe wakonderiwa kwene nkwene! Mbuya ali nawe.'' ²⁹ Soma akhali wa kuzunguzika kwene kwene na mafala yache apo adadabwisika na mamuko yale na moda wace omwe yakhaliri. ³⁰ Mnjero adalewa kuna iye, ''Nampodi kubva mantha, Mariya, thangwe wagumana na nsisi za Mulungu. ³¹ Ona, umdzatenga pathupi mu chiberekero chako uchidzabala mwana wachimuna. Umdzamuchemera dzina lache 'Yesu.' ³² Iye amdzakhala mkulu maninge apo amdzachemeriwa mwana wa wakudzaulu mkulu maningeyo. Mbuya Mulungu amdzamupa Ulemerero bwa m'bereki wa ku dzinza lache la Davide. ³³ Amdzatonga wa kunyumba ya Yakobo kwa muyaya, apo ufumu bwace bumdzakhala seye malekezero.'' ³⁴ Mariya adati kuna mnjero, ''Bzobzi bzimdzachitika tani, pakuti ndikanati kudziwa mamuna aliyense?'' ³⁵ Mnjero adatawira achiti kuna iye, ''Mzimu Wakuchena umdzabwera pa iwepo, apo mphamvu ya mkulu maninge ule imdzagwera pa iwe. Mwakuti wakulemekezekayo amdzacemeriwa Mwana wa Mulungu. ³⁶ Ona, m'bale wako Elizabeti watenga pomwe pathupi pa mwana wa mamuna pa msinkhu wakukalamba anawo ule. Uno ni mwerzi wachitanthatu ana pathupipo, iye omwe akhacemeriwa ngomwa. ³⁷ Pakuti palibe chomwe chimdzasaya kukwanisika na Mulungu.'' ³⁸ Mariya adati, ''Onani, ndine kapolo wa chikazi wa Mbuya. Bzimwebzi bzichitike kuna ine ninga momwe mafala yanu yakulewera.'' Kinangoka mnjero ule adamuchokera. ³⁹ Ndipo Mariya adanyamuka nsiku zimwezo achiyenda kamfulumize ku dziko la, mapiri mu mzinda wa Yudeya. ⁴⁰ Iye adayenda mu nyumba ya Zakariya achikapasa mamuko Elizabeti. ⁴¹ Tsapano bzidachitika kuti pomwe Elizabeti adabva kupasiwa mamuko na Mariya, mwana wa mmimba mwa Elizabeti adabveka kumoga mchibaliro mwace, apo Elizabeti adadzaziwa na Mzimu Wakuchena. ⁴² Adakwiza mafala yace achisewera mwakukuwa,'' Wakudalisiwa ndiwe pakati pa azimayi apo chakudalisiwa ni chipatso ca mchibaliro chako. ⁴³ Bzachitikiranyi kuna ine kuti mai wache wa mbuya kubwera terepayu kuna ine? ⁴⁴ Thangwe ona, pomwe muungiro wa makuwo yako wapita mmakutu mwangu, mwana wa mchibaliro changu wamoga na kusekera. ⁴⁵ Wakudalisiwa ndiye omwe wakhulupirira kuti pamdzakhala chikwaniriso ca bzinthu bzomwe iye adauziwa na Mbuya.'' ⁴⁶ Mariya adati, ''Mzimu wangu ukutenda Mbuya.'' ⁴⁷ apo mzimu wangu wadekedwa mwa Mulungu mpulumusi wangu. ⁴⁸ Pakuti waona kubonera kwa kapolo wace wa chikazi. Thangwe nyang'anani, kuchokera tsapano ate ku mibwado yensene imdzandichemera wakudalisiwa. ⁴⁹ Pakuti iye omwe ngwa kudala wachita bzinthu bzikulu kuna ine apo dzina lace ndakuthembiwa. ⁵⁰ Nsisi zace mzakusaya kumala kuna mibwado na mibwado kuna iwo omwe ambamugopa. ⁵¹ Waonesa padecha mphamvu na boko lache; wabalalisa wense omwe akhasamwa na maganizo ya mitima yao. ⁵² Wagwesa pansi wana wa mafumu mmipando yao apo wakwiza mipando omwe akhali wakunyozereka. ⁵³ Wakhutisa wanjala na bzinthu bzabwino, soma wakudala achiwaleka nkuyenda chimanja manja. ⁵⁴ Wapereka