¹ Pakutoma pakhana Mafala, apo Mafalayo yakhana Mulungu, apo Mafalayo yakhali Mulungu. ² Uyu akhali pakutoma na Mulungu. ³ Bzinthu bzensene bzidakonziwa kudzera mwa iye, apo pangadasaya iye pakhalibe neye chibodzi chakulengiwa ndicho chingadalengiwa. ⁴ Mwa iye mukhana moyo, apo moyoyo ukhali kubvunika kwa wanthu. ⁵ Kubvunikako kukhatoya mumdima, apo mdimayo ulibe kuugonjesa. ⁶ Pakhana munthu ndiye adatumiwa kuchoka kuna Mulungu, omwe dzina lache akhali Yohani. ⁷ Iye adabwera ninga mboni kudzachitira umboni bza kubvunika, kuti wensene akakhulupirire kudzera mwa iye. ⁸ Yohani akhali lini kubvunikako, soma adabwera kuti adzachitire umboni bza kubvunika. ⁹ Kubvunika kwachadidi, ndiko kumpereka kutoya kuna wanthu wensene, kukhabwera mdziko lapansi. ¹⁰ Iye akhali padziko lapansi, apo dziko lapansi lidalengiwa na iye, apo dziko liribe kumudziwa iye. ¹¹ Iye adabwera kwa iye yekha, apo wache wa chaiwowo alibe kumutambira iye. ¹² Soma kuna wensene wakumutambira iye, omwe adakhulupira dzina lache, iye adawapa ufulu bwakukhala wana wa Mulungu. ¹³ Awa alibe kubadwa na mulopa, ayai kufuna kwa thupi, ayai na kufuna kwa munthu, soma kwa Mulungu. ¹⁴ Mafala yadasanduka thupi yachikhazikika pakati pathu. Taona ulemerero bwache, ulemerero ningadi bwa wakubadwa yekha mwa Baba, bwakudzala na chisomo na chadidi. ¹⁵ Yohani adachitira umboni bza iye achikuwa, kulewa kuti, "Uyu ngule ndiye ndikhati, 'Iye wakudzabwera pambuyo panguyo nimkulu kuposa ndimo ndiriri, thangwe akhali patsogolo pangu."' ¹⁶ Nakuti nakudzala kwache tatambira chifundo kuchoka chifundo. ¹⁷ Nakuti chitongi chidaperekiwa na Mose. Chifundo na chadidi bzidabwera na Yesu Mkhirisitu. ¹⁸ Palibe adaona kale Mulungu; Mulungu yekhayo, omwe ali kumbali ya Baba, iye wachitisa Mulungu pala adziwike. ¹⁹ Ubu ni umboni bwa Yohani pomwe Ayuda adatumiza ansembe na Alevi kuna iye kuchoka ku Yerusalemu kukamubvunza, "Ndiwe mbani kodi?" ²⁰ Iye adatawira---alibe kugaza, soma kutawira---"Ndine lini Mkhirisitu." ²¹ Apo iwo adamubvunza, "Ndiwe mbani tsono? Ndiwe Eliya kodi?" Iye adati, "Ndine lini." Iwo adati, "Kodi ndiwe mneneri?" Iye adatawira, "Neye." ²² Kinangoka adati kuna iye, "Ndiwe mbani, pala kuti tikwanise kuwatawira ndiwo atituma? Iwepo pawekha umbabziti ndiwe mbani?" ²³ Iye adati, "Ndine mafala yakukuwa mchipululu: "Thamulani njira ya Mbuya,' ninga ndimo Yesaya mneneri adalewera." ²⁴ Tsapano winango wakuchokera kuna Afarisi adatumiwa, ²⁵ apo adamubvunza achiti kuna iye, "Thangweranyi tsono ukubatiza penu ndiwe lini Mkhirisitu ayai Eliya ayai mneneri?" ²⁶ Yohani adawatawira, kulewa kuti, "Nimbabatiza na madzi. Soma pakati panu pana wina mukumudziwa lini. ²⁷ Ni omwe akubwera mmambuyo mwangu, neye milawu ya shango zache ndikuthemera lini kuitsudzula." ²⁸ Ibzi bzidachitika ku Betaniya ng'ambu ya Yolodano ndiko Yohani