¹ Tsapano nsiku zire bzidachitika kuti Caesara Augusto adatonga kuti wanthu wense wakukhala mdziko lapansi awerengiwe. ² Ichi cikhali chiwerengero ca kutoma kuchitika pomwe Quiriniasi akhali mtongi wa Siriya. ³ Apo aliyense adayenda kumzinda wa kwao kuti akawerengiwe. ⁴ Yosefe adayendambo kuchoka ku Galileya, mu mzinda wa Nazareti, kuyenda ku Yudea, mzinda wa Davide, wakucemeriwa Beterehemu, thangwe akhali wa dzinza la banja la Davide. ⁵ Adaenda kumweko kukanembesa na Mariya omwe akhadamutomera apo akhana pathupi. ⁶ Tsapano bzidachitika kuti pomwe akhali kumweko, nthawi idakwana kuti abale mwana. ⁷ Adabala mwana mamuna, mwana wakutoma, apo adamukulungira mu nguo zitali zakulenza lenza achimuikha mu kangalawa kakudyera ng'ombe, thangwe mu nyumba zakugona alendo mmasubi yache yensene mukhalibe mbuto. ⁸ Mmathengo ya mbali imweyo mukhakhala amakabusa kumbadyesera mabira kumbagoneratu koko. ⁹ Mjero wa Mbuya adaonekera kuna iwo, apo ulemerero bwa Mbuya budatoya kuwazungulira, apo adaphatiwa na mantha makulu. ¹⁰ Apo mjero adalewa kuna iwo, ''Nampodi kubva mantha, thangwe ndakubwereserani nkhani yabwino yomwe imdzabweresa kudekedwa kuna wanthu wense. ¹¹ Lero mpulumusi wabadwa pala imwe mu mzinda wa Davide! Iye ni Mkhirisitu Mbuya. ¹² Ichi ni chizindikiro chomwe cimdzaperekiwa kuna imwe: Mumkaona kamwana kakulungiwa na nguwo za kulenza lenza kagonesiwa mu kangalawa kakudyera ng'ombe.'' ¹³ Mwachidzidzi padafika thimu lizinji la anjero kuchoka kudzaulu kudzayangazana na mwayaoyu achiimbira Mulungu achiti, ¹⁴ ''Ulemerero kuna Mulungu wa kudzaulu, apo pa dziko lapansi pakhale mtendere pakati pa wanthu omwe akudekedwa naye.'' ¹⁵ Bzidachitika kuti pomwe anjero wale adawachokera kubwerera kudzaulu,, amakabusa wale adasewera kuna wina na mwayache, ''Mbatiye tsapano ku Beterehemu tikaone bzomwe bwachitikabzo, ndibzo m,buya watidziwisa,'' ¹⁶ Adanyamuka kamfulumize achikaonadi Mariya, Yosefe na mwanayo adagonesadi mu chakudyera ng'ombe. ¹⁷ Atamuona, adafokotoza bzomwe adabva bza mwanayu. ¹⁸ Wense omwe adabva akhali wakudabwisika na bzomwe amakabusa wale adalewa. ¹⁹ Soma Mariya adapitirirabe kumbalingirira bzense bzomwe akhabva, achimbakumbukira mumtima mwache. ²⁰ Amakabusa wale adabwerera ali kumbatenda na kumbaimbira Mulungu thangwera bzense bzomwe adabva na kuona, ndendendedi ninga ndimo akhauziwira. ²¹ Pomwe kukhali kumaliza kwa nsiku ya chisere, pomwe adagwatiwa ku maso, adasanduliwa dzina kuti Yesu, dzina ndilo adapasiwiratu na mjero iye akanati kubzaliwa mchiberekero cha mai wache. ²² Pomwe nsiku za kuchenesiwa zitamala, malingana na chitongero cha Mose, adamubweresa kutchalitchi ku Yerusalemu kudzamuonesa kuna Mbuya. ²³ Ninga ndimo bzidanembedwera mchitongi ca Mbuya, ''Mwana aliyense wakutoma wachimuna kufungulira chibaliro amdzapambuliwa pala Mbuya.'' ²⁴ Natenepo adathira nsembe ninga ndimo bzidalewedwera mchitongi ca Mbuya, ''nkhangaiwa ziwiri ayai tuwana tuwiri twa njiwa.'' ²⁵ Onani pakhana munthu winango mu Yerusalemu dzina lace Simiyoni, apo munthu uyu akhali wakubvera na wakuchena kwa kunyanya. Iye akhadikira