chithandizo kuna Isaraeri kapolo wace,pala kuti akumbuke kuonesa chifundo ⁵⁵ (ninga ndimo adalewera kuna abereki wathu) kuna Abrahamu nawadzinza wache kwa muyaya.'' ⁵⁶ Mariya adakhala na Elizabeti pafupifupi miyezi mitatu kinangoka adabwerera kumuyi kwace. ⁵⁷ Tsapano nthawe idakwana kuti Elizabeti abale mwana apo adabala mwana mamuna. ⁵⁸ Wapafupi na nyumba yace na adzinza wace adabva kuti Mbuya waonesa chifundo chikulu kuna iye, apo adasekera naye pabodzi. ⁵⁹ Tsapano bzidachitika kuti nsiku yachisere adabwera kudzamugwata ku maso mwanayo. Akadakhoza kumusandula kuti ''Zakariya,'' dzina la babache. ⁶⁰ Soma mai wache adatawira achiti, ''Nada amchemeriwa Yohani.'' ⁶¹ Iwo adati kuna iye, ''Kulibe aliyense kudzinza kwathu wakuchemeriwa dzina ninga loli.'' ⁶² Iwo adachita bzizindikiro bzakusewera na manja kuna babache bzakubvunza dzina la mwanayo kuti limkhala mbani. ⁶³ Babache adakumbira kuti awape chakunembera apo adanemba, "Dzina lache ni Yohani.'' Wensene adadabwisika na bzimwebzi. ⁶⁴ Kamfulumize mulomo wa Zakariya udafunguka apo lirime lache pomwe lidatsudzuka. Adasewera achitenda Mulungu. ⁶⁵ Mantha yadaphata wensene wale akhakhala pafupi na iye. Bzakuchitika bzensenebzi bzidabvekera pense pense mdziko la mapiri lire la Yudeya. ⁶⁶ Wense omwe adabva adabzikoya mmitima yao, nkumbasimba kuti ''Ndiye kuti mwana umweyo tsono amdzakhala wa moda wanyi?'' Thangwe boko la Mbuya likhali pa iye. ⁶⁷ Babache Zakaliya akhadadzaliwa na Mzimu Wakuchena achisewera mwa kubvimira, achiti, ⁶⁸ ''Wakuthembewa ni Mbuya, Mulungu wa Isaraeri, thangwe wabwera kudzathandiza na kukwanirisa chipulumuso kuna wanthu wache. ⁶⁹ Walamusa nyanga ya chipulumuso kuna ife mu nyumba ya kapolo wache Davide. ⁷⁰ (ninga ndimo adasewerera na pakamwa pa aneneri wace wa kulemekezeka kuchokera kalekalelo), ⁷¹ chipulumuso kuchoka kuna awengi wathu na mmanja mwa wensene omwe ambatiwenga. ⁷² Amdzachita bzobzi kuonesa nsisi kuna azibabathu na kukumbukira mpangano wakunyanya, ⁷³ lumbiriro lomwe adalewa kuna Abrahamu babathu. ⁷⁴ Adalumbirira kudzatipa kuti ife, pakukhala wakulombolewa kuchoka mmanja mwa wakutiwenga, timdzamutumikira mwa kusaya mantha ⁷⁵ mwakulemekeza na kulungama pa maso pache mu nsiku zathu zensene. ⁷⁶ Inde, apo imwe, mwana, amdzachemeriwa msewe wa wakulemekezekayo, pakuti mumdzayenda pamaso pa Mbuya kukakonzesera njira zace, kukakonzekeresa wanthu bza kubwera kwache, ⁷⁷ kudzapereka nzeru za chipulumuso kuna wanthu wace na chilekerero ca bzakuipa bzao. ⁷⁸ Ibzi bzimdzachitika thangwera nsisi zipsa za Mulungu wathu, thangwe kuti kubula kwa dzuwa pa dzaulu kumdzabwera kudzatithandiza ife, ⁷⁹ kutoyera wale wakukhala mu m'dima na mu m'thunzi wa imfa. Amdzachita ibzi kudzatsogolera nzayo zathu munjira ya mtendere.'' ⁸⁰ Tsapano mwana adakula achikhala wa mphamvu mu mzimu, apo adakhala mu chipululu ate nsiku yomwe adaonekera padecha ku Izaraeri.