akhabatizira. ²⁹ Mangwana yache Yohani adaona Yesu akubwera kuna iye achiti, "Nyang'anani, pana Mwana wabira wa Mulungu ndiye ambabulisa bzakuipa bza padziko! ³⁰ Uyu ngule ndidati, 'Omwe akubwera pambuyo panguyo ngwakuposa ine.' ³¹ Ndiribe kumudziwa iye, soma bzikhali kuti adziwike ku Isaraeri kuti ine ndidabwera kudzabatiza na madzi." ³² Yohani adaikhira umboni kulewa kuti, "Ndidaona Mzimu ukubuluka ninga nkhangaiwa kuchoka kudzaulu, apo udambutha pa iye. ³³ Ndiribe kumuzindikira iye, soma ule adandituma kudzabatiza na madzi adati kuna ine, 'Omwe ndiye mudamuona Mzimu ukubuluka kudzamumbutha ule, ndiye amdzabatiza na Mzimu Wakuchena.' ³⁴ Ndaona na kuikhira umboni kubodzi kulewa kuti uyu ni Mwana wa Mulungu." ³⁵ Mangwana yache, pomwe, pomwe Yohani akhadaima na wakupfunza wache awiri, ³⁶ adaona Yesu akhafamba pafupi na iwo, apo Yohani adati, "Nyang'anani, Mwana wabira wa Mulungu!" ³⁷ Wakupfunza wache awiri adabva iye akulewa terepoyo apo adatewera Yesu. ³⁸ Kinangoka Yesu adacheuka achiona iwo akumutewera achiti kuna iwo, "Mukupsaga chani?" Iwo adatawira, *Rabbi" (ndiye kuti "M'pfunzisi"), "Mukumbakhala kuponi?" ³⁹ Iye adati kuna iwo, "Bwerani mudzaone." Kinangoka iwo adabwera achiona pomwe iwo akhakhala; iwo adakhala na iye nsiku yoyo, nakuti ikhathamangira nthawe yachikhumi. ⁴⁰ M'bodzi was awiri ndiwo adabva Yohani akusewera kinangoka mkutewera Yesu akhali Andreya, m'bale wache wa Simoni Petulo. ⁴¹ Iye adatoma kugumana na m'bale wache chaiye Simoni achiti kuna iye, "Tagumana Mesiya" (ndiye kuti Mkhirisitu"). ⁴² Adamubweresa kuna Yesu, apo Yesu adamunyang'anisa achiti, "Ndiwe Simoni mwana wa Yohani. Umdzachemeriwa Kefasi" (ndiye kuti "Petulo"). ⁴³ Mangwana yache pomwe Yesu akhafuna kuchoka kuyenda ku Galileya, adagumana Filipi achiti kuna iye, "Nditewere ine." ⁴⁴ Tsapano Filipi akhali wa ku Betisaida, muyi wa Andireya na Petulo. ⁴⁵ Filipi adagumana Natanieli achiti kuna iye, "Iye omwe Mose adanemba mu mtemo wa utongi, na aneneri, tamugumana iye: Yesu mwana wa Yosefe wa ku Nazareti." ⁴⁶ Natanieli adati kuna iye,"Chinthu chabwino chingachokerembo mu Nazareti?" Filipi adati kuna iye, "Bwera udzaone." ⁴⁷ Yesu adaona Natanieli akubwera kuna iye achiti kuguma iye, "Ona, waku Isaraeri chaiyeiye uyu, omwe mwa iye mulibe chinyengo!" ⁴⁸ Natanieli adati kuna iye,"Ukundidziwa tani?" Yesu adatawira achiti kuna iye, "Pomwe Filipi akanati kukuchemera, nthawe ndiyo ukhali patsinde pamuti wamkuyu, ndidakuona." ⁴⁹ Natanieli adatawira, "Rabbi, ndimwe Mwana wa Mulungu! Ndimwe Mfumu ya Isaraeli!" ⁵⁰ Yesu adatawira achiti kuna iye, "Thangwera ndakuuza, 'Ndidakuona patsinde pamuti wamkuyu,' wakhulupiriratu? Uniona bzikulu kuposa ichi." ⁵¹ Kinangoka iye adati, "Indetu, indetu, ndikulewa kuna iwe, umdzaona kudzaulu kutafunguka, apo anjero wa Mulungu akubuluka pa Mwana wa Munthu."