cakunyamalizira Izaraeri, apo Mzimu Wakuchena ukhali pa iye. ²⁶ Bzidazimbuliwa kuna iye na Mzimiu Wakuchena kuti amdzafa lini akanati kuona Mkhirisitu wa Mbuya. ²⁷ Mwakutsogoziwa na Mzimu, Simiyoni adabwera kutchalitchi. Pomwe abereki wale adabweresa ka tcheche kale kakuchemeriwa Yesu, kuti adzakachitire bzomwe mtemo wa citongi ukhalewa, ²⁸ adakadzusambo mmanja mwace achitenda Mulungu, achiti, ²⁹ ''Tsapano lekani kapolo wanu anyamuke mu mtendere, Mbuya kuteweza ndimo mudalewera mafala yanu. ³⁰ Pakuti maso yangu yaona chipulumuso, ³¹ chomwe mudakonza pa maso pa wanthu wense. ³² Kutoya kwa cipulumuso kuna wacikunja na ulemerero kuna wanthu wanu wa ku Izaraeri.'' ³³ Babache na mai wace adadabwisiwa na bzomwe bzidaseweriwa bza kuguma iye. ³⁴ Simiyoni adawadalisa achiti kuna mai wace, ''Onani, mwana uyu waperekiwa pala kuti wanthu azinji agwe na kumuka mu Izaraeri na chizindikiro ca kulambiwa__apo dipa limdzapsonda mzimu wanu__ ³⁵ mwakuti maganizo ya mmitima mizinji yamdzazimbulika.'' ³⁶ Mneneri wachikazi dzina lace Anna akhali popo. Akhali mwana wa Fanuwero wakuchoka ku dzinza la Asha. ³⁷ Iye akhali wakukalamba. Iye akhadakhala magole manomwe na bayache atakula kale chinamwali. Apo adakhala mmasiwa kwa magole makumi masere na manai. Akhalova lini kutchalitchi soma kumbakhalira kusala kudya na kunamata, usikun na masikati. ³⁸ Pa nthawe imweyo adabwera pafupi na iwo achiyamba kutenda Mulungu kuna aliyense ndiye akhadikhirira cipulumuso ca Yerusalemu. ³⁹ Pomwe adamaliza bzense ndibzo akhafunika kucita malingana na chitingi ca Mbuya, adabwerera ku Galileya, kumzinda wao wa Nazareti. ⁴⁰ Mwana adakula achikhala na mphamvu, kuthimizirika mu nzeru na cifuniro ca Mulungu chikhali pa iye. ⁴¹ Abereki wace gole lirirense akhayenda ku Yerusalemu pala mwambo wa pasaka. ⁴² Pomwe akhana magole khumi na mawiri, adayenda naye pomwe ku mwambo ule. ⁴³ Atakhala ate nsiku zensene za kumaliza mwamboyo, adayamba kubwerera kumuyi: Soma mwana ule Yesu adatsalira mmambuyo mu Yerusalemu abereki wache wale seye nkudziwa bzobzo. ⁴⁴ Akhatondo kuganiza kuti akhali mchithimu comwe chikhjafamba nawo, mwakuti adafamba ulendo bwa nsiku yamtero. Kinangoka adayamba kumupsagapsaga mwa abale na ashamwali wao. ⁴⁵ Pomwe adamusaya, adabwerera pomwe ku Yerusalemu achikayamba kumupsaga ppomwe kumweko. ⁴⁶ Bzidachitika kuti patapita nsiku zitatu adamugumana mu tchalitchi, atambinga pampirikiti pa apfunzisi, kumbawatetekera na kumbawabvunza mabvunzo. ⁴⁷ Wense omwe akhamubva adadabwisika thangwera kubvesesa kwace na matawiridwe yace. ⁴⁸ Pomwe adamuona iye, adadabwa. Mai wace adati kuna iye, '' Mwanawe, msabwanyi kucita tenepayu? Ona, babakowa na ine takupsaga kwene kwene.'' ⁴⁹ Iye adati kuna iwo, '' Msabwanyi mukhandipsaga? Mulibe kudziwa kuti ndikufunusisa kuphata basa la Baba wakudzaulu? ⁵⁰ Soma alibe kubvesesa ndibzo mafala yace yakhalewa. ⁵¹ Kinangoka adabwerera nawo ku Nazareti apo akhawabvera bwino. Mai wace adakumbukira bzinthu bzense mumtima mwao. ⁵² Soma Yesu adapitirira kukula mu nzeru na msinkhu, apo adapitirira pomwe kutumikira Mulungu na wanthu.